Pōpoaki mei he Kau Taki Fakaʻēliá
Ko e Hā Pē Meʻa Ke Faí
Ko e konga lahi ʻo ʻeku fiefia ʻi he kei siʻí ʻoku lava ke tupu ia mei he tākiekina lelei ʻa ʻeku faʻē kātaki mo ʻofá. Naʻá ne faʻa pehē ne u maʻu ha ʻulungaanga naʻe fuʻu “loto-lahi.” Naʻá ne faʻa sipela foki ia ko e L.O.T.O-F.E.F.E.K.A. ʻI heʻetau hoko ko e mātuʻá, ʻoku lava ke tau faʻa fehuʻi ʻi he taimi ʻe niʻihi pe ʻoku ʻi ai nai ha faʻahinga ola ʻo e ivi tākiekina ʻoku tau maʻú ʻi heʻetau fānaú? Naʻá ku tupu hake ʻi he Siasí mo kau ʻi he kotoa ʻo hono ngaahi polokalamá. Naʻá ku maʻu ʻa e ongo lakanga taulaʻeiki Faka-ʻĒloné mo e Faka-Melekisētekí1 ʻi he ongo taʻu motuʻa totonu pea maʻu hoku tāpuaki fakapeteliaké kimuʻa ha ngāue fakafaifekau taimi kakato. Naʻe ʻi he lolotonga ʻo ʻeku ngāue fakafaifekaú ne iku tāfataha ai ʻa e ngaahi ivi tākiekina tokoni kotoa pē ʻi heʻeku moʻuí ki hano fakaake ʻeku ongoʻi hoku fatongia ki he ʻOtuá2. Ne u vēkeveke ke hū ki he malaʻe ʻo e ngāue fakafaifekaú, ka ko e meʻa moʻoní naʻe fakangatangata ʻeku taukei ʻi he founga ki hono akoʻi ʻo e ongoongoleleí, ʻa ia ne fakahaaʻi ai foki e ʻikai loloto ʻeku ʻilo mo e mahino ki he ongoongoleleí.
ʻI hono ʻiloʻi ʻo ʻeku ngaahi taʻefeʻungá, ne u kamata laukonga ʻi he faingamālie kotoa pē mo fakafonu ʻeku ʻahó ʻaki e ako mo e fakalaulauloto. Naʻá ku fakalaulauloto ʻi he faʻa lotu ʻa e meʻa ne u laú pea ne fuʻu mātuʻaki fakamaama mo fakamahino. Ne ʻi he lolotonga ʻo e taimi ko ʻení ʻa e kamata ke u tupu hake ki he ʻEikí3. Naʻe kamata ke tuʻu maʻu ʻi hoku lotó ha fakafetaʻi maʻa hoku Fakamoʻuí peá ne fakaʻatā ke u vakai ki he meʻa ne fakamatalaʻi ʻe he Tuʻi ko Penisimaní ko e māfimafi ʻo e ʻOtuá mo hoku taʻeʻaongá4. Ne u kamata ke manatuʻi e meʻa kotoa pē ne akoʻi heʻeku faʻeé5. Naʻá ku ongoʻi ha fuʻu liliu lahi ʻi hoku lotó, neongo pē ne u hoko ko ha mēmipa mālohi ʻi he kotoa ʻo ʻeku ngaahi taʻu ʻo e kei talavoú6 pea ʻi he fai fakamaʻa ʻo e Fakalelei ʻa Sīsū Kalaisí ne u toe fanauʻi foʻou7.
ʻE lava ke tau takitaha haʻu ke ʻilo ki he nāunau ʻo e ʻOtuá8 pea aʻusia ʻa e fuʻu liliu lahi ko ʻeni ʻo e lotó9. ʻO tatau ai pē mo e loto foʻou ko ʻení, ʻoku fakamanatuʻi mai kiate kitautolu ʻa e fakamatala ʻa e Tuʻi ko Penisimaní, ʻa ia ʻoku tau kei hoko pē ko ha “kakai taʻetaau.”10 ʻE lava ke ngali ongo fefeka nai ʻa e leá ni, ka ko ha fakatātā ia ʻo ʻetau pēpē fakalaumālié pea mo ha fakamanatu ʻo ʻetau fakafalala ki hotau Fakamoʻui ko Sīsū Kalaisí ʻa ia ʻoku māfimafi ke fakamoʻuí11. Ko e kī ke nofoʻia maʻu pē ʻa Hono laumālié ʻia kitautolú ko ʻetau lotu maʻu pē ʻi he kole tāumaʻu, mo e fakafalala ʻi he Fakalelei ʻa e Fakamoʻuí12. Ko e feinga ki he haohaoá ko ha founga ia ʻoku fie maʻu ki ai e liliú ʻa ia ʻoku hoko ia ʻi he ʻalu ʻa e taimí. He ʻikai lava ke tau kei tuʻu maʻu fakalaumālie ʻi he taimi ʻoku tau feinga mālohi ai ki he haohaoá13 ʻo fakafou ʻi he mālohi ʻo e Fakalelei ʻa Sīsū Kalaisí.
ʻOku tuku makehe ʻa e kau faifekau taimi kakató ki ha ʻātakai ʻoku tokoni ki he Laumālié. ʻE lava ke hoko ʻa e taimi ko ʻeni ʻo e tāfataha ki he ngāue tokoní ko ha fakavaveʻiʻanga ki he fakalakalaka lahi ʻi he tupulaki fakalaumālié mo hoko ia ko ha tāpuaki lahi ʻi heʻenau moʻuí mo kinautolu ʻoku nau tokoniʻí. Kuo tau fakamoʻoni kotoa ki he ngaahi faikehekehe ʻi hotau ngaahi foha mo e ngaahi ʻofefine ne fononga atu, pea foki mai kuo nau maʻu mo fakahā ʻi he taimí ni ʻa e ʻaʻeva mo e lea ʻi he anga faka-ʻOtuá14. Kae kehe, ko e tokolahi taha ʻo kitautolú ʻoku nofo ʻi tuʻa ʻi he tuʻunga fakalaumālie ʻo ha ngāue fakafaifekau taimi kakato. ʻOku lava ʻe heʻetau taimi tēpile moʻumoʻua ki he ngaahi fatongia mahuʻinga fakaʻahó ke hiki ʻetau tokanga mei he meʻa ʻoku mahuʻingá, ki he meʻa ʻoku ʻikaí. Naʻe pehē ʻe Palesiteni Nalesoni “ʻI heʻetau feinga ke hoko ko e kau ākonga ʻa Sīsū Kalaisí, ʻoku fie maʻu ke lahi ange e taumuʻa ʻo ʻetau feinga fanongo kiate Iá. ʻOku fie maʻu ha ngāue ʻiloʻi pau mo hokohoko ke fakafonu ʻetau moʻui fakaʻahó ʻaki ʻEne folofolá, ʻEne ngaahi akonakí, mo ʻEne ngaahi moʻoní”.15
ʻOku totonu ke tau feinga ʻi heʻetau hoko ko e kakai fakafoʻituitui mo e fakafāmilí ke ngaohi hotau ʻapí ko ha hūfangaʻanga fakalaumālie. ʻI hono fakahoko iá, ʻe vaivai ange ʻa e mālohi ʻo e filí ʻi heʻetau moʻuí16. Ko hono fakaleleiʻi hotau ngaahi ʻapí ke nofotaha ʻi he ako ʻo e ongoongoleleí17, ʻe fokotuʻu lelei maʻu pē ai kitautolu ʻi he hala ʻo e fuakavá. ʻE lava ke ʻomai heʻetau lele ʻi he tafaʻakí ʻo mamaʻo tatau mo e lōloa hotau umá mei he hala [fuakavá] ha ongo hala ʻo ʻetau tuʻunga fakalaumālié mo fakaʻikaiʻi ʻia kitautolu pē ʻa e mālohi ʻo e anga faka-ʻOtua, ʻoku fakahā fakafou ʻi he kau ki he ngaahi ouau ʻo e lakanga fakataulaʻeikí mo e temipalé18. ʻI hono talanoaʻi, fakafiefiaʻi mo malangaʻi ʻo Kalaisi19 ʻi hotau ngaahi ʻapí fakafou ʻi he naunau fakalēsoni ʻo e Haʻu, ʻo Muimui ʻIate Aú, ʻe fakamālohia e ngaahi uoua ʻo ʻetau tuí20 pea ʻe tākiekina ʻetau ngaahi fili fakaʻahó ʻi heʻetau feinga ke fakatupulaki hotau ivi malava fakafoʻituitui ke maʻu mai ha fakahaá21. ʻI heʻetau fononga ʻi he ngaahi fehulohulai fefeka ʻo e moʻuí, te tau lava ke maʻu ha fakanonga ʻi he palōmesi ʻa e Fakamoʻuí, “ʻE ʻikai te u tuku ke tuenoa ʻa kimoutolu; te u haʻu kiate kimoutolu.22”
ʻOku kau ʻi he lotu sākalamēnití ha kole ki he ʻOtuá, ke ʻiate kitautolu maʻu ai pē Hono laumālié23 pea kuo teʻeki ha taimi ʻe hulutuʻa pehē ai hono fie maʻu ke ʻilo e founga ʻoku folofola mai ai ʻa e Laumālié kiate kitautolú ka ko e taimí ni”24. Fakatauange ke tau takitaha kiʻi mālōlō, fakalaulauloto mo fakahoko ʻa e ngaahi fakatonutonu ʻoku fie maʻu ʻi heʻetau ngaahi moʻuí ke malava ʻa e Laumālie Māʻoniʻoní ke nofo ʻiate kitautolu mo ʻi hotau lotolotongá. Tuku ke tau fai ha meʻa pē ke faí ke tataki ai ʻa e Laumālie Māʻoniʻoní, fakafiemālie mo akoʻi kitautolu ʻi he ʻātakai ʻo e ʻapi kuo tau feinga ke faʻu Maʻaná.