’A pi’i ia pāpā
Mai te mea e ta’ahi pūai au, ’ua feruri ’o Yu, e nehenehe au e tae i te fare nā mua a’e a ī ai te purūmu i te pere’o’o.
« ’A ’oa’oa maitai na, nō te mea e arata’i atu na vau ia ’outou » (Te Parau Ha’api’ira’a ’e te mau Parau Fafau 78:18).
’Ua haere mai ’o Yu i rāpae i te fare ha’api’ira’a i ni’a i te aroa harera’a ta’ata ’ua ī i te ta’ata. ’Ua ī roa tōna upo’o i te mau nūmera nō tāna ha’api’ira’a i muri a’e i te fare ha’api’ira’a. ’Ua rū noa te ta’ata i te haere nā reira ’e tō rātou fare amararā. ’Ua topa vitiviti te ūa rahi e ’ua puru roa te purūmu.
’Ua haere mai te hoa o Yu, ’o Lin, i rāpae i pīha’i iho iāna. « E tano ’oe e pi’i i tō ’oe pāpā nō te haere mai e ti’i ia ’oe » te parau ïa a Lin. « ’Ua parau ’o Zhang, te vaipu’ehia ra nā te tahi mau vāhi o te ’oire ».
« E nehenehe au e ho’i i te fare o vau ana’e »
« ’A hi’o na i te pape » ! Te parau ra o Lin ma te fa’atoro i ni’a i te pape e tahe pūai ra i roto i te ’āpo’o.
’Ua huru ’ē ri’i o Yu i te hō’ē taime. ’Ua tano ānei ’o Lin ? Penei a’e e ti’a iāna ’ia pi’i i tōna pāpā nō te fa’ho’i iāna i te fare hou a vaipu’ehia ai nā ni’a i te purūmu. Terā rā, ’ua tatama’i ri’i ’ōna e o pāpā i napo ra, ’e te vai noa ra ā tōna riri. ’Aita ’oia i hina’aro e ani i te tauturu i tōna pāpā.
’Ua tātara ’o Yu i tōna pere’o’o ’e ’ua aroha ia Lin. Mai te mea ē, e fa’aitoito vau i te ta’ahi, tōna ïa mana’o, e tae au i te fare nā mua a’e i te pape pu’e i ni’a i te purumu.
’Ua ta’ahi ’oia ma te itoito, terā rā, ’aita i maoro, ’ua to’eto’e roa tōna nā rima, ’ua puru roa tōna ’ahu, ’e ’ua rohirohi roa ’oia. ’Ua tae fa’ahou mai ra te mana’o ē, e pi’i ia pāpā. Nō roto mai ānei te mana’o i te Vārua Maita’i ra ? Te mau misiōnare tei bāpetizo iāna, ’ua parau rāua ē, e nehenehe te Vārua Maita’i e riro ’ei arata’i nōna. ’Ua hi’o o Yu i te ra’i. Nō te ’ere’ere o te ra’i, ’aita e nehenehe iāna ’ia ’ite i te ni’ara’a o te mau fare. Terā rā, te vai noa ra tōna riri i tōna pāpā.
’Ua ha’amo’e o Yu i te reira mana’o ’e ’ua ta’ahi noa i te pere’o’o. ’Ua ’ōpani te mau fatu fare toa i tā rātou fare toa. ’Ua tietie te ta’ata i tā rātou mau tauiha’a i te mau tahua i ni’a. ’Ua ’ite atu ’o Yu i te hō’ē metua vahine te tura’i ra i tāna nā tamari’i e piti nā ni’a i te pape i roto i te hō’ē poti urina na’ina’i.
I teienei, ’ua teitei roa mai te pape i ni’a a’e i tōna fatira’a ’āvae, e’ita tā Yu e nehenehe fa’ahou e ta’ahi i tōna pere’o’o. ’Ua pou ’oia i raro ’e ’ua tūra’i. ’Ua taere roa paha nō te pi’i ia pāpā i teienei, ’e te tāmau noa ra te ūa i te topa. ’Ua haruru te patiri ’e ’ua pa’a’ina te uira i ni’a a’e iāna. ’Ua mata’u o Yu. ’E ’ua rohirohi roa ho’i ’oia ! ʼUa hiʼo ’oia i mua. E mea ātea roa ā te fare. ’Āhani hoa ’oia ’aita i tau’a ’ore i te Vārua Maita’i nō te hō’ē noa mana’o ma’au.
’Ua fa’aea o Yu nō te fa’aoti i te hō’ē pure. ’Aita tāna e nehenehe e fa’aro’o i tōna reo i raro a’e i te ūa ’e te patiri, terā rā, ’ua ’ite ’oia ē, e nehenehe te Metua i te ao ra e fa’aro’o mai iāna.
« Te Metua i te ao ra », te pure ïa a Yu. « ’A tauturu mai iā’u ’ia tae au i te fare ma te maita’i ». I te otira’a tāna pure, ’ua roa’a iāna te pūai e nava’i nō te haere.
I te pae hope’a, ’ua ti’a ia Yu ’ia ’ite i tōna fare i ni’a i te aivi. Ma te to’eto’e, te rohirohi, ’e te hō’ē tia’a tei mo’e, ’ua ta’uma o Yu i ni’a i te aivi. ’Ua ’ite ’oia ia pāpā te tīa’i ra iāna i rāpae. ’Ua horo mai o pāpā i raro i te aivi nō te fārerei iāna, ma te ha’apahi i te pape a horo ai ’oia.
I te taera’a mai ’o papa i pīha’i iho iāna, ’ua tauahi ’oia ia Yu. « ’Ua ha’ape’ape’a roa vau ! » Te parau ïa a pāpā. « ’aita ’oe i pi’i mai iā’u ! »
« ’Ua mana’o vau ē, ’ua ’ino’ino tāua te tahi i te tahi » te parau ïa a Yu.
« E tauturu hoa vau ia ’oe, noa atu to’u riri » I muri iho ’ua rave ’oia i te pere’o’o ta’ata’ahi o Yu e ’ua tūra’i e tae roa atu i ni’a i te aivi.
Noa atu te haruru patiri nā rōpū i te mau fare teitei ’e te ūa rahi, ’ua tupu te mana’o māhanahana i roto i te ’ā’au o Yu. ’Ua tupu te hau e te pārurura’a a pe’e noa ai ’oia ia papa e tae atu i te fare.