![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F81%2F84%2F818496f90948a9f11834448330a4b371c73c5477%2F818496f90948a9f11834448330a4b371c73c5477.jpeg/full/!250,/0/default)
Na Sala e Vakalougatataki Ira Kina na iTabagone na Matabete
Ena matabete, sa rawa meda vakatataki cake. Na matabete e kauta mai na rarama ki na noda vuravura.
Au vakavinavinaka vakalevu niu mai tiko eke. Ena gauna au sa kila kina niu na mai vosa vei kemuni nikua, sa dua na ka na noqu marau ia, au sa vakarokoroko talega kina vakalevu. Au a vakasamataka tiko vakalevu na ka meu na mai wasea, kau nuitaka ni na vosa vakadodonu vei kemuni na Yalotabu mai na noqu itukutuku.
Ena iVola i Momani, a masulaki iratou yadudua na luvena o Liai ni bera ni mate ka veivuke oqo me ratou raica na nodratou kaukauwa kei na gugumatua tawamudu. Au gone duadua vei ira e walu na gone, ka sai au duadua ga na gone ena yabaki sa oti au a tu e vale ena imatai ni gauna. Ni sega na taciqu e volekati au se me tiko e dua meu dau vosa vua sa dau ka dredre sara vei au. Eso na bogi au dau vakila niu galili sara vakalevu. Au vakavinavinaka vei rau na noqu itubutubu, ena nodrau saga nodrau vinaka taucoko me rau vukei au. E dua na kena ivakaraitaki o ya ni a solia vei au o tamaqu e dua na veivakalougatataki ni matabete ni veivakacegui ena dua na gauna ni ibolebole. Ni oti na nona veimasulaki, a sega ni yaco na veisau ena gauna vata o ya, ia au a vakila na vakacegu kei na loloma maivei Tamaqu Vakalomalagi vakakina maivei tamaqu. Au vakila niu kalougata ni tamaqu e dua e kilikili me solia na veivakalougatataki ni matabete ena veigauna au gadreva kina ka vukea meu raica na noqu kaukauwa kei na noqu gugumatua tawamudu, me vaka ga a cakava o Liai ena nona vakalougatataki iratou na luvena.
Se cava ga na ituvaki ni nomu bula, sa rawa me na soli vei iko na veivakalougatataki ni matabete. Ena rawa mo ciqoma na veivakalougatataki ni matabete mai vei ira na lewe ni vuvale, itokani, turaga dauveiqaravi, iliuliu ni matabete, kei na Tamada Vakalomalagi ka na sega ni biuti iko. E kaya o Elder Neil L. Andersen: “Na veivakalougatataki ni matabete era kaukauwa cake sara mai vei koya e na kerei me veiqaravi kina. … Ni da sa buladodonu, na cakacaka vakalotu ni matabete sa na vakalougatataka na noda bula.”1
Kakua ni lomalomarua mo kerea na veivakalougatataki ni ko gadreva mo dusimaki vakalevu cake. Ena noda veigauna dredre sara eda sa gadreva kina na Yalo me na vukei keda vakalevu duadua. E sega ni dua e uasivi vakaoti ka da na sotava kece na veika dredre. Eso vei keda ena sotava na rarawa, lomaocaoca, vakatotogani, se nanuma ni da sega ni bula yaga. Ena vukei keda na veivakalougatataki ni matabete meda qaqa mai na veibolebole oqo ka ciqoma na veivakacegui ni da toso yani ki liu ki na veisiga ni mataka. Au nuitaka ni da na saga meda bula kilikili meda ciqoma kina na veivakalougatataki oqo.
E dua tale na sala e vakalougatataki keda kina na matabete o ya mai na veivakalougatataki vakapeteriaki. Au sa vulica meu dau gole ki na noqu veivakalougatataki vakapeteriaki ena gauna au dau rarawa se galili kina. E vukei au na noqu vakalougatataki meu raica na noqu gugumatua kei na ituvatuva matata ni Kalou kivei au. E dau vakacegui au ka vukea meu raica uableta yani na noqu rai vakatamata. E vakavotuya vei au na noqu isolisoli kei na veivakalougatataki au na ciqoma kevaka au bula kilikili. E vukei au talega meu nanuma ka meu tiko vakacegu ni na vakarautaka na Kalou na isaunitaro ka dolava na katuba vei au ena kena gauna donu niu sa gadreva vakaidina kina.
Na veivakalougatataki vakapeteriaki ena vukea meda vakavakarau meda lesu ka laki bula vata kei na Tamada Vakalomalagi. Au kila ni veivakalougatataki vakapeteriaki sa mai vua na Kalou ka sa rawa me veisautaka na noda malumalumu me kaukauwa. Era sega ni itukutuku mai vei ira na dautukuni oqo; era tukuna vei keda na veivakalougatataki oqo na veika e gadrevi meda rogoca. Era sa vaka na Liaona kivei keda yadudua. Ni da sa vakaliuca na Kalou ka vakabauti Koya tiko, ena liutaki keda o Koya ena noda dui lekutu.
Me vaka ga a vakalougatataki Josefa Simici na Kalou ena matabete me rawa ni vakalesui mai na veivakalougatataki ni kosipeli, sa rawa meda ciqoma na veivakalougatataki ni kosipeli ki na noda bula ena matabete. Ena veimacawa sa soli na madigi kei na gauna donu vei keda meda taura kina na sakaramede. Mai na cakacaka vakalotu oqo ni matabete, sa rawa me tiko kei keda na Yalo e veigauna, ni sa rawa me samaki keda ka vakasavasavataki keda. Kevaka eda nanuma me da sa biuta laivi e dua na ka mai na noda bula, meda gole vua e dua na iliuliu nuitaki e rawa ni vukea mo muria na salatu dodonu. Sa rawa mera vukei iko na nomu iliuliu mo rawata na kaukauwa taucoko ni Veisorovaki i Jisu Karisito.
Eda vakavinavinakataka na matabete, ni sa rawa meda ciqoma na veivakalougatataki ni cakacaka vakalotu ni valetabu. Vakatekivu mai na gauna au a curu rawa kina e valetabu, au sa lalawataka ka vakaliuca meu na dau lako kina vakawasoma. Niu dau taura na gauna ka solibula me rawa niu voleka sara vei Tamaqu Vakalomalagi ena Nona vale tabu, au sa vakalougatataki ena noqu ciqoma na ivakatakila kei na veivakauqeti a vukei au sara vakaidina ena gauna taucoko ni noqu bula.
Ena matabete, sa rawa meda vakatataki cake. Na matabete e kauta mai na rarama ki na noda vuravura. A kaya o Elder Robert D. Hales: “Kevaka e sega na kaukauwa ni matabete, ‘sa na vakarusai sara na vuravura taucoko’ (raica na V&V 2:1–3). Ena sega na rarama, sega na inuinui—na butobuto walega.”2
Sa vakayaloqaqataki keda tiko na Kalou. Sa vinakati keda o Koya me da lesu tale yani Vua. E kilai keda vakayadudua. E kilai iko o Koya. E lomani keda. Sa dau wanonovi keda tiko ka vakalougatataki keda ena gauna mada ga ni da sega ni kilikili kaya. Sa kila tu o Koya na veika eda gadreva kei na gauna eda gadreva kina.
“Dou kerekere ka na soli vei kemudou, dou vakasaqara, ka dou na kunea; dou tukituki ka na dolavi vei kemudou:
“Ni sa rawata ko koya yadua sa kerekere; ka sa kunea ko koya sa vakasaqara ka na dolavi vua sa tukituki.”(Maciu 7:7–8).
Kevaka se bera ni dua na nomu ivakadinadina baleta na matabete, au vakauqeti iko mo masu ka kerea mo kila vakai iko na kena kaukauwa oti mo qai wilika na ivolanikalou mo rogoca kina na vosa ni Kalou. Au kila ni kevaka meda sasagataka meda sotava na kaukauwa ni matabete ni Kalou ki na noda bula, eda na vakalougatataki. Ena yaca i Jisu Karisito, emeni.