E fa’arūra’a nō te purera’a ’ōro’a
’Ua mana’o vau ’ua ma’iri mātou i te purera’a ’ōroa—fa’ahou ā ïa.
Hōho’a nā Getty Images
I tō mātou fa’anu’ura’a mai Marite haere atu i ’Ānāmi, ’ua fa’aoti tā’u tāne ’e ’o vau nei ’eiaha roa e ma’iri i te purera’a. I muri a’e hō’ē matahiti, ’aita mātou i ma’iri i te hō’ē noa a’e purera’a i te sābati, mea pinepine rā mātou i te taere ’e e mea pinepine i te ma’iri i te purera’a ’ōro’a. E ha’amata tā mātou purera’a ’ōro’a i te hora 8:30. Mai nā e toru tamari’i na’ina’i, nō te fa’aineine i te hora tano nō te purera’a e au ra e mea pinepine ’aita e nehenehe.
’Ei ’utuāfare ’ua fa’aoti mātou ē, e ti’a ia mātou ’ia tae tāmau i te hora ti’a i te purera’a ’e ’ia rave i te ’ōro’a mo’a. E ’arora’a teie, ’ua tae rā mātou i te purera’a i te hora ti’a e maha sābati i muri iho. ’Ua ’ite au i te ta’a-’ē-ra’a o tā mātou tauto’ora’a i rave. ’Ua fāri’i rahi a’e mātou i te mau ’itera’a pae vārua i te roara’a o te hepetoma.
I te sābati i muri iho, ’āre’a rā, ’ua taere mātou i te arara’a. ’Ua hora 7:30 a’ena. ’Ua parau vau i tā’u tāne ē, ’aita e ti’aturi fa’ahou, ’ua feruri rā vau i muri iho e nāhea mātou i te ha’amaita’ihia mai te mea e rave maita’i a’e mātou mai tā mātou e nehenehe nō te fa’aineine noa ia mātou. Nō reira, ’ua ha’avitiviti mātou !
I te taime ’a tae ai mātou i te fare purera’a, e 20 minuti tō mātou taere. ’Ua fāri’i au i roto iā’u ē, ’aita mātou i manuia. ’Ua fa’aro’o mātou i te hīmene ’a tomo ai mātou i roto, ’e ’a ’īriti mai ai au i te ’ōpani, tē haere ra te hō’ē ta’ata i te terono nō te pure.
« ’O te hīmene ’ōmuara’a teie ? » ’Ua muhumuhu atu vau i te misiōnare e ti’a ra i te ’ōpani.
’Ua parau ’oia, « ’Ē ! ». « ’Ua tāere mātou i te ha’amatara’a i teie mahana ».
ʼUa māere rahi au. ’Ua mana’o vau ē ’ua manuia ’ore fa’ahou mātou, ’ua tae atu rā mātou i te fare purera’a i te hora ti’a !. ’Ua tahe te roimata nā tō’u hōho’a mata, ’a fāri’i ai au i te here o te Metua i te ao ra nō tō’u ’utuāfare iti ’e nō’u.
I muri a’e, ’ua ha’api’i mai mātou ē, i te taera’a te mau misiōnare i te fare purera’a i te reira sābati, ’ua ’ite atura rātou ē ’aita hō’ē a’e ta’ata i ’āfa’i mai i te faraoa nō te ’ōro’a mo’a. ’Aita e fare to’a fātata, ’e e mea fifi roa nō te ’imi i te faraoa i roto ia ’Ānāmi. I muri a’e i te hō’ē taime hepohepo, ’ua ha’amana’o a’era te mau elders e faraoa tā rātou i te fare.
Ma’a mahana nā mua atu, ’ua haere mai te mau elders i tō mātou fare nō te tāmā’a. I taua pō ra, ’ua fa’aineine au i te faraoa hāmanihia i te fare nā rātou. ’Ua tāere te purera’a i te ha’amata i taua po’ipo’i ra, nō te mea ’ua ho’i te mau elders i te fare e ti’i mai i te faraoa ’o tā’u i fa’aineine nā rātou !
’Ua ’ite te Atua i tā mātou mau tauto’ora’a ’a tītau ai mātou i te ha’apa’o i tāna mau fa’auera’a. Noa atu ’aita tātou e manuia i te tahi taime, ’ua here ’oia ia tātou ’e e fa’aineine ’oia i te mau rāve’a nō tātou ’ia manuia—noa atu nō te tae noa i te fare purera’a i te hora ti’a.