Tāpe’ara’a i te pehe ’ei pū nō te ha’amorira’a
’Ua riro noa na te pehe—’e e tāmau noa i te vai—’ei pū nō te ha’amorira’a, i te fare purera’a ’e i te fare.
Tau hepetoma ri’i i muri mai i te fa’ati’ara’ahia te ’Ēkālesia, ’ua fa’aue te Fatu ia Emma Semita « e mā’iti i te hō’ē mau hīmene mo’a… ’o te riro ’ei ha’amāuruurura’a iā’u, ’ia vai te reira i roto i tā’u nei ’Ēkālesia ». (Te Parau Ha’api’ira’a ’e te mau Parau Fafau 25:11) ’Ua hina’aro te feiā mo’a i te mau rāve’a nō te ha’api’i mai i te mau parau mau o te ’evanelia tei heheu-āpī-hia mai ’e ’ia ’āmui nō te ’ārue i te Atua. ’E ’ia riro te mau hīmene mo’a ’ei pū nō tā rātou ha’amorira’a ’e te ha’api’ira’a mai.
E rave rahi matahiti i mā’iri a’e nei, ’a tomo ai tō’u ’utuāfare i roto i te ’Ēkālesia, ’ua fa’aitoito tō’u nā metua ia mātou ’ia ha’api’i mai i te pehe nō tā mātou fa’aro’o ’āpī. E mau ha’amana’ora’a maita’i tō’u nō te reira tau :
-
Tāmau ’ā’au « Te hia’ai mau ’o te Atua », (Te mau Hīmene, no. 77) ’e tō’u ’utuāfare.
-
Fa’aro’ora’a « Tō’u Metua » (Te mau Hīmene no. 178) ’e te ha’api’ira’a mai ē e Metua i te ao ra tō’u ’e te Metua vahine ’o tā’u e ’ite fa’ahou i te hō’ē mahana.
-
Te fāri’ira’a i te here o te Atua ma te hīmenera’a « Mon Père Céleste m’aime », (Chants pour les enfants 16–17)—noa atu ’ua ora na vau i roto i te medebara ’e ’aita roa i ’ite na i te lila !
Nu’ura’a vitiviti o te purera’a ’ōro’a i te hope’a ’āva’e nō Fepuare 2020. E rave rahi melo o tā mātou pāroita tei fa’aruru i te māriri ’aita’ata, ’e ’ua fāri’i hōhonu vau i te tāmāhanahana ’a hīmene ai te pupu hīmene a te pāroita i te hīmene « ’Auē te pa’ari » (Te mau Hīmene no. 41) Tau hepetoma i muri mai, ’ua tupu rau huru mau ’ohipa pe’ape’a : te mau ’ōpanipanira’a, te fa’a’orera’a i te mau purera’a ’e te rau o te mau ’āueuera’a fenua ’e te mea na’ina’i. ’E ’ua ha’amata teie hīmene i te ta’i fa’ahou i roto i tō’u ferurira’a :
’Eiaha e fēa’a, e feiā mo’a e !
’O vau te Atua te tumu e ora ai.
Nā’u e fa’ati’a, nā’u e tauturu.
Mai tō’u nei parauti’a, tō’u rima mana.
I te tahi taime, mai tē huru ra ē te māra’a fātata i te mau mahana ato’a te mau tāmatara’a nā te ao nei ’e tō te ta’ata iho. Hau atu i te reira, e hina’aro tātou i te mā’a pae vārua o te mau hīmene mo’a, te mau hīmene a te Paraimere ’e te tahi atu mau pehe mo’a.
’Aita e tauira’a i roto i te ’ōpuara’a ’aore rā, i te faufa’a
Terā rā, ’a taui ai tātou i te fa’anahora’a e piti hora nō te mau purera’a a te ’Ēkālesia, tē uiui nei paha vetahi ’ua fa’aitihia ānei te ti’ara’a o te pehe i roto i tā tātou ha’amorira’a. Te pāhonora’a, ’aita.
-
E riro noa te mau hīmene mo’a ’ei tuha’a nō te purera’a ’ōro’a tāta’itahi, ’oia ato’a te tauturura’a i te fa’aineine i tō tātou ’ā’au nō te ’ōro’a o te ’ōro’a mo’a. E nehenehe te pupu hīmene ’e te hīmene a te ’āmuira’a ’e te tahi atu pehe mo’a e fa’anaho-noa-hia nō te ha’afaufa’a atu ā i te purera’a, mai nā mua a’e nei. I roto i te ma’i pe’e o te COVID-19, ’ua riro fa’ahou te pehe mo’a ’ei hō’ē tuha’a faufa’a roa nō te mau purera’a ’ōro’a ha’apotohia, noa atu ato’a ’o te pehe ha’uti noa
-
I teienei, e rave tā tātou mau tamari’i i te ’āfara’a o tō rātou taime i te Paraimere nō te ha’api’ira’a mai i te ’evanelia nā roto i te pehe.
-
I te piti o te hora, ’aita e hīmene ’īritira’a ’aore rā ’ōpanira’a nō te mau piha a te feiā pa’ari ’e te feiā ’āpī. E nehenehe rā te pehe e fa’a’ohipa-noa-hia i roto i te mau piha nō te ha’api’i ’e nō te fa’auru.
-
E mea ’ōhie atu ā i nā mua a’e nei nō te fa’aro’o i te pehe mo’a nā ni’a i te mau mātini ’āfa’ifa’i, ma te fa’a’ohipa i te hono nō te Pehe Mo’a a te ’Ēkālesia.
Iti mai te fa’auera’a, rahi atu te hina’aro
Teie rā, tē vai ra te mau ta’a-’ore-ra’a. I te hō’ē sābati nō Pāsa, ’ua tātarahapa te hō’ē ’orometua i mua i tānā piha nō Te ha’api’ira’a tumu o te ’Evanelia : « ’Ua ’ite au ’aita e ti’a ia tātou e hīmene i te ha’api’ira’a sābati, tē hina’aro mau nei rā vau ’ia hīmene ’āmui tātou ‘’Ua ’ite au tē ora nei tō’u Fatu ». Pāpu roa e ’ere o teie ana’e ’orometua tei roto i te ta’a-’ore-ra’a.
Te parau mau, ’ua riro noa na ato’a te pehe ’ei mea faufa’a i roto i te ha’amorira’a hau atu i nā mua a’e nei. ’Ei ’ite nō te fa’a’āpīra’a ’ā’amu e tupu nei i teienei nō tā tātou mau buka hīmene mo’a ’e te mau hīmene a te mau tamari’i. ’Ei tuha’a nō teie tauto’ora’a, ’ua hāpono mai te mau melo o te ’Ēkālesia nā te ao nei 16 000 mau hīmene mo’a ’āpī fa’ahiahia, te mau hīmene ’e te mau parau.
Terā rā ma te iti te taime ti’a nō te hīmene i roto i te tahi mau purera’a i te sābati, e ti’a ia tātou ’ia feruri hau atu ’e te hina’aro i roto i te fa’anahora’a ’e te fa’a’ohipara’a i te pehe.
E piti parau tumu faufa’a roa ’o te nehenehe e tauturu ia tātou ’ia tāpe’a i te pehe ’ei pū nō tā tātou ha’amorira’a :
1. Tītauhia i roto i te ha’api’ira’a
E nehenehe tātou e fa’ariro i te mau paraparaura’a ’e te mau tāu’ara’a parau ’ei mau rāve’a tumu nō te fa’a’ite i te poro’i o te ’evanelia i te fare ’e i te fare purera’a. E nehenehe tātou e rave i te rahira’a o tō tātou taime i ni’a i teie mau mea. E ’ere rā te pehe ’ei hō’ē fa’anehenehera’a hau atu. ’O te pū mau te reira o te ha’api’ira’a ma te mana ’e ma te Vārua.
Mai tā te ’āpōsetolo Paulo i a’o mai i te feiā mo’a mātāmua, « ’Ia vai hua nā te parau a te Mesia i roto ia ’outou ma te ’ite pāpū ato’a rā ; i te ha’api’ira’a ’e te a’ora’a te tahi i te tahi, ma te salamo ’e te hīmene ’e te sire a te vārua, ma te ha’amaita’i i roto i tō ’outou ’ā’au i te Atua ».(Kolosa 3:16)
E nehenehe te pehe e ’āfa’i poto mai i te Vārua i roto i te hō’ē ha’api’ira’a ’aore rā purera’a. Te mā’itira’a i te hō’ē hīmene nō te hīmene i te taime o te piha Ha’api’ira’a Sābati ’aore rā o te hō’ē ’āparaura’a Mai; pe’e mai e tītauhia i te hō’ē ā ferurira’a, te purera’a mai te mau pāpa’ira’a mo’a tā tātou e mā’iti nō te tai’o ’aore rā ’ei tuha’a nō te ha’api’ira’a tā tātou i mā’iti e fa’a’ite. E nehenehe te pehe i mā’itihia nā roto i te pure e ha’aputapū i te mau ’ā’au, ma te vaiiho i te mau mana’o pae vārua ’o te vai nō te orara’a tā’āto’a.
2. « Hō’ē pure nā’u »
I te tahi mau taime, e nehenehe tātou pā’āto’a e ora i te mau taime e au ra ’ua ha’amou-roa-hia tātou, i te mau taime e ’ere te ’ē’a i mua ia tātou i te mea pāpū roa. I te tahi mau taime, mai te huru ra ē, te tāmau noa nei tātou i te fa’aru’e i teie ā hina’aro rū i te ra’i, ma te pāhono ’ore ’aore rā te fa’aotira’a ’ore. I roto i taua mau taime ra, e nehenehe te fa’ahemara’a e riro ’ei fa’aotira’a ē, ’aita te Atua e tāu’a mai nei ’aore rā ’aita tātou i te mea ti’amā nō tāna aupurura’a. I te tahi taime e nehenehe ato’a tātou e hina’aro e vaiiho i te hiti te pure.
I te mau taime ’ia ’ite ana’e tātou e ’aita e tū’atira’a pae vārua ’e te ra’i, teie te hō’ē parau mau tāmāhanahana : E nehenehe te pehe mo’a e riro mau ’ei hō’ē hōho’a nō te pure. ’Ua fa’ata’a te Fatu iho i te reira ’a fa’aue ai ’oia ia Emma ’ia hāmani i tā tātou buka hīmene mātāmua : « Nō te mea ē e ’oa’oa tō tō’u nei vārua i te hīmene o te ’ā’au ; ’oia ïa ’ua riro te hīmene o te feiā parauti’a ra ’ei pure iā’u nei ».(Te Parau Ha’api’ira’a ’e te mau Parau Fafau 25:12 ; tu’uhia te fa’atomara’a)
’E ’ia pūpū ana’e tātou ma te hina’aro mau iāna i te hīmene o tō tātou ’ā’au, ’ua fafau mai te Fatu e pāhono tāmau mai ma te hō’ē ha’amaita’ira’a : « ’E e pāhonohia te reira nā roto i te ha’amaita’ira’a i ni’a iho i tō rātou ra mau upo’o. Nō reira ’a fa’ateitei mai na i tō ’oe ’ā’au ’e ’a ’oa’oa ».(Te Parau Ha’api’ira’a ’e te mau Parau Fafau 25:12–13).
I te hō’ē taime fifi o tō’u orara’a, ’aita i ti’a iā’u e ’ite mai i te mau pāhonora’a i tā’u mau pure ’ā’au tae nō te hō’ē tau roa. Tē fa’aruru nei hō’ē hoa herehia tō’u i tōna iho mau fifi. ’Ia ha’uti ana’e rā māua ’e ’ia hīmene ’āmui i te mau hīmene mo’a o te ’evanelia, e fāri’i pinepine māua i te mau ’āehuehu pūai nō te tāmāhanahana ’e nō te ’itera’a pāpū. ’Ua ’ite au i teienei ē, ’ua fa’aoti te Fatu i tāna fafaura’a. E pāhono mai ’oia i te mau hīmene o tō’u ’ā’au, fa’ahou ’e fa’ahou ā. ’E ’ua tauturu mau te reira iā’u ’ia fa’ateitei i tō’u ’ā’au ’e ’ia tāmau ā.
Photograph by Robert Casey
’Aita e hi’ora’a i te sābati
I te mau sābati ato’a, e nehenehe tātou e pāpū ē, vetahi i roto i tā tātou ’āmuira’a, vetahi i roto i tā tātou mau piha ’e vetahi i roto i tō tātou mau ’utuāfare tei roto i te hōhonura’a o te mau pape o te ’ati o te ta’ata iho. Tei roto vetahi i te mau ’āfa’a o te hau ma te mau ha’amaita’ira’a ’auhune. Vetahi fa’ahou e ha’api’i noa mai i te mau parau mau niu o te ’evanelia.
’Ia tāpe’a ana’e tātou i te pehe i tōna iho vāhi mau ’ei pū nō tā tātou ha’amorira’a, e nehenehe tātou e tauturu i te ta’ata ato’a ’ia ’ite mai i te mau rāve’a nō te fāri’i i te Vārua, ’ia ha’api’i mai i te mau parau mau o te ’evanelia, ’e te ’āruera’a i te Fatu nō tōna mau maita’i. ’E e nehenehe tātou e tauturu i te ta’ata ato’a e pāhono i te mau hīmene o tō rātou ’ā’au nā roto i te mau rāve’a ē ’o tō tātou ana’e Metua mure ’ore te nehenehe e rave.