ʻEletā Alfred Kyungu

Fitungofulu Taki Māʻolunga

ʻI he 1991, naʻe hoko ʻa ʻAlifeleti Kaiungu ko ha tokotaha ako taʻu 24 ʻi he ʻUnivēsiti ʻo Lupamipasí ʻi he Lepupelika Fakatemokalati ʻo Kongokoú, ʻo ne nofo mo ʻene faʻētangata ko Politoa Ngoí. ʻI ha ʻaho ʻe taha naʻe tala ange ʻe heʻene faʻētangatá fekauʻaki mo ha ʻapoinimeni mo ha ongo faifekau mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Naʻe tala ange ʻe heʻene faʻētangatá, “ʻOua naʻá ke liʻaki ʻa e faingamālie lelei ko ʻení.”

Ne ʻikai fuoloa mei ai naʻá ne fakataha maʻu pē mo ʻene faʻētangatá mo ha ongomātuʻa faifekau matuʻotuʻa mei ʻIutā. ʻI he kamataʻangá, naʻe veiveiua ʻa ʻAlifeleti ke kau ki ha tui fakalotu foʻou mei muli. Ka ʻi he hili ha māhina ʻe ono ʻo e akoʻí mo e tali e ngaahi fehuʻi kehekehé, naʻe papitaiso ʻa ʻAlifeleti mo ʻene faʻētangatá ʻi he ʻaho 21 ʻo Sepitema 1991.

Naʻe ʻikai ke faingofua e kau ki he Siasí ʻi ha ngaahi founga ʻe niʻihi. Naʻe huʻuhuʻu ha kakai tokolahi ʻi he tukui koló fekauʻaki mo e Siasí pea nau fifili pe ko e kau ngāue fakamisiteli koā e kāingalotu ʻo e Siasí pe ko ha tui faka-Kalisitiane moʻoni koā ia. Ko e meʻa mālié, he naʻe angaʻofa mo fofonga malimali ʻa e kāingalotú ʻi honau kiʻi kolo tokosiʻí. Naʻe maʻu ʻe ʻEletā Kaiungu mo ʻene faʻētangatá ha mālohi mei “hono akoʻi kiate kinaua ʻa e ngaahi tefitoʻi moʻoni ne akoʻi ʻe Sīsū Kalaisí.”

Naʻe mali ʻa ʻEletā Kaiungu mo Lusi Kapulo Malale ʻi he 1998. Naʻá na sila ʻi he Temipale Johannesburg South Africa ʻi he 2004. ʻOku ʻi ai hona ʻofefine ʻe toko ua mo ha foha ʻe toko taha.

Naʻe fāʻeleʻi ʻa ʻAlifeleti Kaiungu Kipamipā ʻi Kamina, Lepupelika Fakatemotakalati ʻo Kongokoú ʻi he ʻaho 31 ʻo ʻOkatopa 1966 kia Tomisieni Kaiungu Nakima mo Selesitaine Ngoi Mapui.

Naʻe maʻu ʻe ʻEletā Kaiungu ha mataʻitohi BA mo e MA ʻi he saienisi sōsialé mo e ngaahi vā fakavahaʻapuleʻangá mei he ʻUnivēsiti ʻo Lupamipasí. Naʻá ne ngāue ʻi ha ngaahi lakanga fakapuleʻanga kehekehe ʻi he Lepupelika Fakatemokalati ʻo Kongokoú pea ki he Siasí naʻá ne hoko ko ha kouʻōtineita ki he seminelí mo e ʻinisititiutí pea mo ha pule ʻi he hisitōlia fakafāmilí.

Naʻá ne hoko ko ha Fitungofulu Fakaʻēlia ʻi he taimi naʻe uiuiʻi ai iá, kuó ne hoko foki ko ha faiako ʻinisititiuti, faiako Lautohi Faka-Sāpate ʻi he uōtí, tokoni ʻi he kau pīsopelikí, aleaʻanga māʻolunga, tokoni ʻi he kau palesitenisī fakasiteikí, mo e palesiteni ʻo e Misiona Democratic Republic of the Congo Mbuji-Mayi mei he 2016 ki he 2019.