ʻOku Fakatupu ʻe he Ngaahi Polokalama ʻoku Fakahoko ʻi he ʻInitanetí ʻa e Uouangatahá

Kuo fakatupu ʻe he ngaahi polokalama ʻoku fakahoko ʻi he ʻinitanetí ha ngaahi faingamālie lahi maʻá e kāingalotu ʻo e Siasí ke nau ongoʻi ʻoku nau uouangataha ʻi he ngaahi taumuʻa mo e mahino ʻo e ongoongoleleí.

Kaumeʻa ki he Kaumeʻa

Ko e polokalama ko ʻeni maʻá e fānaú, mātuʻá, mo e kau takí naʻe fakapaʻanga ia ʻe he Kau Palesitenisī Lahi ʻo e Palaimelí, pea naʻe tataki ia ʻe ha kiʻi tamasiʻi mo ha kiʻi taʻahine naʻá na lea ʻi heʻena lea fakafonuá ʻa e lea faka-Pilitāniá, faka-Sipeiní, pe faka-Potukalí. Naʻe fakahoko ʻe ha fānau ʻe niʻihi mo ha ngaahi lipooti mei ha feituʻu pau ʻi he funga ʻo e māmaní. Naʻe kau ʻi he fakaʻaliʻalí ha ngaahi talanoa vitiō fekauʻaki mo Sīsū Kalaisi, ko ha pōpoaki maʻá e fānaú meia Palesiteni Lāsolo M. Nalesoni, ko ha ʻinitaviu mo ʻEletā ʻUlise Soalesi ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e ngaahi fuakava ʻo e papitaisó, mo ha ngaahi fealeaʻaki mo e Kau Palesitenisī Lahi ʻo e Palaimelí. Naʻe kau foki ai ha ngaahi lēsoni tā fakatātā, ngaahi ʻekitivitī fakaʻaati, mo e hiva. Kuo ʻosi liliu ʻa e polokalamá ki ha ngaahi lea fakafonua lahi pea ʻoku lava ke mamataʻi ia. ʻE malava foki ke maʻu ia ʻi ha ngaahi konga kuo fakanounou ke fakaʻaongaʻi ʻi hono ako e ongoongoleleí ʻi ʻapí.

Kātoanga ʻa e Kau Finemuí

Naʻe fakahoko ʻe he Kau Palesitenisī Lahi ʻo e Kau Finemuí ha polokalama ʻi he ʻinitanetí ke fakaʻilongaʻi ai e taʻu 150 ʻo e houalotu ʻo e Kau Finemuí. Naʻe fakamafola ia ʻi he ngaahi lea fakafonua ʻe 11. Naʻe fakahoko ai ʻe Palesiteni Nalesoni ha pōpoaki ne hiki vitiō, pea naʻe tali ʻe he kau taki ʻo e Kau Finemuí ha ngaahi fehuʻi ʻi he lea faka-Pilitāniá, faka-Sipeiní, mo e faka-Potukalí. Naʻe fakahoko ʻe ha ongo finemui ʻi Noaue mo Taileni ʻa e lotú. ʻI he 2020, naʻe poupouʻi ʻa e kau finemui ʻi he funga ʻo e māmaní ke nau fakahoko ha ngāue tokoni ʻe 150.

RootsTech Connect

Naʻe laka hake ʻi he lau milioná ʻa e kakai ne nau manako ke ngāue ʻi he hisitōlia fakafāmilí ʻa ia ne nau kau ki he polokalama ʻa e RootsTech naʻe fakahoko ʻi he ʻinitanetí ʻi Fēpueli 2021. Ne hoko ia ko e kātoanga lahi taha ʻo e hisitōlia fakafāmilí ʻi he māmaní ʻa ia kuo tokolahi taha e niʻihi kuo kau ki aí. Kuo tokoniʻi ʻe he RootsTech ʻa hono fokotuʻu ʻo ha laipeli akoʻanga ʻi he ʻinitanetí ʻa ia ʻe ʻatā ke fakaʻaongaʻi ʻi he taʻú kakato. Naʻe hoko ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá mo hono uaifi ko Petulisá ko e ongo lea fakalāngilangi ʻo e ʻAho ʻo hono ʻIloʻi ʻo e Fāmilí (Family Discovery Day), ʻa ia ko ha konga ia ʻo e fakataha fakataʻú.

Kātoanga Hiva ʻa e Toʻu Tupú

Naʻe kau ʻi he Kātoanga Hiva fakaemāmani lahi ʻa e Toʻu Tupú naʻe fakahoko ʻi Māʻasí ha ngaahi talēniti hiva mo e ngaahi fakamoʻoni. Naʻe tataki ʻa e polokalamá ʻe he toʻu tupu mei Nuʻu Sila, Palāsila, ko e Lepupelika Tominikení, Siamane, ʻAfilika Tonga, mo e ʻOtu Filipainí, ʻa ia naʻe fakatefito ʻi he kaveinga ʻa e toʻu tupu ʻo e Siasí ki he 2021, “Ko Ha Ngāue Lahi” (vakai, Tokāteline mo e Ngaahi Fuakava 64:33–34). Naʻe ʻikai ke ngata pē ʻi he hiva mo e ngaahi pōpoaki ʻa e toʻu tupú ne fakatefito ʻia Kalaisí, ka naʻa nau fanongo foki meia Palesiteni Nalesoni; Palesiteni Poni H. Kōtoni, ko e Palesiteni Lahi ʻo e Kau Finemuí; mo Palesiteni Sitīveni J. Lani, Palesiteni Lahi ʻo e Kau Talavoú.

Ngaahi Faingamālie maʻá e Kakai Fefiné

Naʻe hoko ʻa Palesiteni Sini B. Pingihemi,ʻa e Palesiteni Lahi ʻo e Fineʻofá, ko e lea fakalāngilangi ʻi he fakataha fakataʻu hono nima ʻo e ʻAho Fakaemāmani Lahi ʻo e Kakai Fefine ʻi he Tipilomētiká. Naʻe fakahoko ʻa e polokalamá ʻi he ʻinitanetí mei Losi ʻEniselesi, Kalefōnia, USA, pea naʻe fakapaʻanga ia ʻe he konisela lahi ʻo e Lepupelika ʻo Senekalí. Naʻe lea ʻa Palesiteni Pingihemi ki he kau taki fakapisinisi fakavahaʻapuleʻangá mo e kau fakafofonga fakatipilomētika ne kau aí ko e akó ʻa e meʻa mahuʻinga taha ki he lavameʻa ʻa e kakai fefine mo e fānau fefine ʻi he funga ʻo e māmaní. Naʻá ne vahevahe ha ngaahi sīpinga ʻo e kakai fefine kuo faitāpuekina ʻe he polokalama ʻa e Siasí ki hono Akoʻi e Tohí mo e Laukongá ʻi he Ongoongoleleí.

Ngaahi Koniseti Faka-Kilisimasí

Naʻe fakahū mai ʻe he kāingalotu ʻo e Siasí mo e ngaahi kaungāmeʻa mei he ngaahi siasi kehe ʻi he funga ʻo e māmaní ha ngaahi vitiō fakaʻaliʻali faka-Kilisimasi ʻa ia naʻe liliu ki ha ngaahi koniseti pea fakamafola ʻi he ChurchofJesusChrist.org ʻi he lolotonga e faʻahitaʻu Kilisimasí ko ha konga ʻo e kemipeini faka-Kilisimasi fakataʻu ʻo e Light the World.