Toʻo Kongokonga Lalahi mei he Konifelenisi Lahi Fakataʻu Hono 191

Ko e konifelenisi lahi ʻa ia ne fakahoko ʻi he fakaʻosinga ʻo e uike Toetuʻú, naʻe fakatefito ia ʻi he Fakamoʻui ko Sīsū Kalaisí, ko hono fakamālohia ʻo e kāingalotú, pea mo e natula fakaemāmani lahi ʻo e Siasí.

Peesi 6: ʻI he lea talitali ʻa Palesiteni Lāsolo M. Nalesoní, naʻá ne pehē ai, “ʻOku tau fakataha maí ko ha fāmili fakaemāmani lahi mo ha holi ke hū ki hotau ʻEiki mo e Fakamoʻui ko Sīsū Kalaisi.” Naʻá ne fakamahinoʻi mai, “ʻoku fakatefito e mālohi ʻo e Siasí ʻi he ngaahi ngāue mo e ngaahi fakamoʻoni fakatupulaki ʻa hono kāingalotú.” ʻI he konifelenisí kakato, naʻe ʻilonga ʻa e feinga ʻa e kau taki ʻo e Siasí ke fakamālohia fakafoʻituitui ʻa e kāingalotú.
Peesi 79: Naʻe akoʻi ʻe Palesiteni Nalesoni he lolotonga ʻa e fakataha lakanga fakataulaʻeikí, ʻa e founga ʻe lava ke tau ngaohi ai hotau ʻapí ke hoko ko ha ngaahi potu māʻoniʻoní, “ko e senitā ki hono ako mo moʻui ʻaki ʻo e ongoongoleleí,” naʻa mo e taimi hili e ʻosi ʻa e mahaki fakaʻauha fakaemāmani lahí.
Peesi 101: ʻI he pōpoaki ʻa Palesiteni Nalesoni ʻi he pongipongi Sāpaté, naʻá ne fakamahinoʻi ai ko ha siasi fakaemāmani lahi ʻeni mo ha ongoongolelei ʻoku fakataumuʻa maʻá e kakai kotoa pē: “Ne tau fanongo ʻi he pongipongí ni mei he kau taki ʻo e Siasí ʻoku nau nofo ʻi he konitinēniti kotoa pē ʻi he māmaní ʻoku nofoʻí. Ko e moʻoni, naʻe fakataumuʻa e ngaahi tāpuaki ʻo e ongoongoleleí ki he faʻahinga, lea, mo e kakai kotoa pē . Ko e Siasi ʻo Sīsū Kalaisí ko ha siasi fakaemāmani lahi ia. Ko hotau takí ʻa Sīsū Kalaisi.”
Peesi 127: ʻIkai ke ngata aí, ka naʻe fakahaaʻi ʻa e ngāue ke fakamālohia ʻa e kāingalotú ʻi he fanongonongo ʻo ha ngaahi temipale foʻou ʻe 20. Naʻe pehē ʻe Palesiteni Nalesoni ʻi heʻene lea tukú, “ʻOku mau loto ke ʻoatu ʻa e fale ʻo e ʻEikí ke toe ofi ange ki hotau kāingalotú.” Ko e ngaahi temipale lahi taha ia kuo fanongonongo talu mei he 1998, ʻi he taimi ne fanongonongo ai ʻe Palesiteni Kōtoni B. Hingikelī ha ngaahi temipale ʻe 32, ʻo fakaava ai ha kuonga foʻou ʻo hono fakalahi ʻo e temipalé.
Peesi 139: Ki ha ngaahi sīpinga lahi ange ki he founga ʻoku feinga ai ʻa e Siasí ke fakamālohia ʻa e fānau kotoa ʻa e ʻOtuá, vakai ki he toʻo kongokonga lalahi ʻo e ngaahi ngāue tokoni ʻofa fakaetangata kehekehe naʻe fakakakato ʻi he 2020.