Nāhea te ’ite-ra’a-hia iā’u te fa’aorara’a i te hāmani-’ino-ra’a i te pae apeni
Ua fāri’i au i te moemoeā ri’ari’a. Terā rā, i muri mai, ’ua ha’api’i mai au ē, i roto i tō’u mau taime teimaha, e nehenehe au e ti’aturi i ni’a i tō’u Fa’aora.
Hōho’a nō roto mai i te Getty Images, fa’a’ohipahia nō te fa’ahōho’ara’a, e mau ta’ata nō te fa’ahōho’a
’Ua ha’amata tō’u moemoeā ri’ari’a i te hitura’a o tō’u matahiti ’e ’ua fa’aipoipo fa’ahou tō’u māmā. ’Ua au roa māua i tō’u metua tāne ho’ovai ’āpī. E ta’ata maita’i roa ’oia, ’e e mea hō’ē maita’i ’oia ’e tō mātou ’utuāfare. ’Ua ’ite pāpū vau i te pārurura’a ’āti a’e iāna. Mea maita’i te mau mea ato’a, tae roa i te hō’ē mahana, te ’ohipa ra te mau ta’ata ato’a, ’ua hāmani ’ino ’oia iā’u i te pae ’āpeni.
’Aita vau i ta’a e aha tāna i rave i ni’a iā’u. ’Ua ri’ari’a vau, te ta’a ’ore, ’e te ha’amā. Terā rā, ’ua ri’ari’a vau ’ia parau i te hō’ē ta’ata. ’Ua feruri au ē, e fa’a’ino te reira i te ’oa’oa ’ite-’āpī-hia o tō’u ’utuāfare, ’e ’aita hō’ē ta’ata e ti’aturi mai iā’u. Nō reira, ’ua fa’aoti au e māmū noa.
Hō’ē noa taime tōna rave-’ino-ra’a iā’u, terā rā, ’ua vai noa te reira ma te teimaha i roto i tō’u ferurira’a. I te pae hope’a, nō te rahi o tō’u ahoaho ’ia ’ite te ta’ata, nā roto i tō’u māuiui, i tā’u parau huna tā’u i tāmata noa i te huna i te parau mau nā roto i te vai-hoa-noa-ra’a ’e tō’u metua ho’ovai tāne. ’E maita’i ta’a ’ē mau tōna i ni’a iā’u, e nō reira, ’ua ha’amata fa’ahou vau i te au iāna.
Terā rā, i muri iho, ’ua ’ino roa atu te ’ohipa. I te ha’amatara’a o māmā i te rave i te ’ohipa i te pō, ’ua ha’amata tō metua ho’ovai tāne i te hāmani ’ino tāmau iā’u. ’Aita hō’ē tā’u e rāve’a. ’Ua hina’aro vau e fa’a’ite, terā rā, e ta’ata auhia tō’u metua ho’ovai tāne, e ’ua feruri au ē, e ti’aturi te mau ta’ata ato’a iāna. Nō reira, i te pō, a vai ai au o vau ana’e, ’ua tāparu vau i te Atua ’ia tauturu mai iā’u ’ia tāpe’a noa i tā’u parau huna.
Te paraura’a
I te hō’ē mahana, ’ua fa’aea te hāmani-’ino-ra’a. ’Aita roa atu vau i ’ite ē, nō te aha i fa’aea ai. Noa atu ē, ’aita ’oia i ha’amauiui fa’ahou iā’u, ’ua vai noa tō’u ha’amā ’e te mana’o ē, e ta’ata repo vau. ’Ua au ’ore au iā’u iho. I te tahi taime e uiui au iā’u iho ē, e ’ere ānei te pohe i te mea ’ōhie a’e i teie huru tō’u. ’Ua vai noa tō’u hina’aro ’ia fa’a’ite, e ri’ari’a rā tō’u i te ’ohipa e tupu mai ’ia ’itehia te parau mau.
’E i te hō’ē sābati i te fare purera’a, 14 matahiti tō’u i te reira taime, ’ua fa’aro’o vau i te hō’ē ha’api’ira’a nō ni’a i te ravera’a i te mau faotira’a rarahi. ’Ua fa’aitoito tō’u ’orometua ia mātou ’ia ha’apae i te mā’a ’e ’ia pure, ’e ’ua fafau mai ē, e ha’apūai te Atua ia tātou ’ia rave i te ’ohipa ti’a. I muri a’e i te purera’a, ’ua feruri noa vau i tāna i parau mai. ’Ua uiui noa vau ē, mai te mea ē, e ani au, e tauturu mau ānei te Atua iā’u ’ia fa’a’ite ?
’Ia po’ipo’i a’e, ’ua ha’apae au i te mā’a nō te fāri’i i te itoito ’ia fa’a’ite ia māmā nō ni’a i te hāmani-’ino-ra’a. ’Aita i ti’a iā’u ’ia fa’aro’o pāpū i te ha’api’ira’a nō te mea ’ua feruri noa vau e aha tōna huru ’ia ite ’oia. I tō’u taera’a i te fare, ’ua tupuhia vau i te ma’i rahi. ’Ua pure fa’ahou vau nō te ani i te pūai, ’aita rā vau i ineine nō te fa’a’ite iāna.
I te reira ahiahi, te fa’aineine ra o māmā i te mā’a, ’ua tāpiri atu vau i pīha’i iho iāna. ’Aita vau i ’ite ē, e aha te parau e parau, terā rā, i tō’u hi’ora’a i roto i tōna nā mata, ’ua ’itehia a’era iā’u te itoito nō te ha’amata noa i te paraparau. I te taime a ha’amata ai au i te parau, te mau mea ato’a tā’u i huna noa na i te roara’a e rave rahi matahiti, ’ua puehu mai i rāpae.
’Ua pārahi a’era māua o māmā i ni’a i te tōfa ’e ’ua ta’i-’amui a’era. I muri iho, ’ua fārerei māua i tō mātou peresideni āma’a ’e ’ua pi’i i te muto’i. ’Ua fa’ahapahia tō’u metua ho’ovai tāne nō te ’ohipa tāna i rave i ni’a iā’u, ’e ’ua fa’anahohia tō’u pārurura’a i tītauhia—eiaha vau e fārerei fa’ahou iāna.
Te ’ē’a o te fa’aorara’a
I te roara’a o taua taime ra, e mea fifi roa ’ia fa’ati’a fa’ahou i te feiā mana i te ’ohipa i tupu i ni’a iā’u, ’e te mau hoa ho’i e ani mai ra ē, tei hea tō’u metua ho’ovai tāne, terā rā, maoti te pāturura’a a tō’u ’utuāfare, e ’ere atura o vau ana’e. ’Ua tāhō’ē mātou i ni’a i te hō’ē tumu parau ’utuāfare ’āpī : « E ti’a iā’u te mau mea ato’a nei i te Mesia, tei tauturu mai iā’u ra » (Philipi 4:13). ’Ua pūpū ato’a mai te fēti’i i tō rātou here ’e te pāturura’a, ’e, i te roara’a o te tau, ’ua ha’amata māua i te ora ’āmui.
’Ua fārerei māua o māmā i te feiā ’aravihi, tei riro ’ei tauturu rahi ! Tō’u ta’ata ha’amāramarama, o te ta’ata mau ïa tā’u i hina’aro. ’Ua tauturu ’oia iā’u ’ia hāro’aro’a i te mau mana’o pe’ape’a ato’a e tupu ra i roto iā’u, ’e ’ua tauturu mai iā’u ’ia fa’aruru i tō’u mau ha’amana’ora’a ’ino. ’Aita roa atu vau i ’ite a’e ē, e māuiui rahi mau tō’u, tae roa atu i te taime a ha’amata fa’ahou ai au i te ’ite i te ora maita’i.
’Aita vau i mana’o ē, e ’ore te māuiui nā roto noa i tō’u fa’a’itera’a, terā rā, ’aita ato’a vau i ’ite i te rahira’a taime (’e te fa’a’oroma’i) e tītauhia nō te ora. Mea maoro tō’u feruri-noa-ra’a ē, e mea faufa’a ’ore au. ’Ua tītauhia iā’u ’ia ha’api’i fa’ahou i te here iā’u iho.
’Ua ’itehia iā’u te hau rahi a’e nā roto i te fāriura’a vau i ni’a i tō’u Fa’aora ’e tō’u Metua i te ao ra. Te ’itera’a ē, ’ua ’ite pāpū maita’i rāua i tō’u mau mana’o, nā te reira i hōro’a mai iā’u i te pūai ’e te ti’aturira’a. ’Ua turu’i au i ni’a iho ia rāua i roto i te mau taime teimaha. I te roara’a o te tau, ’ua ha’amata te mau ha’amana’ora’a i te morohi, ’e ’ua ’ite mau vau i te hau nā roto i te here o te Fa’aora.
Hō’ē o te mau tuha’a ho’ona roa a’e o te fa’anahora’a nō te fa’aorara’a, o te ’itera’a ïa ē, e ananahi nehenehe tō’u. I te taime a hāmani-’ino-hia ai au, ’aita i ti’a iā’u ’ia feruri ’e e roa’a tō’u orara’a mai tei mātarohia. ’Ua mana’o vau ē, ’ua ’ino hope roa vau. Terā rā, maoti te tauturu ’e te fa’aorara’a, ’ua ’itehia iā’u te mau mea tā’u i tīa’i maoro. ’Ua ha’amata vau i te fa’ati’a i tō’u ’ā’amu i te tahi atu mau tamāhine o tē mamae ato’a ra, ’e ’ua fa’aoti ato’a vau e tāvini i te hō’ē misiōni. Nā roto i te fa’a’itera’a i tō’u ’itera’a pāpū ia vetahi ’ē, ’ua ha’apūai te reira iā’u.
E ’ere nā te ’ohipa tā tō’u metua ho’ovai tāne i rave i ni’a iho iā’u e ha’apāpū i tō’u huru. ’Ua taui ’oia i tō’u orara’a e a muri noa atu, terā rā, te mā’iti nei au ’ia fa’a’ohipa i te ’ohipa tei tupu i ni’a iho iā’u nō te tauturu ia vetahi ’ē. E mea fifi noa ā te tahi mau mahana, nā roto rā i te mau mea ato’a, ’ua ha’apūai te Fatu iā’u, ’e ’ua ’ite au ē, e tāmau noa ’oia i te tauturu iā’u. ’Ua taui au mai te hō’ē ta’ata tei hāmani-’ino-hia ’ei ta’ata tei ora mai.