Meu na Veivuke Vakacava me Ulabaleti na Lewa Vakatani?

Oqo e ono na sala eda rawa ni vakanadakuya kina na lewavakatani ka tutaka na veidokai.

women sitting in circle enjoying sharing stories in group meeting

Na Cava Au Rawa n Cakava me Ulabaleti kina na Lewavakatani?

1. Rai taumada e loma. Sa rawa ni da yalataka me da kila e lomada ka biuta laivi na “itovo kei na ivalavala ni lewavakatani.”¹

E kaya o Peresitedi Russell M. Nelson, “Kivei keda kece eda sa lewavakatani tiko ki na dua tale na kawatamata e gadrevi me veivutuni!”²

2. Vakasaqara mo kila vinaka. Taura na gauna mo vakarogoci ira era sa sotava na lewavakatani. Oqo e rawa ni oka kina na ivola, iyaloyalo yavala, kei na itukutuku me baleta na ulutaga.³

E dua na lewenilotu dokai o Darius Gray, e kai Amerika vaka Aferika ka iliuliu ni Lotu ka kaya, “Kevaka eda segata vakaidina me da rogoci ira ka da nanuma ni o ira ‘na tani,’ ka kevaka me da vakanamata ena yalodina me ra wasea mai na nodra bula, nodra itukutuku makawa, nodra matavuvale, nodra vakanuinui, kei na nodra mosi, ena sega walega ni da na rawata e dua na kilamatata levu cake, ia na ivakarau oqo ena cakacaka vakalevu me vueta na mavoa ni becanakawatamata.”⁴

3. Vosa cake. Kevaka o rogoca e dua ni wasea e dua na vakasama lasu se vakacalai me baleta na kawatamata, vosa cake ena yalovinaka ka matata.

E kaya kina o Peresitedi Dallin H. Oaks, na iMatai ni Daunivakasala ena Mataveiliutaki Taumada, “Ni da lewena na Lotu i Jisu Karisito ni Yalododonu Edaidai, e dodonu meda cakava me vinaka cake na noda veivuke ena kena vakacacani na becanakawa.”⁵

E vakavulica o Elder Gerrit W. Gong ena Kuoramu ni iApositolo Le Tinikarua, “Eda sa sureti meda veisautaka na vuravura me vinaka cake, mai loma ki tautuba, dua na tamata, dua na matavuvale, dua na itikotiko raraba ena dua na gauna.”⁶

Na Cava Au Rawa ni Cakava Kevaka Au Sa Sotava na Veivakaduiduitaki?

man in wheelchair communicates cheerfully with employees at the office

1. Veivosoti, ka rawata e dua na itokani. Ni da sa vakamavoataki mai na nodra ivalavala eso tale, sa rawa ni da vakavulica ka veivosoti ka segata me da tara cake e dua na veiwekani.

Ni veiqaravi tiko vaka-Vitusagavulu ni iWasewase, a kaya o Elder Fred A. ‘Tony” Parker: “Niu a vakacacani ena becinikawatamata, au sa kunea na qaqa ena kena sotavi e matana, vosota na tamata yadua ka qarava na leqa. Kevaka e dua e tukuna e dua na ka me vakararawataka na lomaqu, au gadreva meu kunea e dua na sala meu vukei koya me kila vinaka na vuna e mosi kina. E sa dua na madigi sega walega ni veivosoti ia me tarai cake e dua na veimaliwai me kakua walega ni raici Tony Parker na tamata oya me vaka e dua na kai Aferika-Amerika ia ni sa luve ni Kalou. A vakavulica o Jisu na veivosoti (raica na Maciu 18:21–35), ka vakavulici keda ena gauna eda a vakacudrui kina meda kauta ki na tamata yadua ka cakacakataka (raica na Maciu 18:15).”⁷

2. Vulica na lesoni veivukei mai na vikasotavi mosimosi (raica na Vunau kei na Veiyalayalati 122:7).

E talanoataki Howard Washington Thurman o Reverend Amos C. Brown. A vakaitikotiko tikiva e dua na marama ka vakacacana na nona matavuvale o Howard baleta ni rau a Loaloa—e a kolotaka sara ga yani na maniwa mai na nona bai ni toa ki na nodratou lomanibai na Thurman.

Ni sa tauvimate na marama, e a kauta vua o tinai Howard eso na supu kei na rosi. Ena vakavinavinaka, a taroga na marama oqo na vanua e kau mai kina na senikau. A vakamacalataka o Mrs. Thurman, “Ni ko kolotaka tiko na maniwa ni toa, sa vakarautaka tiko na qele na Kalou.”

“Oqori na ka meda cakava ena loma ni ca.” a kaya o Reverend Brown. “Taura na maniwa ia mo vakabauta na Kalou ni ra vakayagataka me vakatubura kina e dua na were ni rosi.”⁸

3. Vuki vei Karisito me vakabulai ka veituberi. Na vakararavi vua na iVakabula ena nomu mosi ka muri Koya ena rawa ni kauta mai na vakacegu.

E vakatavulica o Elder D. Todd Christofferson ena Kuoramu ni iApositolo Le Tinikarua ni ikuri ni nona vueti keda mai na ivalavala ca ni sauma na lalavaki ni lewa dodonu vie keda, o Jisu Karisito “sa mai vakaceguya talega na lewa dodonu e dinau tu vei keda ena nona vakabulai ka sauma lesu vei keda na rarawa kece eda sa vosota vakatawa cala.”⁹

Sa vakarautaka na iVakabula na ivakaraitaki uasivi sara me da muria. E vakavulica vei keda na veika me da cakava ni da vakacudrui (raica na Maciu 18:15), vakacacani (raica na Maciu 5:38–48), ka vakacacani sara mada ga vakatawadodonu me mate (raica na Luke 23:34).