ʻEletā Carlos G. Revillo Jr.

Fitungofulu Taki Māʻolunga

Talu mei he kei siʻi ʻa ʻEletā Kālosi G. Levilo ko e Siʻí mo ʻene fakaʻamu ke ngāue fakafaifekau taimi kakato. Ka ʻi he ʻunivēsití, naʻá ne fakakaukau ke toloi ʻene ngāue fakafaifekaú ʻaki ha taʻu ʻe taha ke fakaʻosi hono mataʻitohi ʻi he ʻenisinia fakakemikale taʻu ʻe nimá mo lavaʻi ʻa e sivi tohi fakamoʻoni ako ʻa e poate fakafonuá. Naʻá ne kau ʻi he toko nima ne māʻolunga taha ʻenau maaka ʻi he siví pea maʻu mo ha ngaahi tuʻuaki ngāue lelei mei ha ngaahi kautaha fakavahaʻapuleʻanga.

“Lolotonga e taimi ko iá, naʻe pau ke u fehuʻi loto pē ʻiate au, ‘ʻOku ou loto moʻoni nai ke u ngāue fakafaifekau? ʻOku ou ʻiloʻi moʻoni nai ko Siosefa Sāmitá ko ha palōfita moʻoni ia pea ko e Tohi ʻa Molomoná ʻoku moʻoni ia?’” Naʻe pehē ʻe ʻEletā Levilo. “Naʻe pau ke u lotua mo fakamahuʻingaʻi moʻoni ʻa e meʻa ne u tui ki aí.”

Naʻá ne toki ʻilo kimui naʻe lotu mo ʻaukai ʻa ʻene faʻeé maʻana. Naʻe pehē ʻe ʻEletā Levilo, naʻe tākiekina ia ʻe he Laumālié.

Naʻá ne pehē, “Naʻe kakato ʻeku fakamoʻoní ʻi he taimi naʻá ku ngāue fakafaifekau taimi kakato aí. Ko e ngaahi tāpuaki kotoa kuó u maʻu he taimi ní ʻoku ou maʻu ia koeʻuhí ko e fili mahuʻinga ko iá.”

Naʻe fāʻeleʻi ʻa Kālosi Kāsia Levilo ko e Siʻí ʻi Sanitosi Siti, Filipaini, ʻi he ʻaho 8 ʻo Nōvema 1965, ʻe Kālosi G. Levilo ko e Lahí mo ʻAmapalo Levilo. Naʻá ne tupu hake ʻi Senilolo Sanitosi, ngāue fakafaifekau taimi kakato ʻi he Misiona Philippines Bacolod, pea mali mo Melitesa ʻEnilike Fenanitō Levilo ʻi he Temipale Manila Philippines ʻi he 1989. ʻOkú na maʻu ha fānau ʻe toko fā.

Naʻe maʻu ʻe ʻEletā Levilo ha mataʻitohi BA ʻi he ʻenisinia fakakemikalé mei he ʻUnivēsiti Sanitō Tōmasí ʻi Manila ʻi he 1986. Kuó ne ngāue ʻi ha taʻu ʻe 22 ʻi he ngaahi lakanga pule ʻi he Procter & Gamble ʻi he ʻOtu Filipainí, ko e vahefonua ʻĒsia-Pasifikí, pea mo e ʻōfisi pule ʻa e kautahá ʻi he ʻIunaiteti Siteití. Kuó ne ngāue foki ko e pule ʻi he ngaahi ngāue ki he lelei, malu ʻo e meʻatokoní mo e meʻa fakalaó ʻi he Kautaha Kellogg ʻi ʻĒsiá.

Naʻe hoko ʻa ʻEletā Levilo ko e pule ki he uelofea mo e moʻui fakafalala pē kiate kita ʻa e Siasí ʻi he ʻOtu Filipainí ʻi he taimi ʻo hono uiuiʻí, kuó ne hoko ko ha pīsope, palesiteni fakasiteiki, faiako semineli, aleaʻanga māʻolunga, mo e palesiteni ʻo e Misiona Philippines Quezon City mei he 2013 ki he 2016.