ការជួយកុមាររៀបចំខ្លួនសម្រាប់ពិធីបុណ្យជ្រមុជទឹក
យើងអាចប្រកបដោយការអធិស្ឋាន ប្រកបដោយចេតនា ហើយអត់ធ្មត់ ពេលយើងជួយកូនៗយើងឲ្យបោះជំហានតាមមាគ៌ានៃសេចក្ដីសញ្ញា ។
រចនារូបភាពដោយ ប្រាយអិន ប៊ីច
ការទទួលបុណ្យជ្រមុជទឹក និងការបញ្ជាក់ គឺជាព្រឹត្តិការណ៍សំខាន់ដ៏គួរឲ្យរំភើបសម្រាប់កុមារនៅក្នុងសាសនាចក្រ ។ ខណៈដែលកុមារជាច្រើនទន្ទឹងចាំពិធីបរិសុទ្ធទាំងនេះ វាក៏ជារឿងធម្មតាសម្រាប់កុមារដែលមានអារម្មណ៍ភ័យ ឬខ្លាចផងដែរ ។
ក្នុងនាមជាអ្នកនិពន្ធសម្រាប់ ប្រិយមិត្ត ជាទស្សនាវដ្ដីសាសនាចក្រសម្រាប់កុមារ ខ្ញុំបានឮរឿងរ៉ាវជាច្រើនអំពីកុមារដែលភ័យថា ពួកគេពុំទាន់ត្រៀមរួចរាល់សម្រាប់ធ្វើសេចក្ដីសញ្ញានេះ ។ អ្នកខ្លះព្រួយថា ពួកគេមិនមានទីបន្ទាល់រឹងមាំគ្រប់គ្រាន់ ។ ពួកគេខ្លះទៀតខ្លាចទឹក ។ ហើយពួកគេខ្លះទៀតមានអារម្មណ៍មានសម្ពាធជាខ្លាំងដើម្បីបានល្អឥតខ្ចោះ ។
នេះជារបៀបមួយចំនួនដើម្បីជួយដល់កូនៗរបស់អ្នកឲ្យមានអារម្មណ៍ថាបានរៀបចំ និងមានទំនុកចិត្តដើម្បីបោះជំហានបន្ទាប់ទៀតរបស់ពួកគេនៅលើផ្លូវនៃសេចក្ដីសញ្ញា ។
បង្រៀនដោយមានគោលបំណង
វាអាចងាយស្រួលក្នុងការគិតអំពីបុណ្យជ្រមុជទឹកថាជាពិធីឆ្លងមួយ ឬគ្រាន់តែជាអ្វីមួយដែលកើតឡើងពេលកូនរបស់អ្នកមានអាយុប្រាំបីឆ្នាំ ។ ប៉ុន្តែតាមពិតទៅ បុណ្យជ្រមុជទឹកគឺជាជម្រើសដ៏ពិសិដ្ឋ ដែលមានន័យថា ពួកគេត្រូវយល់ពីមូលហេតុដែលវាសំខាន់ ។ ការបង្រៀនពួកគេដោយចេតនា អាចជួយធ្វើឲ្យបុណ្យជ្រមុជទឹកកាន់តែមានអត្ថន័យ ( និងមិនសូវគួរឲ្យភ័យខ្លាច ) ។ បង្រៀនពួកគេពីវិធីដែលអ្នកចង់ឲ្យមនុស្សដទៃទៀតរៀនអំពីសាសនាចក្រពីមុនទទួលពិធីបុណ្យជ្រមុជទឹក ។
វាសំខាន់សម្រាប់យើងដើម្បីបង្រៀនកុមារអំពីសេចក្ដីសញ្ញាដែលពួកគេនឹងធ្វើនៅឯបុណ្យជ្រមុជទឹក ។ ហើយដំណឹងល្អនោះគឺ នេះមិនមែនជាអ្វីដែលយើងត្រូវ ( ឬគួរ ) ព្យាយាមធ្វើវាក្នុងពេលមួយយប់ ឬនៅក្នុងមួយសប្ដាហ៍នោះទេ ។ ការសិក្សាដំណឹងល្អដ៏ខ្ជាប់ខ្ជួននៅក្នុងគេហដ្ឋានរបស់អ្នក គឺជារបៀបដ៏ល្អបំផុតដើម្បីជួយកូនរបស់អ្នករៀបចំសម្រាប់បុណ្យជ្រមុជទឹក ។ ទោះជាយ៉ាងណា មានចំណុចពីរបីដែលមានប្រយោជន៍ជាពិសេស ដើម្បីផ្ដោតទៅលើពេលបុណ្យជ្រមុជទឹករបស់កូនអ្នកខិតជិតមកដល់ ៖
-
ពិភាក្សាដោយប្រើពាក្យសាមញ្ញៗ អំពីរបៀបដែលការទទួលបុណ្យជ្រមុជទឹកគឺមានន័យថា ការសន្យាដើម្បីធ្វើតាមព្រះយេស៊ូវគ្រីស្ទ ។
-
សូមអានអំពីបុណ្យជ្រមុជទឹកនៅក្នុងព្រះគម្ពីរ ដូចជា ម៉ូសាយ ១៨:៨–១០ ។ សូមពន្យល់ពីខទាំងនោះ ដើម្បីឲ្យកូនរបស់អ្នកយល់ ហើយអាចបង្រៀនគំនិតទាំងនោះត្រឡប់មកអ្នកវិញ ។ ឧទាហរណ៍ ក្មេងស្រីម្នាក់ដែលទើបតែទទួលបុណ្យជ្រមុជទឹកនៅរដ្ឋហាវៃ ស.រ.អា. បានពិពណ៌នា « ទទួលបន្ទុកគ្នាទៅវិញទៅមក » ថាជា « ជួយមនុស្សគ្រប់គ្នាពេលពួកគេត្រូវការជំនួយ » ។
-
សូមធ្វើឲ្យប្រាកដថានិយាយជាមួយពួកគេអំពីអំណោយទាននៃព្រះវិញ្ញាណបរិសុទ្ធ ហើយចែកចាយបទពិសោធន៍ដែលអ្នកមាន ពេលដែលព្រះវិញ្ញាណបរិសុទ្ធបានប្រទានពរដល់ជីវិតអ្នក ។
កុមារខ្លះអាចព្រួយអំពីបុណ្យជ្រមុជទឹក ដោយសារពួកគេមិនគិតថា ពួកគេមានទីបន្ទាល់រឹងមាំគ្រប់គ្រាន់ ។ សូមជួយកូនរបស់អ្នកឲ្យចងចាំពីអារម្មណ៍ល្អៗ ដែលពួកគេមានខណៈកំពុងធ្វើអ្វីដែលសប្បុរស ច្រៀងចម្រៀងកុមារ ឬនិយាយអំពីដំណឹងល្អ ។ សូមលើកទឹកចិត្តពួកគេឲ្យគិតអំពីរបៀបនានា ដែលពួកគេដឹងថា ព្រះវរបិតាសួគ៌ស្រឡាញ់ពួកគេ ។ សូមពន្យល់ថា ទាំងអស់នេះគឺជាការចាប់ផ្ដើមនៃទីបន្ទាល់មួយ ហើយថាទីបន្ទាល់របស់ពួកគេនឹងលូតលាស់ ពេលពួកគេបន្តធ្វើការជ្រើសរើសល្អៗ ។
បង្ហាញពីអ្វីដែលត្រូវរំពឹងទុក
ប្រសិនបើកូនរបស់អ្នកភ័យអំពីការទទួលបុណ្យជ្រមុជទឹក—ឬសូម្បីតែពួកគេហាក់ដូចជាមិនភ័យក៏ដោយ—វាអាចជាប្រយោជន៍ដើម្បីនិយាយអំពីអ្វីដែលត្រូវរំពឹងទុក ។ ចំណុចល្អដើម្បីចាប់ផ្ដើមគឺការរៀបចំពួកគេសម្រាប់ការសម្ភាស ដែលពួកគេនឹងមានជាមួយប៊ីស្សព ឬប្រធានសាខារបស់ពួកគេ ។ ការជួយកូនរបស់អ្នកឆ្លើយសំណួរទាំងឡាយដូចជា « ហេតុអ្វីបុណ្យជ្រមុជទឹកសំខាន់ ? » និង « តើការយកព្រះនាមរបស់ព្រះគ្រីស្ទដាក់លើខ្លួនកូន មានន័យដូចម្ដេច ? » អាចជួយពួកគេត្រៀមខ្លួនសម្រាប់ការពិភាក្សានេះ ។ ជួយកូនរបស់អ្នកឲ្យចាំថា ប៊ីស្សពគឺនៅទីនោះដើម្បីជួយពួកគេឲ្យរួចរាល់ មិនមែនដើម្បីសួរសំណួរល្បងពួកគេ ឬចោទសួរសំណួរដ៏ពិបាកៗនោះដល់ពួកគេទេ ។ ហើយចូរចាំថា អ្នកតែងតែអាចនៅកំដរកូនរបស់អ្នកបាននៅក្នុងការសម្ភាសនោះ បើចង់ធ្វើដូច្នោះ ។
រឿងមួយទៀតដើម្បីរៀបចំកូនរបស់អ្នក គឺអ្វីដែលត្រូវរំពឹងទុកខាងរាងកាយនៅថ្ងៃនៃបុណ្យជ្រមុជទឹក ។ បង្ហាញពួកគេពីរបៀបឈរនៅពេលពួកគេនៅក្នុងអាង ។ អ្នកថែមទាំងអាចអញ្ជើញអ្នកកាន់បព្វជិតភាពដែលនឹងធ្វើបុណ្យជ្រមុជទឹកឲ្យកូនអ្នកដើម្បីអនុវត្តចលនារាងកាយនៃការជ្រមុជទឹកពេលងើបចេញពីទឹក ដើម្បីឲ្យកូនរបស់អ្នកដឹងថាវាមានលក្ខណៈបែបណា ដែលត្រូវជ្រមុជទៅក្នុងទឹក ហើយងើបឡើងវិញនោះ ។ សូមពន្យល់ពីអ្វីដែលនឹងកើតឡើងនៅអំឡុងពិធីបញ្ជាក់ ។
បើកូនរបស់អ្នកភ័យខ្លាចពីការជ្រមុជទៅក្រោមទឹក សូមពិចារណាប្រកបដោយការអធិស្ឋាន ពីរបៀបដែលអ្នកអាចជួយពួកគេយកឈ្នះលើការភ័យខ្លាចនោះ កាលដែលបុណ្យជ្រមុជទឹករបស់ពួកគេខិតជិតមកដល់ ។ ប្រហែលជាអ្នក និងកូនរបស់អ្នកអាចមើលនរណាម្នាក់ផ្សេងទៀតទទួលបុណ្យជ្រមុជទឹក ដើម្បីឃើញថាវាមានរយៈពេលខ្លីណាស់ដែលពួកគេត្រូវនៅក្រោមទឹកនោះ ។ ប្រហែលជាអ្នក និងកូនរបស់អ្នកអាចហាត់បិទច្រមុះ ហើយជ្រមុជមុខអ្នកចូលក្នុងទឹកជាមួយគ្នាពីរបីវិនាទីម្ដង ។ ប្រហែលជាមាននរណាម្នាក់នៅក្នុងតំបន់របស់អ្នកដែលបង្រៀនកុមារហែលទឹក ដែលអាចមានដំបូន្មានខ្លះៗ ។ អ្វីក៏ដោយដែលអ្នកធ្វើ សូមប្រាកដថា អ្នកធ្វើវាដោយក្ដីស្រឡាញ់ និងអត់ធ្មត់ ។
កាលណាកុមារម្នាក់កាន់តែមានអារម្មណ៍ថាបានត្រៀមខ្លួនចំពោះភាពពិស្ដារអំពីខាងរាងកាយទាក់ទងនឹងបុណ្យជ្រមុជទឹកបានច្រើនប៉ុណ្ណា នោះពួកគេក៏នឹងកាន់តែអាចមានអារម្មណ៍ធូរស្រាល និងអាចផ្ដោតលើសេចក្ដីសញ្ញាខាងវិញ្ញាណដែលពួកគេនឹងធ្វើបានច្រើនប៉ុណ្ណោះដែរ ។
ផ្តោតលើវឌ្ឍនភាព មិនមែនភាពល្អឥតខ្ចោះទេ
ជួនកាល ប្រហែលជាដោយសារយើងនិយាយច្រើនអំពីគំនិតនៃការសម្អាតនៃបុណ្យជ្រមុជទឹក នោះកុមារយល់ខុស ហើយគិតថា ពួកគេបានល្អឥតខ្ចោះបន្ទាប់ពីពិធីបរិសុទ្ធហើយ ។ រឿងដ៏សាមញ្ញបំផុតមួយដែលយើងឮនៅក្នុង ប្រិយមិត្ត គឺការភ័យស្លន់ស្លោដែលកុមារម្នាក់ដកពិសោធន៍ ពេលពួកគេធ្វើកំហុសមួយជាលើកទីមួយបន្ទាប់ពីទទួលបុណ្យជ្រមុជទឹក ។ ការឈ្លោះជាមួយនឹងបងប្អូន ឬការភ្លេចធ្វើកិច្ចការផ្ទះ ធ្វើឲ្យពួកគេមានអារម្មណ៍ដូចជាពួកគេបានបំផ្លាញអារម្មណ៍ល្អជារៀងរហូត !
ក្នុងនាមជាឪពុកម្ដាយ និងថ្នាក់ដឹកនាំ វាចាំបាច់ណាស់ដែលយើងជួយកូនៗរបស់យើងឲ្យយល់ពីគោលការណ៍នៃការប្រែចិត្ត ។ តើកូនៗរបស់យើងយល់ថា ការស្គាល់កំហុសរបស់យើង និងការរៀនពីកំហុសទាំងនោះ គឺជាផ្នែកនៃរបៀបដែលយើងរៀន និងលូតលាស់នៅលើផែនដីនេះដែរឬទេ ? តើពួកគេដឹងថា ពួកគេអាចអធិស្ឋានដើម្បីបានការអត់ទោសនៅគ្រប់ពេលដែរឬទេ ? ហើយថាពេលដែលពួកគេទទួលទានសាក្រាម៉ង់រៀងរាល់ថ្ងៃអាទិត្យ ពួកគេធ្វើសេចក្ដីសញ្ញាទាំងនោះដែលពួកគេបានធ្វើនៅបុណ្យជ្រមុជទឹកជាថ្មី ? សូមថ្លែងទីបន្ទាល់ថា ឱកាសដើម្បីប្រែចិត្តគឺជាពរជ័យ និងជាអំណោយមួយ ។ បុណ្យជ្រមុជទឹកមិនមែនអំពីការបានល្អឥតខ្ចោះនោះទេ ប៉ុន្តែវាគឺអំពីការចូលក្នុងផ្លូវនៃសេចក្ដីសញ្ញា និងការបោះជំហានជាប្រចាំថ្ងៃដើម្បីក្លាយកាន់តែដូចជាព្រះយេស៊ូវគ្រីស្ទ ។
ការចាប់ផ្ដើមដ៏ស្រស់បំព្រង
ជំនួសឲ្យការមើលឃើញបុណ្យជ្រមុជទឹក និងការបញ្ជាក់ថាជាទិសដៅ យើងអាចជួយកូនៗយើងឲ្យឃើញវាថាជាការចាប់ផ្ដើមដ៏ស្រស់បំព្រងមួយ—ការចាប់ផ្ដើមនៃជីវិតថ្មីមួយ ជាសិស្សក្នុងសេចក្ដីសញ្ញារបស់ព្រះយេស៊ូវគ្រីស្ទ ។ មិនថាកូនរបស់អ្នកមានអារម្មណ៍រំភើប ភ័យ ឬទាំងពីរនោះទេ អ្នកអាចធ្វើឲ្យប្រាកដថា ពួកគេមិនដើរលើផ្លូវនេះតែម្នាក់ឯងឡើយ ។ ដោយការប្រកបដោយការអធិស្ឋាន ប្រកបដោយចេតនា ហើយអត់ធ្មត់ ពេលយើងជួយកូនៗយើងឲ្យបោះជំហាននេះទៅកាន់ផ្ទះនៅស្ថានសួគ៌របស់ពួកគេ ។