Tauturu i te mau metua
E aha tā te purūmura’a i ha’api’i iā’u nō ni’a i te ti’ara’a metua
Tē ora nei te ta’ata pāpa’i i Utaha, Mārite.
’Ua tauturu te mau ’ohipa i te fare a tā’u mau tamari’i i te pāhono i tā’u pure.
Fa’ahōho’ara’a nā David Green
’Ua ara mai au i hō’ē po’ipo’i ma te mana’o teiaha. Mai te mea ra e mea teiaha tā’u mau hōpoi’a metua, ’e ’ua pāpū maita’i iā’u i tō’u mau pāruru. Mai te mea ra tē vai nei hō’ē ārea rahi i rotopū i te huru ’o tā’u i mana’o ē e riro mai au ’ei metua ’e mai te hea mau vau.
’Ua tūturi au nō te pure ’e ’ua parau atu vau i te Metua i te ao ra i tō’u here rahi iāna. ’Ua parau atu vau iāna ’ua here roa vau i te mau tamari’i ’o tāna i ha’amaita’i i tō mātou ’utuāfare. ’E ’ua ha’amata vau i te parau iāna ē, tē tāmata nei au ’ia riro ’ei hō’ē metua maita’i, terā rā tē mana’o nei au ē, ’aita vau e rave nei i te hō’ē ’ohipa maita’i roa. ’A pure noa ai au, ’ua feruri au e maita’i mai a’e tā’u mau tāmari’i mai te mea ē, nā te Atua iho e aupuru ia rātou.
I muri iho, puta mai nei te hō’ē hōho’a i roto i tō’u ferurira’a. ’Ua ’ite au i tā’u mau tamari’i i te purūmura’a i te tahua tunura’a mā’a. Teie te hō’ē o te mau rahira’a ’ohipa tei fa’ata’ahia nā rātou e rave nō te tauturu i tō mātou ’utuāfare. I te tahi taime te hi’ora’a ia rātou ’ia rave i te reira e fa’ataratara ’iā’u nō te mea tē ha’api’i fa’ahou mai ra rātou ’e e mo’ehia te tahi mau vāhi. Tē vaiiho nei rā vau ia rātou ’ia rave i te reira, ’e te tahi atu mau ’ohipa o te mau mahana ato’a, nō te mea e hi’ora’a rahi tō’u nō rātou. ’Ua ’ite au ē nā roto i teie mau ravera’a tano ’ore, e ha’api’i mai rātou ’e e tupu i te rahi. I te hope’a, e nehenehe rātou e rave ’oi’oi ri’i i te reira ’e ma te maita’i a’e e ti’a ai iā’u. Teie hi’ora’a nō rātou ’ia riro mai ’ei ti’a’au ’e te fa’arava’i ia rātou iho, ’ua riro ’ei mea faufa’a roa mai te mea e nā’u noa e rave i te tā’āto’ara’a. ’Aita vau e aupuru nei i te mau tamari’i ’ia manuia noa nō te tau poto—tē tāmata nei au i te tauturu ia rātou ’ia manuia nō te tau roa.
’E ’ua uiui au ē, penei a’e te mau ’ohipa mai teie te huru e mea mau ato’a nō tō tātou mau metua i te ao ra. ’Ua ’ite te Metua i te ao ra ē, e’ita tā tātou e nehenehe e rave i te hō’ē ’ohipa maita’i roa ’ei mau metua. Pāpū tē fa’ataratara nei te tahi mau ’ohipa tā tātou e rave nei iāna, tē fa’ati’a nei rā ’oia i te reira nō te mea ’ua ’ite ’oia ē, tē ha’api’i mai nei tātou ’e tē tupu nei i te rahi. E hi’ora’a ātea hō’ē roa tōna nō te tau maoro. Tē ’ōpua nei ’oia ia tātou i te hō’ē mahana ’ia riro ’ei hō’ē metua mai iāna, e ti’a ’ia here hope roa, ’ia ha’api’i maita’i roa, ’e ’ei hi’ora’a fa’ahiahia mau. ’A rave tano ’ore ai tātou, ’ua ite ’oia tē fa’ananea nei tātou i te mau maita’i mai te fa’a’oroma’i ’e te aroha. ’E nō reira, nā roto i tōna pa’ari, tē vaiiho nei ’oia ia tātou ’ia ’ohipa ’e ’ia manuia ’ore ’e ’ia tāmata fa’ahou.
’Āue ïa tō’u hina’aro ’ia riro a’ena ’ei hō’ē metua maita’i ! Mai tā Iosepha Semita i pāpa’i, pinepine au i te ’ite iā’u e topa « i roto i te mau hapehape ri’i ».(Iosepha Semita—’Ā’amu 1:28). E ’ite mai rā vau i te tāmāhanahana nā roto i te ’itera’a ē, ’ua hāro’aro’a te Atua i tō’u ’ā’au, te aura’a ’ua ’ite ’oia tē tāmata nei au ’ia ha’api’ihia. E fāri’i au i te ’oa’oa ’ia ani ana’e mai tā’u mau tamari’i, « nāhea vau i te rave maita’i a’e i te reira ? » ’e e au ra tē hina’aro ra e ha’amaita’i atu ā. E nehenehe a’e au e riro mai te reira nō te Metua i te ao ra.
’A tupu noa ai teie mau mana’o i roto i tō’u ferurira’a, ’ua fāri’i fa’ahou mai au i te hō’ē taime tarapapera’a. « E aha rā te rave mai te mea e ha’apēpē tā’u mau hapehape metua i tā’u mau tamari’i ? » ’Ua ui atu vau. « E’ita vau e hina’aro e tāpe’a i te reira, noa atu e riro mai au ’ei ’ohipa fa’ahiahia i roto i te fa’anahora’a ».
E fa’ahou ā, ’ua tae mai te hōho’a nō te tāmāra’a tā’u mau tamari’i i roto i tō’u ferurira’a. I muri a’e i tō tā’u tamāhine tāmata-pāpū-ra’a i te tāmā i te tahua ’e i muri iho, te haere-vitiviti-ra’a e ha’uti ’aore rā e fa’aoti i te tahi atu ’ohipa, e horoi iho ā vau i te mau tāfetafeta piripiri e toe ra. ’E ’ua feruri au i te aroha fāito ’ore ’e i te mana ’o Iesu Mesia, ’o tā te tāra’eha’a e tāpo’i tāta’itahi i te huru tupura’a o te orara’a. E tātā’i tōna aroha i tō’u mau hapehape ’ei metua, mai tā tōna aroha e tātā’i i te mau pēpē o tā’u mau tamari’i nō tā’u mau hapehape. Mai te huru ra ē, e’ita te hō’ē o tātou e nehenehe e hāro’aro’a, e nehenehe tāna tāra’ehara e fa’aora i te tā’āto’ara’a o te reira.
’Ua tāmāhanahana-rahi-hia vau nā roto i te heheura’a ’o tā’u i fāri’i i taua mahana ra. ’Ua fāri’i au tē ha’api’i nei te Vāru’a iā’u ē, tā’u mau tauto’ora’a maita’i a’e ma te ’āpitihia ’e te Fatu, ’ua nāva’i ïa. ’Ua ’ite au ē, e tāmau noa te Metua i te ao ra i te ha’a i roto i te orara’a o tā’u mau tamari’i, ma’a vāhi iti ’e ma’a vāhi iti, nō te rave maita’i a’e i te mea ’o tā’u i ’ore i rave maita’i a’e. Nā roto i tāna tauturu, e nehenehe tā’u mau tamari’i i te hō’ē mahana e ’ana’ana i roto i tō rātou iho ti’ara’a, i te ’ana’anara’a mai te mea ra nā te Metua i te ao ra i aupuru ia rātou i te taime mātāmua ra. Maoti ’ua ’āfa’i ato’a mai tāna ’ōpuara’a ’ia taui iā’u i roto i te fa’anahora’a—ma te ha’amo’a iā’u ’e te fa’ahōho’ara’a iā’u nō te riro mai mai iāna. ’Āue te rahi o te pa’ari o tō tātou Atua !