Te moni tuha’a ’ahuru
Te ora nei te ta’ata pāpa’i i Chihuahua, México.
’Ua ara ’oi’oi mai o Sofia. E mahana ta’a ’ē roa teie. Tē haere ra ’oia e ho’o i te pape monamona i te vāhi ho’oho’ora’a a tōna tatie ’e te tonton ! ’Ua hāmani tōna māmā i te hō’ē fa’ari’i rahi nō te pape monamona i nanahi ra.
’Ua hāmani o Sofía i te hoe tāpa’o. ’Ua pāpa’i ’oia « Pape monamona ! » i roto i te mau reta puātou ’e te re’are’a. ’Ua tāpiri ’oia i te reira i ni’a i te hō’ē ’aira’a mā’a na’ina’i. I muri iho ’ua parahi ’oia i raro nō te tīa’i.
’Aita i maoro te haere mai nei te hō’ē ta’ata. « E nehenehe ānei au e fāri’i i te hō’ē hāpaina ? » tāna ïa anira’a. ’Ua tu’u ’oia i te tahi moni i roto i te fāri’i.
« ’Oia mau » ! Te parau ïa a Sofía. ’Ua māni’i ’oia i te hō’ē hāpaina pape monamona.
’Ua haere marū noa mai te ta’ata e hi’o i te vāhi ho’oho’ora’a. E ’ua ho’o marū noa te ta’ata i te pape monamona au maita’i. ’Ua ma’iri te po’ipo’i ma te ’oa’oa. ’Aita i maoro, ’ua pau te pape monamona.
’Ua ueue o Sofia i tāna fa’ari’i moni. ’Ua aketekete te moni. E moni rahi tei roa’a iāna !
« Mea maita’i roa ! » Te parau ïa a pāpā.
Aitā i noa’a a’e nei ia Sofía te hō’ē fāito moni mai terā. « E ho’o vau i te hō’ē yo-yo ! »
’Ua ata o Pāpā. « ’Ua ’ite ānei ’oe e aha tā māua o māmā e rave ’ia roa’a ana’e tā māua moni ? »
’Ua tā’iri’iri o Sofía i tōna upo’o.
« E aufau māua i te tuha’a ’ahuru » te parau ïa a pāpā. « ’Ua hōro’a mai te Metua i te ao ra ia tātou i te mau mea ato’a. Te ani mai nei ’oia ’ia fa’aho’i tātou i te tahi mā’a tuha’a iti. E aufau tātou i te tuha’a ’ahuru nō te mea te here nei tātou iāna ».
’Ua ’ata’ata o Sofía. ’Ua hina’aro ’oia e fa’a’ite i te Metua i te ao ra ē, ’ua here ato’a ’oia iāna.
’Ua tauturu o pāpā ia Sofía ’ia tai’o i tāna moni. ’Ia tai’o ana’e ’oia hō’ē 10, e tu’u ’oia hō’ē toata i roto i te hō’ē vehi rata. ’Ua tauturu o pāpā iāna ’ia pāpa’i i te mau nūmera i ni’a i te hō’ē ’api parau uouo. ’Ua tu’u rāua i te ’api parau i roto i te vehi rata ’e te moni. I muri iho ’ua tāpiri te reira nō te ’ōpani. E hōro’a o Sofía i te reira i te ’episekōpo ra ananahi i te fare purera’a.
« E aha tō ’oe huru » ? Te anira’a ïa a pāpā ia Sofia.
« ’Oa’oa roa ! ’E te vai noa nei ā tā’u moni nō te hō’ē yo-yo ». ’Ua ’ite ’oia ē, ’ua ’oa’oa te Metua i te ao ra i tāna fa’aotira’a.