Mai te mea ē, e fifi tō’u i te pae ferurira’a, e nehenehe noa ānei au e tāvini i te hō’ē misiōni ?

’Ē. Te feiā ato’a « e hina’aro… i te tavini i te Atua, ’ua mā’itihia ïa… i te ohipa » (Te Parau Ha’api’ira’a ’e te mau Parau Fafau 4:3). Ihea tātou e tāvini ai, e mea iti a’e te faufa’a o te reira i te nāhea tātou ’ia tavini. ’E te hō’ē ta’ata e feruri ra e tāvini i te hō’ē misiōni, e hi’opo’ahia tōna ea i te pae ferurira’a.

Mai te mea ē, e hina’aro tō ’outou ’ia tāvini i te hō’ē misiōni, a paraparau i tō ’outou episekōpo. E nehenehe ’oia e tauturu ia ’outou ’ia ha’amata i te fa’anahora’a o te fa’ataera’a i te anira’a. Te hō’ē tuha’a o te reira fa’anahora’a o te fārereira’a ïa i te mau taote ’e i te tahi atu mau ’aivāna’a, e tae noa atu i te feiā fa’atere o te ’Ēkālesia ’e te mau metua. E ’ere teie mau hi’opo’ara’a nō te fa’ata’a ē, « ’ua nava’i ānei tō ’outou maita’i » no te Fatu, nō te tāuturura’a rā i te fa’ata’ara’a i te mau mā’itira’a maita’i a’e nō tā ’outou tāvinira’a.

Te hō’ē pi’ira’a nō te tāvini, e nehenehe te reira e tae mai i te mau huru ta’ata ato’a e hina’aro tō rātou ’ia tāvini. Te pi’ira’a i fāri’ihia e ’outou ’ia tāvini i te hō’ē vāhi ta’a ’ē ’aore rā, i roto i te hō’ē ravera’a ta’a ’ē, tei te huru ïa o te mau tupura’a. Te mau ta’ata e fifi tō rātou i te pae o te ea (tae noa atu i te ea o te ferurira’a ), ’ua ’īriti rātou i te tahi taime i teie ha’amāramaramara’a i roto i te parau anira’a, ma te feruri ē, e tauturu te reira ia rātou ’ia fāri’i i te pi’ira’a tā rātou e hina’aro. Terā rā, mai te mea ē, e fa’a’ite pāpū ’outou i te parau mau nō ni’a i tā ’outou parau nā te taote (tae noa atu i te ea i te pae ferurira’a), e ha’amaita’i te Fatu ia ’outou. Te hina’aro nei ’oia ’ia rave ’outou i te mau mea ato’a e ti’a ia ’outou ’ia rave nō te ha’amaita’i i tō ’outou ’ē’a. ’E e nehenehe ’outou e fāri’i tāmau noa i roto i te ’āua misiōni, i te hō’ē tuha’a rahi o te pāturura’a a te taote tā ’outou e fāri’i nei i te fare.