« Hina’aro vau e haere i te pāradaiso »
’A pure ai au ’e ’a ani ai i te Atua nō ni’a i teie ’ē’a ’āpī, ’ua fāri’i au i te ha’apāpūra’a hau atu i te parau mau ’o tā’u i ’ite mai.
Hōho’a nā Getty Images, tu’uhia nō te hōho’a
’Ua riro na vau ’ei melo nō te tahi atu ’ēkālesia, i muri iho rā ’ua ha’amata vau i te tuatāpapa i tāna mau ha’api’ira’a nō ni’a i te tāmāra’a. Tē ha’api’i nei teie mana’o ē, te vārua i muri mai i te pohe pae tino, e fāri’ihia i te hō’ē vāhi mai te fare tāpe’ara’a, i reira ’oia e tāmāhia ai nō te haere i muri iho i te pāradaiso.
’A feruri ai au nō ni’a i te mau vārua e ’oto ra i roto i te tāmāra’a, ’ua feruri au i tō’u iho pae vārua i mua nei ’e tō’u aura’a ’e Iesu Mesia. ’Ua ha’amata vau i te pure, « e aha te ti’a iā’u e rave ’eiaha vau e haere i te tāmāra’a ? Hina’aro vau e haere i te pāradaiso »
Te ’ohipa mātāmua tei tae mai i tō’u ferurira’a ’o te orara’a ïa i nā ture hō’e ’ahuru. ’Ua fāri’i au ē mai te mea e nā reira vau, e fa’ati’a i te aroha o te Fatu iā’u ’eiaha e haere i te vāhi tāmāra’a. ’Ua fafau vau e ha’apa’o i te mau ture ’e ’ua ha’amata i te hō’ē tau pūai mau i te ha’apaera’a i te mā’a, te purera’a, te tuatāpapara’a i te mau pāpa’ira’a mo’a ’e te ferurira’a hōhonu.
I roto i taua taime ra, ’ua fa’auruhia vau e ui i te hō’ē uira’a mātau-’ore-hia i te hō’ē taote o te fare ma’i i reira tō’u ’ohipara’a ’ei fa’atere nō te mātutura’a.
« Taote Thibaut », ’ua parau vau, « tei roto ānei te Fatu ’o Iesu Mesia i tā ’oe ’Ēkālesia ? »
’Ua parau mai ’oia ē, nō te ’Ēkalesia a Iesu Mesia i te Feiā Mo’a i te mau Mahana Hopeʼa nei ’oia. Mai te reira taime, ’ua arata’i te Vārua i tā māua tāu’ara’a parau. ’Ua ui au iāna nō ni’a i te mau ta’a-’ē-ra’a i rotopū i tāna ’Ēkālesia ’e tā’u. ’Ua paraparau mai ’oia nō ni’a i te Buka a Moromona. ’A tāmau noa ai tā māua ’āparaura’a, ’ua ’ī tō’u ’ā’au i te ’oa’oa. ’Ua ’ite a’era vau ē, tē fāri’i nei au i te mau pāhonora’a i tā’u mau pure.
Piti mahana i muri mai, ’ua hōro’a mai te mau misiōnare nā’u i te hō’ē Buka a Moromona, ’o tā’u i tai’o ’e i tuatāpapa nā muri iho ia rātou. ’Ua ’ite au e mea fa’ahiahia roa ’ia ha’api’i mai i te mau mea ’āpī nā roto mai i te mau pāpa’ira’a mo’a. ’Ua ha’amata vau i te ha’apao i te parau pa’ari.
I tō’u ’itera’a ’ua mo’e tō’u ’ana’anatae nō tā’u ’ēkālesia, i reira ho’i tō’u ’ohipa-pūai-ra’a, ’ua ui au e aha te ’ohipa e tupu nei. ’Ua pure au ’e ’ua ani i te Atua nō ni’a i teie ’ē’a ’āpī. I tō’u nā-reira-ra’a, ’ua fāri’i au i te ha’apāpūra’a rahi o te parau mau ’o tā’u i ’ite mai. ’Ua fa’aoti au e tomo i roto i te ’Ēkālesia, noa atu ’ua ’ite au ē, e fa’aruru vau i te hāmani-’ino-ra’a.
’Ua tae mau te hāmani-’ino-ra’a, ’ua ha’apūai rā te Fatu iā’u. ’Ua ’ite au ē, Te ’Ēkālesia a Iesu Mesia i te Feiā Mo’a i te mau Mahana Hopea Nei ’o te pāhonora’a ïa i tā’u pure ’ā’au tae : « Hina’aro vau e haere i te pāradaiso ». ’Ua’ ite au e nehenehe au e haere i muri mai i tō’u pohera’a, mai te mea e fa’aea ha’apa’o noa vau i te mau ture a te Atua.