Te tauturu nō te tahi pae mai o te pāruru
’A tārava noa ai au i roto i te māuiui i roto i te fare ma’i, ’ua ’ite au te ’ōtahira’a e tae roa i te taime ’a ha’amana’o ai au i tō’u mau tupuna here.
Hōho’a nā Guetty Images
I te matahiti 2017, ’ua hapu vau i tā māua tamari’i mātāmua. E ’oa’oa rahi tō māua tā’u tāne ’o Lucas, ’e ’ua ri’ari’a ato’a nō te taera’a mai ’o Juan Lionel iti.
I te hō’ē pō i te ’ōmuara’a o te ’āva’e Fepuare 2018, ’ua ha’amata vau i te māuiui. E va’u ana’e ’āva’e, mai te huru rā e haere mai tā māua ’aiū nā mua a’e i te taime i mana’ohia. ’Ua rave mai māua i te tahi mau mea ’e ’ua haere ’oi’oi i te fare ma’i. ’Aita vau i ineine nō te rave i teie ’ohipa, terā rā ’ua pure au ma te ani i te Atua ’ia ha’apa’ohia tōna hina’aro noa atu tō māua ri’ari’a.
I te taera’a māua i te fare ma’i, ’ua fa’aarahia tō’u taote fa’afānau, terā rā ’ua parau mai ’oia e taere ri’i ’oia. ’Ua niuniu tā’u tāne i tō māua nā metua ’e i te mau taea’e ’e te mau tuahine ’e ’ua fa’atae ia rātou i te parau poro’i nā roto i te niuniu, ’aita rā hō’ē a’e o rātou i ara atu ra. ’Ua tāmau noa ’oia i te niuniu ’e i te fa’atae i te mau parau poro’i i te roara’a o te pō, ’aita hō’ē a’e ta’ata i pāhono mai. Nā te reira i fa’atupu i te ’ōtahi rahi i roto iā’u.
’A rahi noa ai te māuiui, rahi noa ato’a atu tō’u ’ōtahira’a. Terā rā, i terā iho taime, tupu a’era te hō’ē ’ohipa nehenehe roa. ’Ua ha’amata vau i te feruri i tō’u mau tupuna—i tō’u iho ā rā māmā rū’au i te pae o tō’u māmā, ’o Rosa Mercado, ’e tōna metua vahine, ’o Javiera Balmaceda.
’A ha’amana’o ai au ia rāua, ’ua ’ite a’era vau i roto i tō’u ’ā’au ’e i tō’u ferurira’a ē, tei pīha’i iho rāua to’opiti iā’u i taua taime ra. ’Ua ’ite au ma te pūai ’e te hau rahi ē, tei pīha’i iho rāua iā’u, e’ita e ta’a iā’u e nāhea ’ia parau i te mea tā’u i fāri’i. ’Aita vau i ’ite ia rāua, ’ua ’ite rā vau ē, tei reira rāua, ma te hōro’a mai iā’u i te itoito, te pāturura’a, ’e te here ’ei nā metua vahine ’e ’ei melo nō tō’u ’utuāfare. ’Ua tupu te mana’o i roto iā’u e nā melahi aupuru rāua iā’u i roto i tō’u taime fifi.
E rave rahi matahiti nā mua atu, i roto i te hiero, ’ua rave tō’u metua vahine, te metua tāne, te mau taea’e ’e te mau tuahine, te tāne fa’aipoipo ’e ’o vau i tō rātou ’ohipa monora’a ’e te ’ohipa monora’a nō te tahi atu mau tupuna. ’Ua feruri au te itoito tā’u i fāri’i ’e te mana’o tei tupu i roto iā’u ē tei pīha’i iho tō’u mau tupuna iā’u, ’o te hō’ē ïa hōro’a nā roto i te mana ’e te ha’amanara’a o te Atua.
Mai taua taime ra, ’ua ’ite au i te vārua o tō’u mau tupuna i te tahi atu mau taime, i te tauturura’a mai iā’u ’e te arata’ira’a iā’u ’ei metua vahine ’e ’ei vahine fa’aipoipo ’e i roto i te tahi atu mau tuha’a faufa’a o tō’u orara’a.
Tē fa’a’ite pāpū nei au ē, e’ita roa te Atua e vaiiho noa ia tātou ’o tātou ana’e i ni’a i te ’ē’a o tō tātou orara’a. Mai te mea e rave tātou i tāna ’ohipa, e hōro’ahia mai ia tātou te tauturu nō te tahi pae mai o te pāruru. E fāri’i tātou i te here, te ’ite, te pūai, ’e te hau « ’o tei hau ’ē atu i te ’ite ta’ata nei » (Philipi 4:7).