Te mau parau niu o te ’evanelia

’Āmuira’a rahi : E putuputura’a nā te ’Ēkālesia ’ati a’e te ao nei

E fa’aro’o tātou i te mau peropheta ’e te tahi atu mau ti’a fa’atere nō te ’Ēkālesia i roto i te ’āmuira’a rahi. E ha’api’i rātou ia tātou e aha tā te Atua e hina’aro ia tātou ’ia fa’aro’o.

I te ’āva’e ’Ēperēra ’e te ’āva’e ’Ātopa ato’a, e fa’atupu te ’Ēkālesia i te tahi mau putuputura’a tei parauhia te ’āmuira’a rahi. E ha’api’i ’e e fa’a’ite pāpū te feiā fa’atere nō ni’a ia Iesu Mesia ’e tāna ’evanelia. E fa’atupuhia te ’āmuira’a rahi i Roto Miti, i Utaha, i te Fenua Marite, ’e e ha’apūrorohia te reira nā te ao ato’a nei, nā roto e 90 reo ’e hau atu. E anihia i te mau melo ato’a ’e i te mau ta’ata ato’a e hina’aro, ’ia haere mai e fa’aro’o i te mau a’ora’a.

Te mau ’āmuira’a mātāmua a te ’Ēkālesia

’Ua ha’amanahia te fa’ati’ara’a o te ’Ēkālesia i roto i te hō’ē putuputura’a i te 6 nō ’Ēperēra 1830 (hi’o Te Parau Ha’api’ira’a ’e te mau Parau Fafau 20). ’Ua fa’atupuhia te ’āmuira’a rahi mātāmua i te 9 nō Tiunu 1830. Mai taua taime ra, ’ua fa’atupuhia te mau ’āmuira’a rahi i raro a’e i te fa’aterera’a a te Peresideni o te ’Ēkālesia i te mau vāhi ato’a e nehenehe te mau melo e ha’aputuputu. I te mau matahiti 1840, ’ua ha’amata te feiā fa’atere i te fa’atupu i te ’āmuira’a e piti taime i te matahiti.

Mai te aha te huru te fa’anahora’a o te mau ’āmuira’a i teie mahana

E paraparau te Peresidenira’a Mātāmua, te pupu nō te Tino ’Ahuru Ma Piti ’āpōsetolo, ’e te tahi atu mau ti’a fa’atere o te ’Ēkālesia i roto i te ’āmuira’a rahi. Nā te Pupu hīmene nō te fare menemene i Temple Square ’e te tahi atu mau pupu hīmene e ha’apa’o i te mau hīmene. E pae tuha’a purera’a i roto i te ’āmuira’a tāta’itahi : E toru i te mahana mā’a ’e e piti i te sābati.

Te mau ha’api’ira’a a te feiā fa’atere

I roto i te mau ’āva’e hou te ’āmuira’a, e pure te feiā fa’atere o te ’Ēkālesia nō ni’a i te mea e ha’api’i atu. E fa’auru mai te Fatu ia rātou nō te ’ite e aha tā rātou e parau. E ha’api’i rātou i te mau parau mau nō te ’evanelia ’e e ani mai rātou ia tātou ’ia ha’apa’o i te mau fa’auera’a a te Atua. E fa’a’ite pāpū ato’a rātou nō Iesu Mesia ma te fa’aitoito ia tātou ’ia pe’e iāna.

Te ’apora’a i te ha’api’ira’a mai roto mai i te ’āmuira’a rahi

Hou te ’āmuira’a rahi, e nehenehe tātou e pure nō te fa’aro’o i te mea tā te Fatu e hina’aro ’ia ha’api’i mai tātou. ’A fa’aro’o ai tātou i te mau a’ora’a, e ha’api’i mai te Vārua ia tātou i te mea e tītauhia ia tātou ’ia ’ite. I muri a’e i te ’āmuira’a, e ’itehia te mau a’ora’a i ni’a ia ChurchofJesusChrist.org, i roto i te fa’anahora’a Vaira’a Buka ’evanelia, ’e i roto i te Liahona. E nehenehe tātou e tuatāpapa nā roto i te pure i te mau a’ora’a nō te ha’api’i rahi atu ā nō ni’a ia Iesu Mesia ’e tāna ’evanelia.

Nō roto mai i te mau pāpa’ira’a mo’a

’Ua ha’api’i Iesu Mesia ē, e ti’a ia tātou ’ia putuputu ’āmui pinepine (hi’o 3 Nephi 18:22).

’Ia ha’amori ’āmui ana’e te mau melo o te ’Ēkālesia, e pārahi mai te Fatu i rotopū ia rātou (hi’o Mataio 18:20).

’Ua fa’aue te Fatu i te mau melo o te ’Ēkālesia « e ha’api’i ’e e pāturu ia ’outou te tahi i te tahi » (Te Ha’api’ira’a Tumu ’e te mau Fafaura’a 43:8).

’A ha’apa’o maita’i ai te mau melo o te ’Ēkālesia ’e ’a fa’a’ohipa ai i te fa’aro’o i te Mesia, e pārahi mai tōna Vārua i rotopū ia rātou ’a putuputu ai rātou (hi’o Te Ha’api’ira’a Tumu ’e te mau Fafaura’a 44:2).

Tei roto ato’a i teie ve’a

Tē ti’aturi nei mātou ē, ’ua ’oa’oa ’outou i te ha’api’ira’a nō ni’a i te ’āmuira’a rahi. Teie te tahi atu mau parau nō te ’evanelia i roto i teie ve’a :

’Ohipa monora’a : Te ravera’a i te hō’ē ’ōro’a, mai te bāpetizora’a, i roto i te hiero nō te feiā ’aita i fāna’o ’ia fāri’i i te reira ’a ora ai rātou (hi’o ’api 17).

Fa’arava’ira’a iāna iho : E rave i te mau mea ato’a tā ’outou e nehenehe nō tō ’outou iho mau hina’aro (’api 24).

Parabole : E ’ā’amu ’o tē tauturu ia tātou ’ia ha’api’i mai i te hō’ē ha’api’ira’a faufa’a roa (’api 27).