COVID-19: iTukutuku ni Veidusimaki, Veivakabulai, kei na Vakanuinui
Era vakadinadinataka na lewenilotu ni ra sa raica na liga ni Turaga ena gauna sara mada ga oqo ni veiveisau, nuiqawaqawa, kei na rarawa.
A sa Dau Tiko vata kei Au oKoya; ka sa Tiko vata kei Au Oqo
Ni’u a dabe toka e vale ka tovolea tiko me vakaseavutaka na noqu lomaleqa ena veika e yaco tiko e vuravura, au a dolava noqu ivolaniveisiga ka mani raica sara oqo: “E vuqa na rere e sala vata mai na noda lamata cake ena veisiga yadua ena vuravura oqo, ia ena vakabauti ni ivakavuvuli ni kosipeli, eda na rawa ni cavu ikalawa kina vakamalua. … Na vakabauta ena dau vakadruka tu ga na rere e veigauna.”
Au kila niu se qai ciqoma ga vaka i au na ivakatakila kaukauwa ka solia vei au na Tamada Vakalomalagi mai na noqu ivolaniveisiga ni vica na yabaki sa oti. Au a vakalougatataki ena dua na gauna ni vakacegu kei na kila-ka ni Tamada Vakalomalagi a tiko vata kei au ena gauna o ya, ka sa tiko eke oKoya vata kei au oqo.
Danette Gray, Utah, Amerika
Na Yalo Tabu e Rawa ni Cakacaka Onolaini.
Au a vakauqeti meu tekivutaka na kalasi ni semineri ena vidio ni veitalanoa vakailawalawa. Ni vo e rua na siga me sogo vaka‑kuaranitini na neimami siti, sa tekivu na imatai ni lesoni ni neitou kalasi ena initaneti.
Eso na itubutubu era a tomana talega na neitou kalasi, oka kina o ira era sega ni lewenilotu. Au a tarova dredre na wai ni mataqu ena neimami vulica vata tiko na Mosaia wase 2. Keimami a vakila taucoko na Yalotabu ni keimami vulica ni noda qaravi ira tiko na tani eda sa qarava tale tikoga na Kalou. Au a vulica vakalevu me baleta na kena ciqomi kei na kilai ni ivakatakila yadua. Ena vakatakila na Yalo Tabu na dina ni kosipeli ena vuqa na ivakarau ni kena soli. Se cava ga na veika e yaco tiko e vuravura, e sega ni dua na ka ena rawa ni tarova na kena toso tikoga na cakacaka ni Tamada Vakalomalagi me baleta na nodra vakabulai na Luvena.
Marites Pineda, Mindanao, Yatu Filipaini
Keimami se Sega ni Calata e Dua na Siga ni Semineri
Ena veika kece sa mai yaco me baleta na coronavirus, au marau meu kaya ni keimami se sega ni calata e dua na siga ni semineri! Na vakavulici ni noqu kalasi ena vidio e so na kena bolebole, ia au dau taleitaka meu raici ira na itubutubu kei ira na tacidra gone ni ra vakarorogo mai ena neimami veivosaki. Au taleitaka ni oqo e vakarautaka e dua na yalo ni toso tikoga kei na ivakarau me baleta na neimami matavuvale, ka vakabibi ni rawa ni keimami tomana tikoga me vakadinadinataki Jisu Karisito kei na Nona loloma vei keda.
Mandi Crandell, Yigo, Guam
Veiqaravi Vei Ira ena Yasa ni iLati Ruarua
Au a veiqaravi voli vaka dua na marama qase daukaulotu ena Tabana ni Kaulotu e Missouri Independence ni vakadaroi mai na veisoqoni vaka-Lotu ka keimami tekivu me sogobutu ena neimami dui icili. Keimami vakayagataka na neimami talevoni kei na kompiuta me veitaratara tiko kei ira na lewenilotu ka dodoliga yani vei ira keimami a cakacaka vata tiko, ka ra sega ni dau mai lotu wasoma.
Me rawa niu vakaogai au tiko, au a mani cakava eso na tuva kawa, e dina ga ni a sa dredre ena dua na gauna meu kunea e dua na yaca vou. Ena gauna au curu kina ki na FamilySearch, au a raica sara e dua na notisi ni dua na ivolatukutuku e waraka tiko me vakabiri. Na itukutuku e dua oya a muataki au meu kunea rawa e rauta ni 70 na tamata ena noqu iyatu. Ni oti e lima na siga, a mai tu vakadua na taladrodro ni yaca. Ena siga tikoga oya, keimami qai kila ni keimami sa vagalalataki kece me keimami sa lako ki vale. Au luluvu meu biubiu, ia au vakila talega niu kalougata ni rawa niu qarava na matavuvale ena yasa kadua ni ilati ena loma ni gauna dredre oqo.
Kim Nielson, Oregon, Amerika
Vakayacora Tiko na Noda iTavi me Tosoya Tikoga na Cakacaka ni Turaga
Ni ra sa vakasalataki mai na daukaulotu ena neirau yasana mera dui tiko ga ena nodra icili, keirau a tovolea me cakava na neirau itavi, ka sureta e dua na itokani me vulica me baleta na Lotu. Na daukaulotu era sa wasea tiko nodra lesoni ena talevoni vata kei koya na neirau itokani. E vakilai na kaukauwa ni Yalo Tabu ena neimami vale ka da na vakavinavinaka ki na tekinolaji sa tu vei keda nikua. Sa veivakurabuitaki ni da sarava ni se toso tikoga na cakacaka ni Turaga ena loma sara mada ga ni vei bolebole kece e vuravura.
Elaina Reich, Washington, Amerika
Na iVakabula e Dau Rogoca Noda Lagasere
Au vakaitavi vaka-daukaulotu veiqaravi ni Lotu ena parokaramu ni PathwayConnect (Gunisala iSema ki na vulitorocake e BYU Idaho) ena iteki e Kyiv Ukraine. O ira na iliuliu ni parokaramu era a lewa me keimami tuberi kece sara na dau liutaka na vakasoqoni e matanavotu me rawa ni keimami veiliutaki ni vakakayagataki na initaneti . Na siga sara ga ka tarava, a kacivaka na matanitu na ivakarau vaka-kuaranitini e Kyiv.
Au taleitaka na madigi me soqoni vata me baleta na PathwayConnect. Kau taleitaka na madigi me soqoni vata me sokalou ka lagasere vata e vale ena vei Sigatabu. Au vakavinavinakataka na veivakadeitaki ni vanua e vakasoqoni kina e lewe rua se lewe tolu ena vuku ni Yacana, sa tiko kina o Koya. E sega ni dua e kila na balavu ni neimami na tiko vaka‑kuaranitini e Kyiv, ia keimami kila ni na rogoca na iVakabula na neimami lagasere.
Kateryna Serdyuk, Kyiv, Ukraine
“Sa Gauna mo Kauta Lesu Kina Nomu Matavuvale”
Ni toro cake na itukutuku me baleta na COVID-19, au vakila ni vaka me sa rui vakalevutaki sara. Ia ni toso tiko na veisiga, au sa tekivu vakila na nuiqawaqawa kei na domobula sara mada ga me baleta na veisiga ni mataka ni noda vuravura.
Ena dua na mataka au sega ni qai moce rawa tale ka vakananuma vakatitobu na ka kece oqo. A qai yaco mai na veivakacegui. A vakavulica vei au na Yalotabu ni sa solia vei au na Turaga e dua na isolisoli. “E sa gauna mo taura lesu kina nomu matavuvale,” a kaya oKoya.
Sa dau osooso sara na bula. Sa solia kina na matedewa totolo oqo ki na noda matavuvale na madigi meda vakanamata ki na ka e bibi sara: na kosipeli i Jisu Karisito. Au rawa ni tababokoca eso na veivakayarayarataki veivakagagai ni vuravura ka vakanamata ena vakavulici iratou na luvequ me ratou rai vei Karisito. Sa dau kauwaitaki keda tu ga na Tamada mai Lomalagi. Au sa qai vakila vakalevu cake sara oqo.
Mary Ostler, Nebraska, Amerika
Sa Vakarautaki Keda oti na Turaga me Baleta na ka Oqo
Ni a tukuni taumada vei au ni sa rube vakawawa na veisoqoni ni Lotu, au a rarawataka vakalailai. Ia oqo au sa rawa ni raica na sala sa vakarautaka vei keda na Turaga mai vei ira na Nona parofita me baleta na ka oqo. Na vulici-e-vale ni kosipeli ena rawa ni vukei keda ena gauna ni veivakatovolei. Au vakavinavinaka ni se rawa meu vakaivotavota ena sakaramede ena vei-Sigatabu ka vulica na nodra vosa na parofita. E veivakacegui ni da kila, me yacova na gauna eda na qai soqoni vata tale kina, eda na rawa ni vakila na Yalotabu vata ga.
Emma van As, Gauteng, Ceva kei Aferika
Eda sa Vakavulici Ena iVakarau ni Sokalou
Ni keirau vakaitavi kei na watiqu ena cakacaka vakalotu ni sakaramede ena neirau itikotiko ena imatai ni gauna, au a vakila vakaukauwa sara na Yalotabu kau lagata dredre kina na sere keirau a digitaka. Ena noqu yabaki 70-vakacaca ni dau tiko ena lotu me sokalou, au sega ni nanuma rawa na kena taleitaki sara vakabibi na veivakalougatataki keirau sa ciqoma vaka lewenilotu kei na neirau vakaitavi e Na Lotu i Jisu Karisito ni Yalododonu Edaidai.
Eda sa vakavulici ena ivakarau ni sokalou kei o cei eda sokalou vua. Io, eda na calata na veimaliwai vata kei ira na noda itokani Yalododonu ka da na marautaka me lesu tale ki na “ivakarau dei” ena kena gauna totolo e rawa, ia au sa vakavinavinaka me baleta na lesoni eda vulica tiko ena gauna oqo ni da muria na ivakasala ni parofita ena noda sokalou “usututaki e-vale, tokoni mai na Lotu”.
Susan Preator, Montana, Amerika
Kune Vakacegu kei na Duavata
Na lotu vakavuvale sa ikoya e dua na ka keirau dau namaka kei na luvequ tagane ena veimacawa. Keirau a dau sureti ira wasoma na lewenilotu, itokani, kei ira na daukaulotu ki na neirau vale. Ia a qai veisau vakasauri na veika oqori ena vuku ni matedewa totolo oqo. Oqo keirau sa lotu vakavuvale vata kei ira na neirau itokani ena talevoni. Ena neirau gauna vata oqo keirau sa rawa ni cakava e vuqa na ka e sa vakavolekatitaki keirau sara.
Au sa vakavinavinakataka vakalevu na noda parofita lomani, ka a sureti keda kece meda lolo. E vuqa vei keda a rawa ni vakila na kaukauwa ni duavata kei na vakacegu ena ka sotavi oya. Ena veigauna vakaoqo, na vakacegu eda gadreva e dau yaco mai vua na iVakabula o Jisu Karisito.
Roshene McKenzie, Kingston, Jamaica
Sa Vakataulewa na Kalou
Au se qai tekivu kaulotu ga ena rua veimama na vula sa oti. Au a lesi meu veiqaravi e Hermosillo, Mexico. Ena veisiga a noqu na madigi me sotavi ira na tamata totoka ka ra sa vakarau tu mera ciqoma na kosipeli vakalesui mai. Au vakila niu a se qai tekivu vakayacora sara tikoga na inaki ni noqu bula ni qai takosova na noqu kaulotu na COVID-19.
E sa mosi meu buiti ira na tamata oqori kau lomana vakalevu, ia au a vakila talega na vakacegu levu kei na veitaqomaki baleta niu kila ni sa vakataulewa tiko na Kalou. Au vakavinavinaka ni tiko e dua na noda parofita kei ira na iApositolo me tuberi keda ena gauna oqo. Me vakataki ira e vuqa na daukaulotu e vuravura, au sa nuidei ni oqo ena sega ni itinitini ni noqu kaulotu. Sega ni dede au sa na rawa tale ni veivuke me tosoya ki liu na cakacaka ni Turaga ka tomana tiko meu iyaya ni cakacaka e ligana me kauti ira mai e levu cake na yalo ki na veivutuni.
Carolina Roman, Puerto Rico