ʻOku ʻOmi ʻe he Ngaahi Ngāue Tokoni ʻOfa Fakaetangatá ha Fakafiemālie

ʻOku hokohoko atu e ngāue ʻa e Siasí ke tokoniʻi ʻa e niʻihi faingataʻaʻia ʻi he funga ʻo e māmaní pea mo fai ha tokoni ʻofa fakaetangata lolotonga e ngaahi taimi faingataʻá.

ʻI he ngāue tokoni ʻofa fakaetangata lahi taha ʻi he hisitōlia ʻo e Siasí, kuo tokoniʻi ai ʻe he Ngaahi Kautaha Tokoni ʻOfa ʻa e Siasí (ʻa e nima tokoni ʻofa fakaetangata ʻo e Siasí) ha kakai tokolahi lolotonga e mahaki fakaʻauha fakaemāmani lahi ʻo e COVID-19, ʻo ʻoatu ai ha paʻanga mo e naunau ke tokoni ki hono maluʻi mo faitoʻo ʻo e mahakí. Kuo ʻomi ʻe he ngāué ni ha naunau mo e ako ngāue ki he kau mataotao ki hono tokangaekina ʻo e moʻui leleí, ʻo kau ai ʻa e fakahinohino ki he founga ke fai ai ha tokoni fakatuʻasino, fakaeʻatamai mo fakaelotó.

Kuo liliu ʻa e ʻū falengāue ʻo e Siasí ʻoku ngaohi ai ʻa e meʻakai kapá mo fakatolonga meʻakaí ke nau feau e ngaahi fiemaʻu ʻoku fakautuutú, ʻo fakatupunga ai ha malava ke maʻu ʻa e naunaú mo e koloá ʻi he taimi ʻe fie maʻu ai ʻe he kau taki ʻo e Siasí, ngaahi kautaha ʻi he tukui koló, polokalama fafanga ʻa e akó, tauhiʻanga meʻatokoní, mo e ʻū kautaha kehe kuo hoa-ngāue mo e Siasí, ʻo kau ai ʻa e ngaahi puleʻangá, ngaahi kautaha fakavahaʻapuleʻanga ʻoku ʻikai puleʻi ʻe he puleʻangá, mo e ngaahi kulupu kehe ʻoku tokoni ʻofa fakaetangatá. ʻI he taimi ní, kuo tokoniʻi ʻe he Ngaahi Kautaha Tokoni ʻOfa ʻa e Siasí ha ngaahi ngāue tokoni ʻe 1,050 ki he COVID-19 ʻi he tukui fonua ʻe 152.

Talu mei he konifelenisi lahi fakamuimuí, kuo hanga ʻe he Ngaahi Kautaha Tokoni ʻOfa ʻa e Siasí mo e kau taki fakavahefonua mo fakalotofonua ʻo e Siasí ʻo:

Fokotuʻutuʻu ha kau ngāue tokoni ki he Nima Tokoní mo e ngaahi ngāue tokoni hili ha tō ha afā ʻe tolu ʻi he Matāfonua Kūlifa ʻo e ʻIunaiteti Siteití mei he fakatonga-hahake ʻo Tekisisí ki he muifonua ʻo Folōlitá.
Fengāueʻaki mo ha kau hoa-ngāue pea fakafekauʻaki mo e kau taki fakalotofonua ʻo e Siasí ke fai ha tokoni hili ha tō ha ngaahi afā mālohi ʻi he ʻOtu Filipainí. Ne fakaʻaongaʻi ha ʻū ʻapisiasi ʻe fāngofulu ʻo e Siasí ko ha ngaahi senitā hūfangaʻanga.
Tokoniʻi ha kakai naʻe uesia ʻi he mafola ʻa e velá ʻi ha ngaahi siteiki ʻe 23 ʻi Kalefōnia, ʻAitahō, ʻOlikoni, mo Uasingatoni, USA.
Fengāueʻaki fakataha mo ha hoa-ngāue ke ʻoatu ha meʻatokoni toni ʻe 180 ke tokoniʻi e kakai faingataʻaʻia ʻi Uaiomingi, Melilani, Misikeni, Nepulasikā, Kalolaina Tonga, Kololato, Masasūseti, mo Kalolaina Tokelau, USA.
Foaki ha paʻanga ʻAmelika ʻe 1 miliona ki he Salvation Army ke tokoni ki hono tufaki ʻo e meʻakaí ʻi ha ngaahi feituʻu ʻe 150 tupu ʻi he ʻIunaiteti Siteití.
Foaki ha meʻatokoni ki he ngaahi tauhiʻanga meʻatokoni fakalotofonua ʻe 200 ʻi Niu ʻIoke, USA.
ʻAve ha vala pauni ʻe 37,500 mo e meʻatokoni pauni ʻe 171,168 ki Honitula, ngāue fakataha mo e kau taki fakapuleʻangá mo e kau taki fakakoló ke tokoniʻi e kakai ne hao moʻui mei ha afā ʻe ua.
Tokoni ke fakapaʻanga ha ngaahi polokalama te nau ʻomi ha meʻatokoni ki ha houakai ʻe 30 miliona ki ha ʻū ʻapiako ʻi ha tukui fonua ʻe hiva ʻi ʻAfilika.
Fakapaʻanga ha foaki toto ʻe 200 ʻi he siteiti ʻe 14 ʻi he ʻĒlia Lotoloto ʻo e Siasí ʻi ʻAmelika Tokelaú.
Foaki ha paʻanga ʻAmelika ʻe $200,000 ke kumi ʻaki ha teunga maluʻi fakatāutaha maʻá e kau ngāue fakafaitoʻó mo e ʻū meʻa-maluʻi ki he ihú mo e ngutú maʻá e fānau ako ʻi Potisuaná. Naʻe tuitui ʻe ha ngaahi fakatahaʻanga lotu fakalotofonua ʻo e Siasí ʻe hongofulu-mā-taha ha meʻa-maluʻi ki he ihú mo e ngutú ʻe 8,000 ke tokoni ki he ngāué.
Foaki ha paʻanga tokoni ʻe $20 miliona ʻAmelika ko e poupou ki he tali fakaemāmani lahi ʻa e United Nations International Children’s Emergency Fund (UNICEF) ki he COVID-19, ʻa ia ʻe tokoni ke ʻomi ai ha ngaahi huhu maluʻi ki ha tukui fonua ʻe 196.
Tufaki ha meʻatokoni pauni ʻe 790,400; ʻū puha vai ʻe 17,000; ʻū fakamolū mohenga mo e ʻū naunau kehe ki he niʻihi faingataʻaʻia ʻi Tekisisi mo ʻOkalahomá ʻi he hili ia ha ngaahi afā mālohi he faʻahitaʻu momokó.