’Ua fa’aho’i fa’ahou ’oia iā’u i tō’u vaira’a
’Ua fa’aro’o tō’u hoa ē, te ma’ihia ra vau, e ’ua hāpono mai ’oia i te hō’ē ha’uti puzzle hā’mani-ta’a-’ē-hia nō’u.
Faʼahōhoʼaraʼa nā Joshua Dennis
’Ua mana’o noa vau ē, e ta’ata tino maita’i au. Nō reira, ’ua hitimahuta vau i te hō’ē po’ipo’i i tō’u ti’ara’a mai i ni’a, ’ua pa’ari roa tō’u ouma, fātata i te pa’a’ina. ’Ua fa’ahoro-rū-hia vau i te fare ma’i, terā rā, i muri a’e e rave rahi hora hi’opo’ara’a, ’aita i ’itehia te fifi i te mau taote. ’Ua fa’aho’i rātou iā’u i te fare, noa atu ē, e māuiui rahi tō’u. Nō reira ’ua ha’amata ihora te hō’ē tāmatara’a nō te roara’a e hitu ’āva’e o te mau haerera’a i ō te taote, te tāpe’a-ra’a-hia i roto i te fare ma’i, ’e te māuiui fāito ’ore ’aitā vau i ’ite a’e nei i roto i tō’u orara’a.
’Ua ha’amata a’era vau i te hepohepo. ’Ua fa’aru’e au i tā’u mau ha’api’ira’a tuarua ’e ’ua haere e fa’aea i pīha’i iho i tō’u nā metua. ’Aita tā’u e nehenehe e haere nā muri iho i tō’u mau hoa. E mea māuiui roa nō’u ’ia haere e rave i te mau mea e auhia e au. ’Ua feruri au ē, te mau mea ato’a i ’ana’anataehia e au— tō’u mau hina’aro, tō’u mau auta’atira’a, tō’u mau tāreni—’ua fatifati roa ïa, ’e i teie nei, mai te huru ra ē, te mau hu’ahu’a nō tō’u huru mātāmua ra, e’ita ïa e ti’a fa’ahou ’ia fa’aho’i i muri. ’E ’ua ha’amata a’era vau i te uiui ē : E mea nāhea i ti’a ai i te Metua i te ao ra ’ia vaiiho i te reira ’ia tupu i ni’a iā’u ? ’Aita ānei ’oia i here iā’u ?
I muri a’e i te tahi fa’ahou fārereira’a au ’ore ’e te māuiui i ō te taote, tā’u noa i hina’aro e rave maori rā, ’ia ha’afefe i ni’a iā’u iho ’e ’ia ta’i. Terā rā, i tō’u taera’a mai i te fare, te ’ite nei au i te hō’ē mea huru ē i ni’a i te taupe’e : hō’ē āfata tia’a tahito mahaehae, ’ua tapiripirihia i te ripene tāpiri, ’e ’ua fa’ataehia mai na’u.
Tē fa’a’ite ra hō’ē rata i ni’a i te āfata ē, nā te hō’ē o tō’u mau hoa i hāpono mai i terā āfata. ’Ua fa’aro’o ’oia ē, tē ma’ihia ra vau, ’e ’ua hina’aro ’oia e fa’aitoito iā’u. I tō’u ’īritira’a i te āfata tia’a, ’ua ī roa i te hu’ahu’a polystyrène. E ha’uti puzzle tei hāmani-ta’a’ē-hia nā’u.
’A tapiripiri ai au i te mau puzzle, ’ua ha’amata vau i te ta’i. ’Ua fa’a’ite mai te puzzle i tō’u i’oa, hā’atihia i te mau parau poro’i marū o te here ’e te fa’aitoito. ’Ua feruri a’era vau ē, terā mau tuha’a fatifati tō’u, te fa’aho’i-fa’ahou-hia ra ïa i te vaira’a, a tapiripiri ai au i te hōro’a a tō’u hoa.
’Aita i maoro i muri a’e, ’ua ha’amata vau i te ’amu i te hō’ē rā’au tei fa’aiti i tō’u mau tāpa’o ’e tei tauturu i te mau taote ’ia rave i te mau hi’opo’ara’a. E ma’i varavara tō’u terā rā e nehenehe e rapa’au, ’e mai te mea e tano maita’i te rā’au, e nehenehe au e ora maita’i fa’ahou.
’A haere noa ai tō’u tino i te maita’ira’a, ’ua ’ite au ē, e’ita roa atu e mo’ehia iā’u te mau mea tā’u i ha’api’i mai. Maoti te hōro’a maita’i a tō’u hoa, ’ua ’ite au ē, ’ua herehia vau, ’e ’aita te Metua i te ao ra i ha’amo’e iā’u. I muri a’e e rave rahi ’āva’e ha’ape’ape’ara’a, maoti te maita’i o te hō’ē hoa, ’e te here o tō’u Metua i te ao ra, ’ua hō’ē fa’ahou vau.◼