ʻEletā Sean Douglas

Fitungofulu Taki Māʻolunga

ʻI he hoko ʻa Soni Takilisi ko ha faifekau kei talavou ʻi he Misiona Chile Concepción, naʻe kamata ʻene ngāué ʻi he feituʻu tukuʻutá. Ko hono “ʻuluaki hoa fakafaifekau Silei mo e hoa taki leleí, naʻe fuʻu vave ʻaupito ʻene lea faka-Sipeiní.” Hili ha māhina ʻe tolu ʻo e ngāue ʻa ʻEletā Takilisi ʻi he fonua ʻi ʻAmelika Tongá, naʻá ne kei faingataʻaʻia pē ʻi he lea faka-Sipeiní.

Naʻe hoko ʻa e loto-foʻí mo e taʻelatá ke ne ongoʻi ai ha loto-veiveiua lahi pea fakatupunga ai haʻane lotu lahi. Naʻá ne lotu ʻo pehē, “ʻOku ʻikai te u fai ha lelei. ʻOku hangē ʻoku ʻikai ke u hoko ko ha ivi tākiekina lelei ki ha tahá.”

Naʻe fakafonu ʻaki hono lotó ha fehuʻi mālohi mei he langí: “ʻOkú ke ʻi hení Maʻaku, pe ʻokú ke ʻi hení maʻau?”

ʻI he taimi ko ʻení naʻá ne fakaleleiʻi ia mo e ʻOtuá ke ne fakangaloʻi ia kae toutou feinga pē. Naʻá ne pehē, “ʻI he pō pē ko iá naʻá ku misi ai ʻi he lea faka-Sipeiní.”

Naʻe faingofua ʻa e meʻa kotoa pē ʻi he ʻaho hono hokó. “Naʻe kiʻi sai ange ʻeku leá. Naʻe kiʻi mahino ha meʻa lahi ange kiate au,” ko ʻene fakamatalá ia. “Naʻe fakalahi ʻe he ngāue fakafaifekaú ʻa ʻeku fakamoʻoni ki he mālohi ʻo e lotú pea ko e taimi ʻokú ke ʻalu ai ʻo fai ʻa e meʻa ʻoku fekau ʻe he ʻEikí, ʻokú Ne ʻomi maʻu pē ha founga maʻau.”

Kuo tataki ʻe he fakakaukau ko iá ʻa e toenga ʻo ʻeku moʻuí.

Naʻe fāʻeleʻi ʻa Soni Takilisi ʻi he ʻaho 1 ʻo Mē 1964, ʻi Sōleki Siti, ʻIutā, kia Papulā mo Leo Takilisi. Naʻá ne tupu hake ʻi he fakahahake ʻo e Teleʻa Sōlekí, pea naʻá ne mali mo Petulisa ʻAna Tikisoni—ko hono ʻofaʻanga mei he ako māʻolungá—ʻi he Temipale Salt Lake ʻi Sune 1985. ʻOku ʻi ai ʻena fānau ʻe toko fā.

Naʻe ʻosi ʻa Takilisi mei he ʻUnivēsiti ʻo ʻIutaá mo ha mataʻitohi ʻi he ngāue fakatauhi paʻangá peá ne ngāue ko ha tokotaha ʻaotita kimuʻa peá ne ngāue ʻi ha taʻu ʻe tolungofulu ʻi he Huntsman Corporation, pea iku ʻo ne hoko ko ha tokoni palesiteni pule mo e ʻōfisa pule ki he meʻa fakapaʻangá.

Naʻe tuʻu fakamakatuʻu ʻene tui mo e falala ki he ʻEikí lolotonga ʻene kei talavoú mo e ngāue fakafaifekaú, pea tataki ia lolotonga ʻene hiki ʻo ngāue ʻi heʻene ngāue maʻuʻanga moʻuí ʻi ʻIngilaní, ʻa ia naʻá ne hoko ai ko ha pīsope kei talavou, mo ʻene hiki ki Hiusitoni, Tekisisi, USA. Naʻá ne hoko ko ha palesiteni ʻi he Misiona Lima South mei he 2012 ki he 2015. Naʻe hoko ʻa ʻEletā Takilisi ko ha Fitungofulu Fakaʻēlia kimuʻa ʻi hono uiuiʻi ko ʻení.