ចង្អុលផ្លូវយើងទាំងអស់គ្នាទៅកាន់ ព្រះយេស៊ូវគ្រីស្ទ

ជីវិតគឺជាដំណើរមួយ ។ ទស្សនាវដ្តី លីអាហូណា អាចជួយបាន ។

នៅជំនាន់ព្រះគម្ពីរមរមន ព្រះអម្ចាស់បានរៀបចំលីអាហូណាដើម្បីជួយដល់លីហៃ និងគ្រួសាររបស់លោកឲ្យធ្វើដំណើរទៅមុខ ។ លីអាហូណាគឺជា « ត្រីវិស័យ ដែលនឹងចង្អុលប្រាប់គេនូវផ្លូវត្រង់មួយទៅកាន់ដែនដីសន្យា » ( អាលម៉ា ៣៧:៤៤ ) ។

ដូចជាលីហៃដែរ យើងកំពុងធ្វើដំណើរ ។ យើងនឹងមានឧបសគ្គតូចធំ ។ ជួបថ្ងៃរះ និងខ្យល់ព្យុះ ។ មានសេចក្ដីសុខសាន្ដ និងការឈឺចាប់ ។ ប៉ុន្ដែឆ្លងកាត់អ្វីទាំងអស់ វាមានគោលបំណងដ៏ទេវភាពមួយ ដោយសារយើងមានសក្ដានុពលដ៏ទេវភាព ។ ព្រះវរបិតាសួគ៌របស់យើងមិនគ្រាន់តែសព្វព្រះទ័យឲ្យយើងត្រឡប់ទៅកាន់ទ្រង់វិញនោះទេ ទ្រង់ថែមទាំងសព្វព្រះទ័យឲ្យយើងកាន់តែក្លាយដូចជាទ្រង់តាមរយៈព្រះរាជបុត្រារបស់ទ្រង់គឺ ព្រះយេស៊ូវគ្រីស្ទទៀតផង ។ ប៉ុន្តែពេលខ្លះយើងត្រូវការជំនួយ ។

នៅក្រោមការដឹកនាំរបស់ព្យាការីដែលនៅរស់ ទស្សនាវដ្ដី លីអាហូណា នៅជំនាន់របស់យើងត្រូវបានរចនាឡើងដើម្បីជួយយើងឲ្យស្គាល់ផ្លូវ និងរបៀបដើរនៅលើផ្លូវនោះ ។ ការរៀនសូត្រ និងការរស់នៅតាមដំណឹងល្អរបស់ព្រះយេស៊ូវគ្រីស្ទផ្លាស់ប្ដូរយើង ។ ហើយពេលយើងបានឆ្លងកាត់វាលខ្សាច់ និងមហាសមុទ្ររបស់យើងផ្ទាល់ នោះយើងនឹងឃើញថា ការធ្វើតាមទ្រង់ពេលឆ្លងកាត់ទាំងថ្ងៃរះ និងខ្យល់ព្យុះបានអនុញ្ញាតឲ្យទ្រង់ធ្វើឲ្យយើងក្លាយជាអ្វីដែលទ្រង់តែងជ្រាបថា យើងអាចធ្វើបាន ។

សូមបន្តអានដើម្បីរៀនបន្ថែមទៀតអំពីទស្សនាវដ្ដី លីអាហូណាថ្មី ។

ទស្សនាវដ្ដីមួយ សម្រាប់គ្រប់ដួងចិត្ត និងគេហដ្ឋានទាំងអស់

មិនថាបងប្អូនមកពីប្រទេសស្លូវេនី ឬអេស្ប៉ាញ ប្រទេសម៉ាដាហ្គាស្កា ឬទីក្រុងម៉ាសាឈូសេតនោះទេ នេះគឺជាទស្សនាវដ្ដីសម្រាប់បងប្អូន ។ មិនថាបងប្អូននិយាយភាសាកូរ៉េ ឬគិរីបាទី មិនថាគេហដ្ឋានបងប្អូនធ្វើពីឥដ្ឋ ឬឬស្សី មិនថាបងប្អូនជ្រមុជទឹកកាលពី ៨០ ឆ្នាំកន្លងទៅ ឬម្សិលមិញនោះទេ ។ រៀបការហើយ នៅលីវ ចាស់ ក្មេង—ទំព័រទាំងនេះថ្លែងទៅកាន់បងប្អូន និងឆ្លុះបញ្ចាំងពីបងប្អូន ។ ទីបន្ទាល់របស់បងប្អូន បទពិសោធន៍របស់បងប្អូន ទីនៃសេចក្ដីជំនឿរបស់បងប្អូន ។ នោះជាពរជ័យដ៏អស្ចារ្យក្នុងការមានទស្សនាវដ្ដីទូទាំងសកលលោកមួយសម្រាប់មជ្ឈិមវ័យ ។ វាបង្រួបបង្រួមពួកយើង ហើយរំឭកយើងថា យើងទាំងអស់គ្នាគឺជាគ្រួសារទូទាំងពិភពលោកមួយ និងជាសាសនាចក្រទូទាំងពិភពលោកមួយ ។

ដូច្នេះ សូមមកចូលរួមនឹងយើង កាលយើងទាំងអស់គ្នាខិតទៅកាន់តែជិតនឹងព្រះយេស៊ូវគ្រីស្ទ ។ មួយលេខម្តងៗ មួយទំព័រម្ដងៗ ។ ដោយមានព្យាការី និងពួកសាវកដឹកនាំយើង ហើយដោយមានព្រះអង្គសង្គ្រោះដែលពេញដោយក្ដីស្រឡាញ់ចាំជួយយើង ។ ពួកយើងទាំងអស់គ្នា ។ រួមគ្នា ។

អ្វីត្រូវរំពឹង ពីទស្សនាវដ្ដី លីអាហូណា ថ្មី

សារលិខិតមកពីពួកព្យាការី និងសាវក

ទស្សនាវដ្ដី លីអាហូណា នឹងបង្ហាញសារលិខិតនានាមកពីថ្នាក់ដឹកនាំសាសនាចក្រឲ្យកាន់តែទាន់ពេលវេលា ។ សារលិខិតទាំងនេះ ទាំងជាឯកសារបោះពុម្ព និងនៅលើអ៊ីនធឺណិត នឹងចង្អុលបង្ហាញយើងទាំងអស់គ្នាទៅកាន់ព្រះអង្គសង្គ្រោះ ។

ការគាំទ្របន្ថែមទៀតសម្រាប់សមាជិកទាំងអស់

ពីមុនមក សមាជិកមួយចំនួនបានទទួលទស្សនាវដ្ដីនេះតែពីរបីដងប៉ុណ្ណោះក្នុងមួយឆ្នាំ អាស្រ័យលើភាសារបស់ពួកគេ ។ ឥឡូវនេះ ទស្សនាវដ្ដីសាសនាចក្រទូទាំងសកលលោកចំនួនបី នឹងបោះពុម្ពរាល់ខែ ឬរាល់ពីរខែម្ដងក្នុងភាសារបស់សមាជិកប្រហែលជា ៩៧ ភាគរយ ។

មាតិកាឌីជីថលបន្ថែមទៀត

ដើម្បីជួយបងប្អូនឲ្យទទួលបាននូវមាតិកាដ៏បំផុសគំនិតដែលបងប្អូនចង់បាន យើងនឹងផ្ដល់វាតាមរបៀបបន្ថែមទៀតដែលបងប្អូនចង់បាន ។ សូមរកមើលបទពិសោធន៍ដែលបានកែលម្អជាឌីជីថលនៅលើគេហទំព័រ liahona.ChurchofJesusChrist.org នៅក្នុងកម្មវិធីការរស់នៅតាមដំណឹងល្អ និងកម្មវិធីបណ្ណាល័យដំណឹងល្អ តាមរយៈអ៊ីម៉ែល និងជម្រើសផ្សេងៗទៀតដែលនឹងមាននៅពេលក្រោយទៀត ។

ការរៀនសូត្រដំណឹងល្អដែលផ្តោតលើគេហដ្ឋាន

រាល់ខែយើងនឹងចែកចាយបទពិសោធន៍ សកម្មភាព និងការបង្រៀនទាំងឡាយដើម្បីជួយពួកបរិសុទ្ធថ្ងៃចុងក្រោយឲ្យរៀនដំណឹងល្អនៅតាមគេហដ្ឋាន ហើយបង្រៀនវាដល់កូនៗ និងមនុស្សជាទីស្រឡាញ់របស់ពួកគេ ។

រឿងពិតមកពីសមាជិកពិត

កាលបងប្អូនអានបទពិសោធន៍ដែលលើកតម្កើងឲ្យមានសេចក្ដីជំនឿ មកពីសមាជិកទាំងអស់ទូទាំងពិភពលោក នោះសេចក្ដីជំនឿរបស់បងប្អូនផ្ទាល់នឹងត្រូវបានពង្រឹង ។ ហើយបងប្អូននឹងនឹកចាំថា យើងរួបរួមគ្នាក្នុងអ្វីមួយដែលធំជាងវួដ ឬសាខារបស់យើងទៅទៀត ។ សូមចែករំលែកបទពិសោធន៍របស់បងប្អូននៅលើគេហទំព័រ liahona.ChurchofJesusChrist.org ឬផ្ញើអ៊ីម៉ែលមកកាន់យើងតាមរយៈអាសយដ្ឋាន liahona@ChurchofJesusChrist.org ។

ដំណើររឿង និងសារលិខិតនៅជិតផ្ទះ

ទស្សនាវដ្ដី លីអាហូណា បោះពុម្ពជាកំណែតាមតំបន់ជាង ៦០ តំបន់ដែលមានដាក់បញ្ចូលទំព័រជាក់លាក់បន្ថែមទៅតាមទីតាំង និងភាសាភូមិភាគខុសៗគ្នា ។ ទំព័រក្នុងមូលដ្ឋានទាំងនេះនឹងជួយភ្ជាប់បងប្អូនទៅនឹងពួកបរិសុទ្ធ ថ្នាក់ដឹកនាំ និងបញ្ហានានាដែលនៅជិតផ្ទះ ។