Roro uira noa : Te reo o te feiā mo’a i te mau mahana hope’a nei
Arata’ihia e te Fatu
’Ua mātau te Fatu ia tātou ’e i te mea maita’i nō tātou i teienei.
Hōho’a nā Code Bell
Giselle
Hou māua ’a fa’aipoipohia ai, te ’ohipa ra ’o André i ni’a i tāna parau tū’ite doctorat ’e ’ua fāri’i i te hō’ē ti’ara’a nō te rave i te ’ohipa i te fare ha’api’ira’a teitei nō Michigan. ’Ua fa’aipoipohia māua ’e ’ua fa’anu’u atu i Michigan. I te pae hope’a, ’ua ha’amata ’o André i te fāri’i i te tahi fifi i te ’ohipa ’e ’ua hina’aro e taui i te ’ohipa.
E mea ’āpī roa māua, nō fa’aipoipo noa atu ra māua, ’e ’aita māua i ’ite e aha te rave. ’Ua fa’aoti māua e pure nō te reira.
André
I te hō’ē mahana, ’ua haere atu vau i te fare ha’api’ira’a teitei ’e ’ua ’ite atu vau i te hō’ē tāpura i reira i te piara’ahia te mau ti’ara’a ’ohipa e vata ra. ’Ua ani au e toru ti’ara’a ’ohipa ta’a ’ē. I roto e hō’ē noa hepetoma, ’ua fa’aauhia mai iā’u i nā ’ohipa e toru.
Giselle
’Ua uiui māua e aha te ’ohipa e rave. ’Ua pure fa’ahou māua. Tē vai ra hō’ē ti’ara’a ’ohipa i te fenua Peretāne, ’ua hina’aro rā māua e fa’aea noa i te fenua Marite. Hō’ē tei Texas ïa, ’e te tahi ’ohipa tei Maryland ïa fātata i Washington, D.C. Te ’ohipa i Maryland i te NASA ïa. E ’aivāna’a ihi o André, e au ra ē o te NASA te vāhi maita’i e haere.
André
I tō māua fa’anu’ura’a i Maryland, nā’u e fa’ahoro i te pere’o’o ’a ta’oto noa ai ’o Giselle. I te po’ipo’i roa ’ua ’ite atu vau i te hiero nō Washington D.C.
« ’A ti’a i ni’a ! ’A ti’a i ni’a ! E noa’a ia ’oe e hi’o i te reira ? » ’Ua parau atu vau ia Giselle. « E au te reira i te hō’ē pare ! »
Giselle
’Ua parau atu vau ia Andre ē, e nehenehe paha tāua i te hō’ē mahana e haere e māta’ita’i. ’Aita roa māua i ’ite mai te aha ra te reira. Tau mahana i muri mai i te taera’a i Maryland, ’ua haere au i te fare vaira’a buka nō te fa’a’ohipa i te nātirara nō te tītau i te ’ohipa ’e nō te hi’o i tā’u mau rata uira.
’Ua fa’aro’o mai te hō’ē vahine e ’ohipa ra i reira i ta’u ta’ira’a reo ’e ’ua ani mai nō hea mai au. ’Ua parau atu vau iāna nō te fenua Peretīria vau ’e ’ua ha’amata māua i te paraparau. ’O Edna tōna i‘oa. ’Ua parau vau iāna nō haere noa mai nei māua i Michigan nei ’e ’ua fa’a’ite i te vāhi tei reira māua i te orara’a.
« Tē ora nei au i roto i taua ā fare teitei ra », ’ua parau Edna.
I tō’u ho’ira’a i te fare vaira’a buka i te mahana i muri iho, ’ua parau mai ’o Edna, « ’ua ’oa’oa roa vau i tō ’oe ho’ira’a mai. Tē hina’aro nei au e ani manihini ia ’oe ’e tā ’oe tāne ’ia haere mai i tō’u fare nō te tāmā’a ».
’Ua mana’o vau ē, e mea huru ’ē nō te mea ’aita ’oia i mātau iā’u. I muri iho, ’ua parau ’oia, « ’ua pure au nō ’oe nō te mea ’ua fāri’i au i te hō’ē ’ohipa ta’a ’ē mau i te taime ’a fārerei ai au ia ’oe i nanahi ra ».
’Ua haere atu māua i tōna fare ’e ’ua ha’api’i mai māua ’e nō pohe noa atu ra tāna tāne. I muri a’e i te tāmā’ara’a, ’ua ha’uti ’oia, « Pe’e au ia ’oe », (Te mau Hīmene no. 131) i ni’a i te piana. ’Ua parau ’oia ’o te hīmene au-roa-hia e tāna tāne ’e ’ua ha’utihia te reira i tōna ’ōro’a hunara’a. I muri iho, ’ua paraparau mai ’oia ia māua nō ni’a i te fa’anahonahora’a nō te fa’aorara’a ’e ’ua ani mai ia māua e haere i te purera’a nā muri iho iāna.
’Ua haere mātou i te purera’a, ’e ’ua fāri’i poupou maita’i mai te mau ta’ata i reira. ’Ua fa’aoti a’era māua e haere i te sābati i muri iho. ’Ua fāri’i māua i te mau ha’api’ira’a misiōnare. ’Ua ani mai ’o Edna e fa’atupu i te mau ha’api’ira’a i tōna fare. E pae ’āva’e tō māua haerera’a i te purera’a i te mau sābati ato’a. ’Ua fa’aineinehia tō māua ’ā’au ’e tō māua vārua nō te bāpetizora’a.
André
I te taime ’a fa’aarahia ai tō māua bāpetizora’a, ’ua māere te mau ta’ata ato’a. « Ē, e ’ere ïa ’ōrua i te melo ? », ’ua parau rātou. « Tei ’ō nei rā ’ōrua i te mau hepetoma ato’a ! » E mea ta’a ’ē tō māua bāpetizora’a. Fātata te pāroita tā’āto’a tei tae mai.
’Ua tā’atihia māua i roto i te hiero nō Washington D.C, hō’ē matahiti i muri iho. I tō māua haerera’a i te hiero, ’ua ’ite a’era māua ē ’o te pare teie tā māua i ’ite hau atu i te hō’ē matahiti nā mua atu !
Giselle
I muri a’e i tō māua tā’atira’ahia i roto i te hiero, e rave rahi mau mea ’aita e tere maita’i ra.
I muri a’e i te 11 nō Tetepa 2001, e mea fifi roa nō māua i te fa’a’āpī i tō māua parau tītiro mana. ’Ua ’oto vau nō te mea nō fa’aoti noa atura vau i tā’u tau ha’api’ira’a nō te fare ha’api’ira’a tuatoru nō te tuha’a fenua, ’e ’ua fa’aō nō te hō’ē pūtē ha’api’ira’a tā’āto’a i te fare ha’api’ira’a teitei nō Maryland. ’Aita vau i fāri’i i te pūtē ha’api’ira’a, ’e te pū mā’imira’a i reira André e rave ai i te ’ohipa, tē ’ōpani ra.
’Ua mana’o māua ē, penei a’e ’ua tae i te taime nō māua e ho’i i Peretīria.
André
’Ua parau mai tō māua ’episekōpo ia māua ē, e nehenehe māua e tauturu e rave rahi mau melo i Peretīria ’e ’ia tupu i te rahi nā roto i te mau rāve’a ’o te ’ore roa e tupu i te fenua Marite. ’Ua a’o mai ’oia ia māua ’ia fa’aea noa i pīha’i iho i te ’Ēkālesia.
’Ua parau ’oia, « ’a haere i Peretīria ’e ’a tāvini i te Fatu ».
I muri a’e i te orara’a i Peretīria nō te tahi taime, ’ua haere mai tō mātou peresideni titi i tō māua fare, ’e ’ua pi’i mai iā’u ’ia tāvini ’ei ’episekōpo. ’Ua ’ite ri’i au ē e pi’ihia vau. I te roara’a o te tahi mau pō hou tō’u pi’ira’a, ’aita tā’u e nehenehe e ta’oto. E feruri au ’e e tuatāpapa.
Giselle
’Ua uiui au i roto iā’u e aha tē tupu ra. ’Ua ’ite au iāna i te tauira’a hou tōna pi’ira’a.
André
I tō’u ha’amatara’a i tō’u pi’ira’a, e 80 noa melo itoito i roto i tā mātou pāroita. I tō’u ha’amāuruurura’ahia, ’ua rahi atu tei haere pinepine mai i te purera’a, ’e e 12 misiōnare tei haere i roto i te ’āua nō roto mai i tā mātou pāroita. E mea faʼahiahia mau !
I te ārea taime ’a ha’amāuruuruhia ai au, ’ua ha’amāuruuruhia te peresideni Dieter F. Uchtdorf i roto i te Peresidenira’a Mātāmua. Tē ha’amana’o nei au i te peresideni Russell M. Nelson i te paraura’a ē, e mau hōpoi’a ’āpī ’e te faufa’a tā te peresideni Uchtdorf i roto i te pupu nō te Tino ’Ahuru ma Piti ’āpōsetolo.
E toru ’āva’e i muri mai, ’ua pi’ihia vau ’ei tauturu hō’ē i roto i te peresidenira’a misiōni. ’Aita vau i tāvini i te hō’ē misiōni, ’ua here rā vau i tō’u pi’ira’a. E mea au nā’u e ’ohipa ’e te mau misiōnare. ’Ua mātau te Fatu iā’u. ’Ua ’ite ’oia ē, e ti’a ’ia ha’amāuruuruhia vau ’ei ’episekōpo ’ia nehenehe iā’u ’ia tāvini i te taime ’e i te vāhi e tano maita’i nō’u i teienei.