Lipooti mei he Potungāue ʻAotita ʻa e Siasí, 2020
Ki he Kau Palesitenisī ʻUluaki ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní
Siʻi Kau Taki: Hangē ko ia ʻoku fakamatalaʻi ʻi he fakahā he vahe 120 ʻo e Tokāteline mo e Ngaahi Fuakavá, ʻoku fakamafaiʻi ʻe he Fakataha Alēlea ki Hono Fakaʻaongaʻi ʻo e Vahehongofulú—ʻa ia ʻoku kau ki ai e Kau Palesitenisī ʻUluakí, Kōlomu ʻo e Kau ʻAposetolo ʻe Toko Hongofulu Mā Uá, mo e Kau Pisopeliki Pulé—ʻa e fakamole kotoa pē ʻoku fai mei he paʻanga ʻa e Siasí. ʻOku vahevahe ʻe he ngaahi potungāue ʻa e Siasí e paʻangá ʻo fakatatau mo e ngaahi patiseti, tuʻutuʻuni, mo e ngaahi founga ngāue kuo fakangofuá.
Ko e Potungāue ʻAotita ʻa e Siasí, ko ha kau taukei tauhitohi kuo fakamoʻoniʻi pea tauʻatāina mei he ngaahi potungāue kotoa ʻa e Siasí, ko honau fatongiá ke fai e ngaahi ʻaotitá ʻo fakataumuʻa ke fakapapauʻi e ngaahi tokoni ʻoku maʻú, fakamole ne fakahokó, pea mo maluʻi e koloa ʻa e Siasí.
Fakatatau mo e ngaahi ʻaotita kuo fakahokó, ʻoku pehē ai ʻe he Potungāue ʻAotita ʻa e Siasí, ko e naunau kotoa pē, ngaahi tokoni ne maʻu maí, fakamole kuo fakahokó, pea mo e koloa ʻa e Siasí ki he taʻu 2020, kuo lekooti pea fakahoko ʻo fakatatau mo e ngaahi patiseti, tuʻutuʻuni, mo e ngaahi founga fakatauhitohi ʻa e Siasí kuo fakangofuá. ʻOku muimui ʻa e Siasí ʻi he ngaahi founga ʻoku akoʻi ki hono kau mēmipá ke moʻui ʻo fakatatau mo ha patiseti, fakaʻehiʻehi mei he fakamoʻuá, pea fakahū ha paʻanga ki he taimi ʻo e faingataʻá.
Fakahū atu ia ʻi he loto fakaʻapaʻapa moʻoni,
Potungāue ʻAotita ʻa e Siasí
Jared B. Larson
Talēkita Pulé