ʻEletā Michael A. Dunn

Fitungofulu Taki Māʻolunga

Naʻe vete ʻa e ongomātuʻa ʻa ʻEletā Maikolo A. Taní ʻi heʻene kei siʻí, ka ʻi heʻene tupu hake mo ʻene faʻeé, naʻe akoʻi ange ʻe heʻene faʻeé ʻa e tui mālohí mo e ngaahi tuʻunga ʻulungaanga mahuʻingá. Hili haʻane ako ʻi ha akoʻanga ʻa e ʻEpisikapoliané ʻi Sōleki Siti, ʻIutā, USA, naʻá ne hiki ki ha akoʻanga māʻolunga ʻa e puleʻangá, ʻa ia naʻá ne fetaulaki ai mo ha kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

ʻI hono talitali lelei ʻa Maikolo ʻe hono ngaahi kaungāmeʻa foʻoú mo ʻenau ngaahi mātuʻá, naʻá ne fakaʻamu ke ako fekauʻaki mo e Siasí. Naʻe faifai peá ne fili ke feʻiloaki mo e ongo faifekaú. Naʻá ne pehē, naʻe hoko ʻena ngaahi akoʻi fekauʻaki mo e Toluʻi ʻOtuá mo e ʻUluaki Mata Meʻá-Hā-Mai ʻa Siosefa Sāmitá ke ne “tākiekina mālohi au.”

Naʻá ne ʻiloʻi ʻa hono moʻoni ʻo e ongoongoleleí ʻi heʻene faʻa lotua iá, pea naʻe papitaiso ia lolotonga hono taʻu fakaʻosi ʻi he akoʻanga māʻolungá. Talu mei ai, kuo “lehilehiʻi [ʻa ʻEletā Tani] ʻe ha kau takimuʻa lelei.”

ʻOkú ne fakatokangaʻi foki ʻa e tokaimaʻananga ʻa e Tamai Hēvaní mo e Fakamoʻuí ki heʻene moʻuí. Naʻe pehē ʻe ʻEletā Tani, “Ko ha tokotaha au ʻoku tui. ʻOku ou monūʻia ke u hoko ko ha fakamoʻoni ʻo Sīsū Kalaisi pea talaki ʻEne moʻuí, ʻEne angaleleí, mo ʻEne ongoongolelei kuo fakafoki maí he ʻahó ni.”

Naʻe fāʻeleʻi ʻa Maikolo ʻOsitini Tani ʻi he ʻaho 5 ʻo Māʻasi 1958 kia Petulisa mo Sēmisi R. Tani ʻi Takisoni, ʻAlesona, USA. Naʻá ne tupu hake ʻi Sōleki Siti. Hili haʻane ngāue fakafaifekau taimi kakato ʻi he Misiona Hawaii Honolulu, naʻá ne mali mo Linitā Veisinia Polusoni ʻi he 1980 ʻi he Temipale Salt Lake. ʻOkú na maʻu ha fānau ʻe toko tolu.

Naʻe maʻu ʻe ʻEletā Tani ha mataʻitohi BA ʻi he founga fetuʻutakí ʻi he 1981 mo ha mataʻitohi MA ʻi he fetuʻutakí ʻi he 2008, naʻe maʻu fakatouʻosi ia mei he ʻUnivēsiti ʻo ʻIutaá. Naʻá ne pule lahi ʻi he KUED (PBS ʻIutā), palesiteni ʻo e Dunn Communications Inc., pea kimuí ni maí naʻá ne hoko ko e talēkita pule ʻo e BYUtv mo e BYU Radio.

Naʻe hoko ʻa ʻEletā Tani ko ha Fitungofulu Fakaʻēlia ʻi he taimi naʻe uiuiʻi ai iá, kuó ne hoko ko ha pīsope, tokoni ʻi he kau pīsopelikí, palesiteni fakasiteiki, palesiteni ʻo e Kau Talavou he uōtí, aleaʻanga māʻolunga, mo ha palesiteni fakamisiona ʻi he Misiona South Africa Johannesburg mei he 2014 ki he 2017.