Feau ʻe he ʻŪ Makasiní ʻa e Ngaahi Fiemaʻu Fakaemāmani Lahí

Ko e ʻū makasini ʻa e Siasí naʻe fokotuʻutuʻu foʻou ko e pulusinga fakaemāmani lahi ʻe tolu ʻo kamata ʻi Sānuali 2021, ʻoku nau tufaki e ngaahi pōpoaki mei he kau taki ʻo e Siasí ʻa ia ʻoku “ʻaonga mo taimi tonú,” ʻo fakatatau mo e fakamatala ʻa ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻá ne pehē, ʻoku maʻu ʻe he ʻū makasini foʻou maʻá e fānaú, toʻu tupú, mo e kakai lalahí ha “mālohi fakalaumālie mo fakatokāteline.” ʻOku poupouʻi ʻe he ngaahi tefitó ʻa e naunau fakalēsoni Haʻu, ʻo Muimui ʻIate Aú mo e ngaahi meʻa mahuʻinga kehe pē.

Naʻe pehē ʻe he Kau Palesitenisī ʻUluakí ʻi ha tohi ʻo hono fanongonongo ʻo e ʻū makasini foʻoú, “Ko e ʻū makasini ʻa e Siasí ko ha maʻuʻanga tokoni mahuʻinga ia ki he ako fekauʻaki mo e ongoongolelei ʻo Sīsū Kalaisí pea mo hono ongoʻi ʻa e fiemaʻu ke kau mai ki Hono Siasí. Ko ʻemau fakaʻamú ke lesisita ʻa e kāingalotu ʻi he tapa kotoa pē pea talitali lelei ʻi honau lotó mo e ngaahi ʻapí ʻa e ivi tākiekina ko ʻeni ki hono pouaki ʻo e tuí.”

ʻI he taimi ní, ʻoku hanga ʻe he Liahona, maʻá e kakai lalahí; Ki Hono Fakamālohia ʻo e Toʻu Tupú, maʻá e toʻu tupú; pea mo e Kaumeʻá, maʻá e fānaú, ʻo ʻai ke malava he taimí ni ʻa e:

Ngaahi fāmili ʻi he fonua ʻe 150 ʻo maʻu ʻa e faingamālie ke lesisita ki he ʻū makasini ʻoku fakatefito pē maʻá e fānaú mo e toʻu tupú.
[Kāingalotú] ʻo maʻu tuʻo lahi ange ʻa e ʻū makasiní ʻi ha ngaahi feituʻu mo e lea fakafonua ʻe niʻihi.
Kāingalotú ʻo maʻu e ngaahi pōpoaki tatau pē ʻo fakafou ʻi he ngaahi makasini fakaemāmani lahí.
Ngaahi fakamatala ʻi he makasiní ke fakautuutu ange ʻa ʻene faingamālie ʻi he fakaʻilekitulōniká mo e pākí fakatouʻosi.

ʻOku poupouʻi ʻa e kau taki fakalotofonuá ke nau totongi ha lesisita taʻu ʻe taha maʻá e kau papi ului foʻoú ke nau maʻu ha makasini ʻoku feʻunga mo honau toʻú pea mo totongi ha lesisita ʻo e Kaumeʻá pe Ki Hono Fakamālohia ʻo e Toʻu Tupú maʻá e fānau mo e toʻu tupu ʻoku nau maʻulotu taʻe-kau ai ʻenau mātuʻá.¹