Hokohoko Atu e Fakalakalaka ʻa e Temipalé

ʻI he lea tuku ʻa Palesiteni Lāsolo M. Nalesoni ʻi he konifelenisi lahí, naʻá ne fanongonongo ai ha palani ke langa ha ngaahi temipale foʻou ʻe 20 ʻi he funga ʻo e māmaní (vakai peesi 127). Ko e fika māʻolunga ʻo e ngaahi temipale pau kuo fanongonongo fakaʻangataha kimuʻá ko e temipale ʻe 12 naʻe fanongonongo ʻe Palesiteni Nalesoni ʻi he ʻaho 7 ʻo ʻOkatopa 2018.

Naʻe fanongonongo ʻe Palesiteni Kōtoni B. Hingikelī ha ngaahi palani ke langa ha ngaahi temipale ʻe 32 ʻi he konifelenisi lahi ʻo ʻEpeleli 1998, ka naʻe ʻikai ke fakakau ai ʻa e ngaahi tuʻuʻanga ʻe langa aí.

Talu e hoko ʻa Palesiteni Nalesoni ko e Palesiteni ʻo e Siasí ʻi he 2018, kuó ne fanongonongo hono langa ha ngaahi temipale ʻe 69. Naʻá ne fanongonongo ha temipale ʻe 19 he taʻu ko iá, 16 ʻi he 2019, mo e 14 ʻi he 2020. ʻOku ʻi ai ha ngaahi temipale ʻe 43 ʻoku lolotonga langa pe fakaleleiʻi, pea neongo e mahaki fakaʻauha fakaemāmani lahí, ka naʻe tanupou ha ngaahi temipale foʻou ʻe 21 ʻi he 2020. Kuo ʻi ai ha temipale ʻe 251 he taimí ni ʻa e Siasí ne fanongonongo, lolotonga langa, pe lolotonga ngāue.

Naʻe ʻikai ke ngata pē ʻi hono fanongonongo ʻe Palesiteni Nalesoni ʻa e ngaahi temipalé, ka naʻá ne fakamatalaʻi ʻa e ngaahi tūkunga ʻe fā ki hono toe fakaava ʻo e ngaahi temipalé ʻi he fakaʻau ke holo hifo ʻa e mahaki fakaʻauhá.