Nāhea vau e upo’oti’a ai i ni’a i te mau mana’o mo’emo’e ?

Fa’ahotu i tō ’outou mau tāreni

E upo’oti’a vau i ni’a i te mau mana’o mo’emo’e nā roto i te fa’ahotura’a i tō’u mau tāreni, hō’ē ānei mauha’a ’upa’upa, hō’ē ānei ’ohipa auhia, ’e tē vai atu ra. E tauturu te reira ia ruri ’ē ia ’outou i tō ’outou mana’o mo’emo’e, ’e e mea pinepine e mo’e roa te reira. E arata’i ato’a te reira ’ia ’imi i te tahi atu mau ta’ata o tē tū’ati i tō ’outou mau hina’aro.

Steven H., 12 matahiti, New Mexico, USA

ʼImi i te māramarama

Te ’imi nei au i te pāturura’a, te fa’aitoitora’a, ’e te here o te Metua i te ao ra ’e te Vārua Maita’i nō te hōro’a mai iā’u i te hau, te tīa’ira’a, ’e te pūai, ’ia feruri māite, ’ia pure, ’e ’ia tai’o i te mau pāpa’ira’a mo’a. Mai tei parauhia i roto i te 3 Nephi 11:11, o Iesu Mesia « te māramarama ’e te ora o te ao nei ». ’Ua haere mai ’oia nō te ti’avaru i te mau pouri ato’a.

Andrea B.,18 matahiti, Zulia, Venezuela

Toro i te rima i te mau hoa ’e i te ’utuāfare

’Ia tupu ana’e te mana’o mo’emo’e i roto iā’u, e mea au nā’u ’ia toro i te rima i tō’u mau hoa ’e te ’utuāfare ; e fa’atupu mau te reira i te ’oa’oa i roto iā’u. E hi’o vau i te mau ha’amaita’ira’a i roto i tō’u orara’a ’e e ha’amāuruuru vau i te Metua i te ao ra nō te mau mea e rave rahi tāna i hōro’a a’e nā mai iā’u !

Talli N., 16 matahiti, Oregon, USA

’A ha’amana’o i te fa’anahora’a a te Atua

’Ia ’ite mai ’outou ē, e mea faufa’a roa tātou ’eiaha rā ’ia mo’emo’e. E vai noa te Vārua Maita’i i roto ia tātou, ’e ’ua ’ite te Atua ē, e aha tō tātou fifi. ’Ua fārerei a’e na te Fatu i te mau tāmatara’a ’e te mau ’arora’a ato’a tā ’outou e fa’aruru nei. Hō’ē o te mau mea faufa’a roa a’e e tupu mai i roto ia tātou i te tāhuti nei, o te ’oa’oa ïa, e’ita rā e roa’a ia tātou te ’oa’oa mai te mea ē, ’aita e ’oto (a hi’o 2 Nephi 2:11). ’A pure i te Atua ’e a ani i te tauturu ; e’ita ’oia e fa’aru’e i te hō’ē a’e o tātou.

Brock S., 17 matahiti, Utah, USA

’A ti’aturi i te Fatu !

E mea teimaha mau ’ia fa’aru’e i te ’āi’a nō te haere i Beresiria nō tā’u misiōni. E mea iti roa tō’u ’ite i te reo ! Terā rā, ’ua ha’api’i mai au ē, mai te mea ē, tei roto te Vārua o te Fatu ia ’outou, e’ita roa te mana’o mo’emo’e e tupu i roto ia ’outou. ’Ua ’ite ’oia ia ’outou ’e tauturu ’oia ia ’outou i te mau taime ato’a. ’A ti’aturi iāna !

Elder Joseph Tolen, 20 matahiti, Misioni nō Brazil Campinas