Ngaahi Peesi Fakalotofonuá
Naʻe Tokoni ʻa e Taʻahine Lahi Kei Talavou Ko ʻEní ki Hono Fokotuʻu e Fuofua Laipeli Maʻá e Kakaí Fakalūkufua ʻi Tonga
Hulu atu e māmá ʻi ha tokotaha kei talavou lavameʻa ʻi he ʻAho e Toʻu Tupu ʻo Māmaní ʻi Bora UN.
ʻI he taimi ʻoku fie fakahoko ai ʻe Loniana Fifita ha ngaahi liliu ʻi he māmaní, ʻokú ne kamata mei hono fakatokangaʻi e meʻa ʻoku manako taha aí, mo manatuʻi ʻa kinautolu ʻoku nau feohí, peá ne kamata leva ke ngāue fakapotopoto ʻaki hono ngaahi pōtoʻi ngāué mo e ngaahi tālenití.
ʻI heʻene fonongá, ʻokú ne feinga ke fenāpasi ʻene palaní mo e meʻa ʻoku finangalo e ʻOtuá ke ne fakahokó pea lavaʻi ʻa e meʻa kuó Ne foaki ange kiate iá ʻaki ʻa e talēnití mo e ngaahi faingamālié. Ka toe mahulu hake aí, ko ʻene fai ia ʻi he ʻofá.
Naʻe ʻi ai e kaveinga ʻo e ʻAho Toʻu Tupu ʻo e Ngaahi Puleʻanga Fakatahatahá ʻi he ʻaho 12 ʻo ʻAokosí, “Fakakau Mai ʻo e Toʻu Tupú ki he Ngāue Fakaemāmani Lahí”—ko e feinga ke fakaʻilongaʻi e ngaahi founga ʻoku fakatupulaki ai e ngaahi kautaha mo e founga ngāue ʻa e kakai kei talavoú ʻi he tuʻunga kotoa pē, pea fakalahi ai e ngaahi faingamālie ʻo e toʻu tupú ke maʻu ha ivi tākiekina.
Kuo liliu ʻe Loni ʻa e māmani ʻo e fānau Tonga tokolahi ʻaki hono ngaahi talēnití mo ʻene ʻofá he ʻoku nau lava ʻo maʻu faingamālie ke ngāue ʻaki ha laipeli maʻá e kakaí fakalūkufua—ko e fuofua ʻi he fonuá.
Ko Loniana Fifitá ko e mēmipa ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ʻAokalani, Nuʻu Sila. Naʻe fāʻeleʻi ia ʻi Haʻapai, Tonga peá ne toki hiki ki ʻAokalani mo hono fāmilí ʻi heʻene taʻu hivá.
Naʻe hoko ʻa Loni ko ha taukapo ʻa e toʻu tupú talu mei heʻene taʻu 15. Naʻá ne fai fatongia ko ha fakafofonga ʻa e toʻu tupú ʻi he poate fakavahe ʻa e Maungakiekie-Tāmaki, taha ʻo e ngaahi poate fakavahe ʻe 21 ʻo e Fakataha Tokoni ʻAokalaní.
Lolotonga ʻene ako ʻi he ʻUnivēsiti ʻo ʻAokalaní, naʻe toe ngāue foki ʻa Loni ʻi he pēnolo Faleʻi ʻa e Toʻu Tupu ʻAokalaní, ʻo ngāue fakataha mo e pule vahefouna ʻAokalani he taimi ko iá, Len Brown.
Naʻá ne fakamatala ʻo pehē, ʻi heʻene tokanga mo manako ʻaupito ʻi he toʻu tupú, “naʻá ku fie maʻu ke ʻai hoku feituʻú [Maungakiekie-Tāmaki] ke taau ki hono nofoʻí . . . he ko e taumuʻa kakato ia ʻo e fakataha tokoní.”
Naʻe kamata leva ke fakasio ʻe Loni ha ngaahi ngāue mo e founga ke taʻofi e ngaahi palopalema ʻoku fehangahangai mo e toʻu tupu ʻo e Pasifikí. Naʻá ne toutou fehuʻi pē kiate ia, “Ko e hā e meʻa te u lava ʻo fakahokó?”
Koeʻuhi ko e fakalalahi e ngaahi palopalema fakasōsiale ʻi he koló, naʻá ne kau atu ai ki ha kulupu ʻo ha kau ngāue mateaki ke fakahoko ha ngaahi liliu ʻi he koló ʻaki hono faʻu ha ngaahi ngāue ke tokoni ki hono fakaleleiʻi e ngaahi palopalema fakasōsiale fekauʻaki mo e toʻu tupú. Ko e taha ʻo e ngaahi ngāue mahuʻingá ko e, “Kau Finemui Makehé” ʻa ia ne tāfataha ki hono langa hake e moʻui lelei ʻo e kau finemuí ʻi he tapa kotoa pē.
ʻOku faʻu ʻe he Kau Finemui Makehé ha “feituʻu malu maʻá e kau finemui ʻi Tāmakí ke nau fetuʻutaki, tupulaki ʻi he moʻui leleí, maʻu ha loto-falala ke ʻahiʻahiʻi ha ngaahi meʻa foʻou, pea mo fiefia.”
Naʻe teuteuʻi ʻe he ngaahi aʻusia mo e fetuʻutaki ʻa Loni ʻi he ngaahi fakataha tokoni fakavahé mo e koló, pea mo ʻene malava ke fetuʻutaki mo e kakaí, ke ne hoko ko e tauhi laipeli ʻi he laipeli fakakolo ʻa e poaté ʻi Tāmakí. Ka ʻi hono fokotuʻu atu ki ai ʻa e ngāué, naʻá ne veiveiua.
Naʻe fakaʻamu maʻu pē ʻa Loni ke ne hoko ko ha tokotaha ngāue tokoni ʻofa fakaetangata. Naʻe ʻikai teitei fakakaukau ia te ne hoko ko ha tauhi laipeli, pea naʻe ʻikai ke ʻalu ki ha laipeli ʻi heʻene tupu haké.
Naʻá ne pehē, “Naʻá ku ongoʻi ko e ngaahi faingamālie eni kuo foaki mai he Tamai Hēvaní ka naʻá ku tukunoaʻi ia, koeʻuhí naʻe ʻikai ko ha konga ia ʻoʻoku.”
“ʻOkú ke ʻiloʻi ʻo hangē, ʻoku ʻi ai pē hoʻo palani ʻaʻau, peá Ne ʻoatu ʻe Ia kia koe ʻEne palani ʻaʻaná?
Hili haʻane lotua mo ʻaukai fekauʻaki mo ia, naʻá ne fakakaukau leva ke ne tali ʻa e ngāué.
Naʻá ne fakakaukau ʻo pehē, “Ko ʻeku fakaʻānaua ke u hoko ko ha tokotaha ngāue tokoni ʻofa fakaetangata pea ko e matapā ʻeni ki aí ke u ngāue ʻi he laipelí. Naʻá ku loto maʻu pē ke u foaki fakafoki . . . ka naʻe ʻikai ke u sio ki he (faingamālié) kae ʻoua kuo tō e Saikolone ko Gitá [ʻi hono motu tupuʻanga ko Tongá].”
Hili e fakatamaki ʻo e Saikolone ko Gitá, ne kamata leva ke fengāueʻaki a Loni ʻi ha tuʻunga fakafonua. ʻI heʻene hoko ko ha Tonga mo ha tauhi laipelí, pea ʻiloa ʻi heʻene ngāue ʻi he komiunitī Tāmakí, naʻe kole ai ia ke ne fokotuʻu e fuofua laipeli maʻá e kakaí fakalūkufua ʻi hono motu ʻofeina ko Tongá peá ne hoko ai ko e fuofua tokotaha tauhi laipeli.
Koeʻuhí ko hono fakaʻauha ko ia e ngaahi ʻapiakó mo e ngaahi maʻuʻanga tokoni fakaakó, naʻe ngāue tōtōivi ʻa Loni mo ha kau taki, Kahoa mo Brendon Corbett, ke fokotuʻu ha laipeli, ʻi hono foaki ʻo ha ngaahi tohi ʻe lauiafe mei he ngaahi laipeli ʻo e Fakataha Tokoni ʻAokalani ʻe 50 tupu, pea pehē ki he ngaahi komipiuta, pea aʻu ki he ʻū pasikala, naʻe ʻomi ki he Fale fakakolo naʻe ʻosi fakaleleiʻí (senitā).
Naʻe huufi e laipelí ʻi ʻOkatopa 2019, ʻi he kolo ko Kolovaí, mo ha palani kuo kamata ki ha laipeli hono ua ʻi ha kolo ofi atu pē.
Naʻe totongi pē ʻe Loni ʻene tikite fefolauʻaki ki Tongá, nofo tokotaha pē, pea mo foaki hono taimí mo ʻene ngaahi talēnití ke fokotuʻu e laipelí. Naʻá ne kamata ha ngaahi kalasi Lea-fakaPilitānia ʻi he fakaʻosinga ʻo e uiké, ngaahi polokalama maʻá e fānaú, ngaahi kalasi komipiuta mo e hisitōlia fakafāmili, kalasi fakataukei ʻi he tohi kole ngāué, pea aʻu foki ki hono totongi fakataimi atu ʻo e ngaahi pasikalá.
ʻOkú ne pehē, “ʻOku mahino he taimí ni ki he kakai Tongá ko e laipelí ʻoku ʻikai ko ha fale pē—ko ha feituʻu malu ia ki he tupulakí mo e fakalakalaká, ngaahi fehokotakiʻangá, mo e akó ʻi ha ngaahi ʻuhinga kehekehe.”
Kia Loni, ko e ʻuhinga ʻo e ngāue tokoni ʻofa fakaetangatá ko e: “ʻOfa ki he faʻahinga ʻo e tangatá, fakahoko ha ngaahi meʻa maʻá e lelei ʻo e faʻahinga ʻo e tangatá ʻo ʻikai kumi totongi . . . tatau ai pē pe ko e hā . . . pe ko e feituʻu ʻoku haʻu mei aí [ʻa e kakaí], pe ko e hā honau tūkungá. Pea ko ia ai, ko e meʻa ʻokú ne teke au ke u ngāue tokoni ʻofa fakaetangatá ko e ʻofa haohaoa ʻoku maʻu mei he ngāue tokoní.”
Pehē ʻe Loni, “Taha e ngaahi meʻa fakafiefia tahá ko ʻene hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Kapau ne ʻikai ke u maʻu ia, he ʻikai mahino kiate au ʻa e palani ʻa ʻeku Tamai Hēvaní pea mo ʻeku palaní, ke fakatonutonu fakataha [kinaua] pea ʻe lahi ange ia ʻi he meʻa ʻoku ou fakakaukau atu ki aí.”
Ko e ʻAho Toʻu Tupu ʻa e UN ko e faingamālie ia ke fakafiefiaʻi mo fakamālohia e ngaahi ngāue lavameʻa ʻa e kakai kei talavoú. Ko e ngaahi lavameʻa mo e ʻausia ʻa Loniana Fifitá ko ha sīpinga maʻongoʻonga ia ʻo e meʻa ʻe lava ke aʻusia ʻe ha taha kei talavou ʻi he loto-vēkeveke, talēniti, mo e ʻofa lahi.