Pōpoaki Fakafeʻiloakí
Talitali lelei kimoutolu ki he konifelenisi lahí pea mo e tāpuaki ʻo e fanongo ki he leʻo ʻo e ʻEikí.
Siʻoku kāinga ʻofeina, mo e ngaahi kaungāmeʻa he funga ʻo e māmaní, ʻoku ou talitali lelei fakataautaha kimoutolu ki he konifelenisi lahí ni. ʻOku tau fakataha mai ko ha fāmili fakaemāmani lahi mo ha loto-holi ke moihū ki hotau ʻEiki mo e Fakamoʻui ko Sīsū Kalaisí. Fakamālō atu ʻi hoʻomou kau maí.
Kuo fakahisitōlia ʻa e taʻu ko ʻeni ne toki ʻosí. ʻOku ʻikai ha veiveiua kuo tau ako ha ngaahi meʻa ne teʻeki ke tau ʻilo kimuʻa. Ko e ngaahi lēsoni ʻe niʻihi ne u ʻiloʻi kimuʻá kuo tohi tongi ia ʻi hoku lotó ʻi ha ngaahi founga foʻou mo ʻaonga.
Hangē ko ʻení, ʻoku ou ʻilo fakapapau ʻoku tataki ʻe he ʻEikí ʻa e ngaahi meʻa ʻo Hono Siasí. Naʻá Ne folofola, “Te u fakahā [kiate kimoutolu] ʻoku ou mafai ke [fakahoko] ʻa ʻeku ngāue pē ʻaʻakú.”1
Kuó u mātā mo hoku ongo tokoní ʻi he loʻimataʻia, ʻi Heʻene tokonia homau ngaahi tūkunga mātuʻaki faingataʻaʻiá hili ia ʻemau fakahoko homau lelei tahá pea ʻikai toe lava ʻo fakahoko ha meʻá. ʻOku fakaofo moʻoni kiate kimautolu.
ʻOku mahino lelei ange foki he taimí ni kiate au ʻa ʻEne ʻuhingá ʻi Heʻene folofola, “Vakai, te u fakavavevaveʻi ʻa ʻeku ngāué ʻi hono taimí.”2 Kuó u toutou fiefia ʻi Heʻene tataki mo fakahoko hono fakavaveʻi ʻa ʻEne ngāué—ʻo aʻu ki he lolotonga ʻo ha mahaki fakaʻauha fakaemāmani lahi.
Siʻoku kāinga ʻofeina, ʻoku fakatefito e mālohi ʻo e Siasí ʻi he ngaahi ngāue mo e ngaahi fakamoʻoni fakatupulaki ʻa hono kāingalotú. ʻOku tanumaki lelei taha e ngaahi fakamoʻoní ʻi he ʻapí. Lolotonga e taʻu ko ʻeni kuohilí, kuo fakatupulaki lahi ʻe hamou tokolahi ʻa e ako ʻo e ongoongoleleí ʻi homou ngaahi ʻapí. ʻOku ou fakamālō atu, pea ʻe fakamālōʻia kimoutolu ʻe hoʻomou fānaú.
ʻOku kei hoko atu pē ʻa e ngāue lahi ke fakaleleiʻi ʻa e Temipale Salt Lake. ʻOku ou vakai tonu mei hoku ʻōfisí ki he ngāue ʻoku fakahoko ʻi he kelekele ʻo e temipalé.
ʻI heʻeku mamata ki hono keli ʻe he kau ngāué ʻa e akaʻi ʻakau motuʻá, pamu vaí, uaeá, mo ha fauniteni ne mamá, kuó u fakakaukau ki he fiemaʻu ke tau takitaha siʻaki ʻa e ngaahi meʻa taʻeʻaonga ʻi heʻetau moʻuí, ʻaki e tokoni ʻa e Fakamoʻuí.
Ko e ongoongolelei ʻo Sīsū Kalaisí ko ha ongoongolelei ia ʻo e fakatomala.3 Koeʻuhí ko e Fakalelei ʻa e Fakamoʻuí, ʻoku ʻomi ʻe Heʻene ongoongoleleí ha fakaafe ke hokohoko atu e liliú, tupulakí, mo e hoko ʻo maʻa angé. Ko ha ongoongolelei ia ʻo e ʻamanaki lelei, faifakamoʻui, mo e fakalakalaka. Ko ia ai, ko e ongoongoleleí ko ha pōpoaki ia ʻo e fiefia! ʻOku fiefia hotau laumālié ʻi he kiʻi laka ki muʻa kotoa pē ʻoku tau fakahokó.
Ko e konga ko ia ʻo hono tānaki fakataha ʻo ʻIsilelí, pea ko ha konga mātuʻaki mahuʻinga, ʻa e fekau ko ia kiate kitautolu ko e kakai ke tau moʻui taau mo loto-fiemālie ke tokoni ke teuteuʻi e māmaní ki he Hāʻele ʻAnga Ua Mai ʻa e ʻEikí.
ʻI heʻetau fakafanongo ki he ngaahi pōpoaki kuo teuteuʻi fakalelei ʻe hotau kau takí ʻi he fakahinohino ʻa e Laumālie Māʻoniʻoní, ʻoku ou fakaafeʻi kimoutolu ke mou lotua ke ʻiloʻi ʻa e ngaahi meʻa ʻoku taʻeʻaonga ʻoku fie maʻu ke siʻaki mei hoʻomou moʻuí kae lava ke mou moʻui taau ange.
ʻOku ou ʻofa atu siʻoku kāinga ʻofeina, pea ʻoku ou fakamoʻoni ʻoku ʻafioʻi mo ʻofa fakataautaha ʻetau Tamai Hēvaní mo Hono ʻAlo ʻOfaʻangá ʻiate kimoutolu. ʻOkú Na mateuteu ke tokoniʻi kimoutolu ʻi he foʻi laka ki muʻa kotoa pē ʻoku mou fakahokó. Talitali lelei kimoutolu ki he konifelenisi lahí pea mo e tāpuaki ʻo e fanongo ki he leʻo ʻo e ʻEikí. ʻI he huafa ʻo Sīsū Kalaisí, ʻēmeni.