Rūm̧m̧an Ded ro
Jino Kōperanļo̧k Kōļmenļo̧kjeņ n̄an Anjo̧
Rijeje eo ej jokwe ilo Seville, Spain.
Ijjan̄in kar en̄jake leļn̄o̧n̄ m̧ae iien eo ikar jepļaak n̄an kapijuknen jān mijen eo aō, kōn menin ikar jab jeļā kōn ekōjkan wōnm̧aanļo̧k.
Pija ko likūti jān m̧atōļ
Mour ekar wōnm̧aanļok ekkaar n̄an karōk.
Ekar epaak aō tōn kadedeļo̧k mijen eo aō. Ilo kar allōñ ko 18 m̧oktaļo̧k, naan in kam̧ool eo aō kar kōkajoorļo̧k, im visōn eo aō kōn karōk in lo̧mo̧o̧r ekar depakpakļo̧k. Ijjan̄in kar en̄jake aō epaakeļo̧k aō Rilo̧mo̧o̧r im Jema Ilan̄. Mour ekar āinwōt ekam̧ōņōņō.
M̧ool, baamle eo aō im n̄a kar ioon malijjon̄ ko am, bōtaab ilo aolep men, ikar lo̧udin̄din̄ im kar lōn̄ aō karōk ko kōn ta eo enaaj kar itok tokāļik. Bōtaab ikar ro̧o̧l n̄an kapijuknen. Im oktak eo ekar lukkuun in ļap. Ikar kakkōt ilo okoktak eo n̄an mour eo aolep raan. Ekar jab jem̧ļo̧k aō inepata kōn kōm̧m̧ani kāālet ko im jim̧we ilo pokake eo aō. Ikar lukkuun in kapene n̄an n̄a make n̄an pād wōt jon̄an eo eutiej ilo jetōb me ikar bōk ilo aolepān mijen eo aō kōnke ikar mijak bwe eļan̄n̄e iban, inaaj m̧ōjņo̧ļo̧k ilo mour in jetōb.
Ke jon̄an pen eo ikar likūr ilo n̄an make ekar ļapļo̧k, ikar jino en̄jake leļn̄o̧n̄ im wiwijet ekar jino. Raar jino aer ļapļo̧k im ļapļo̧k aer emakijkij, im āliktata ikar en̄jake āinwōt ikar maļon̄.
Ejerata, ikar ņooj en̄jake ko aō jān baam̧le eo aō im ro m̧ōtta. Ikar jeļā bwe leln̄o̧n̄ im inepata raar jet men ko jejab jook kaki, bōtaab ikar en̄jake ijaje in ita im jōbwābwe jon̄an ke em̧ool ikar jab jeļā ekōjkan kwaļo̧k ta eo ikar en̄jake n̄an kappok jipan̄.
Kam̧m̧oolol, Irooj ej aolep iien pād n̄an tōl kōj n̄e jej oktakļo̧k n̄an E. Ālkin jet kejekļo̧kjeņ im jar, ikar en̄jake im̧we n̄an jab ņooj jidik n̄an ļaddik eo jeiū im lio pāleen. Raaj jipan̄ eō kile bwe ikar āinwōt “udiākāk” ke ikar lōmņak im bwe kakkōt ko ilo en̄jake remaron̄ waļo̧k n̄an jabdewōt.
Sister Reyna I. Aburto, Rikakpilōklōk eo Kein Karuo ilo Būreejtōnji eo Eutiej an Doulul eo an Kōrā ro, ekar kam̧ool kōn m̧ool in: “Ro mōtta rejiten bōro, emaron̄ waļo̧k n̄an kōj aolep—eļaptata n̄e, āinwōt ritōmak ro ilo karōk in m̧ōņōņō, jej likūt eddo ko ejjeļo̧k tokjāer ippād ilo ad ļōmn̄ak bwe jej aikuj in wānōk. Kain ļōmn̄ak rōt kein remaron̄ tarjān jon̄an. Kajjieon̄ in wānōk ebōk juon iien aitok eo enij bōk jikin ilo aolepān mour ko ad im tal wōt—im ilo wōt jouj eo an Jisōs Kraist.”1
Juon Kūlaaj Ekar Im̧we
Ke ikar jar n̄an Jemedwōj Ilan̄ kōn tōl, ikar kile bwe ikar aikuj in leļo̧k kein jipan̄ ko E ekar litok n̄an kōj juon iien, im ikar aikuj in ekkatak im oktak n̄an em̧m̧anļo̧k. Ilo kam̧m̧oolol, ilo iien jab eo ekar wōr aō iien n̄an etal n̄an kūlaaj in kōperanļo̧k kōļmenļo̧kjeņ n̄an anjo̧. Iien eo em̧m̧an ekar āinwōt itok ilo iien eo ejetjet, im ijjab tōmak ekar juon jide.
Ilo bok in katak eo an kūlaaj eo, kōperanļo̧k kōļmenļo̧kjeņ n̄an anjo̧ ej kōmeļeļeik āinwōt kein:
-
“Maron̄ eo n̄an kōkarōkrōk n̄an apan̄ ko an en̄jake kōn peran im tōmak eo eioļapļap ilo Jisōs Kraist.
-
“Jipan̄ eok make im ro jet ijo em̧m̧an tata komaron̄ e.
-
“Kappukōt elōn̄ļo̧k jipan̄ eo kwoj aikuji.”2
Ilo bar juon wāween, kōperanļo̧k kōļmenļo̧kjeņ n̄an anjo̧ ej juon men eo jej aolep aikuji.
N̄an n̄a, kūlaaj in eim̧we ej juon kakōļļe ealikkar bwe Jemedwōj Ilan̄ ejeļā kōn mālijjon̄ ko jej jelm̧ai raan kein āinwōt ro uwaan Kabun̄ eo an Jisōs Kraist. E ekōņaan bwe en maron̄ jipan̄ kōj bun̄ m̧aanļo̧k wōt ilo iaļ eo ļo̧k n̄an E. Lo elōn̄ jekjek ko raiboojoj an kūlaaj in ekar jipan̄ eō kile ewi jon̄an m̧wilaļ in an Jemedwōj Ilan̄ jeļā kōj kajjojo im aikuj ko an kajjojo, im ekar m̧ōkaj aō en̄jake aenōm̧m̧an ke ikar jino ekkatak. Kūlaaj eo ej katakin m̧ool ko indeeo ralikkar im kajoor me emaron̄ jerbal n̄an mour ko ad n̄e jej jelm̧ae jorrāān ko an ājmour in kōļmenļo̧kjeņ, men̄e ej kōn kōj make ak juon eo jej iakwe.
Juon iaan katak me rekar pād wōt ippa loe ilo jepta 9, “Leļo̧k Kajoor n̄an Ro Jet.” Jepta in ej ta eo ekar jipan̄ eō āliktata n̄an kappok eļapļo̧k jipan̄. Ej katakin kōn pedped in katak eo an jerbal n̄an doon. Ikar ekkatak ewi jon̄an an kar aorōk n̄an jerbal n̄an ro jet kōn kōm̧man bwe ren en̄jake an aorōk en̄jake ko aer, en̄jake ko, im ļōmņak ko im pukōtļo̧k kōn maron̄ eo n̄an jeļā im meļeļe. Ikar barāinwōt kile bwe ikar aikuj in lōke ro jet n̄an jipan̄ eō ilo kakkōt ko aō.
Ke ikar maron̄ in likūt ļōmņak kein n̄an jerbal im jab ņooj jabdewōt n̄an baam̧le eo aō im ro m̧ōtta kōn kakkōt ko an ājmour in kōļmenļo̧kjeņ eo aō, ikar bwilōn̄ bwe raar kanooj in tenkwadik ilo jab ekajet. Ikar bōk ekanooj in ļap rejtak n̄an er.
Ij en̄jake an leļn̄o̧n̄ eo aō kar bōke juon jekjek eo em̧wilaļ ļo̧k im marok ļo̧k eļan̄n̄e ikar jab kwaļo̧k apan̄ ko aō ippān ro rejitōn bōro im en̄jake in ekar jipan̄ eō pukōt ļo̧k im meļeļe ippān ro jet kōn inepata ko im jorrāān ko barāinwōt.
Jelm̧ae Ilju im Jekļaj kōn Kōjatdikdik
Ij lo bwe ekōjak ke ikar ro̧o̧ltok jān mijen eo aō, ikar lukkuun in inepata kōn an naaj luuji “eddōkļo̧k ilo jetōb” me ikar bōke ilo iien mijen eo aō, kōnke kiiō ij kile bwe ro̧o̧l n̄an kapijuknen ekar ijjino in juon jepta kāāl ij imaron̄ lo wāween ko rekāāl n̄an kam̧wilaļļo̧k tōmak eo aō.
Kadkad ko aō make ippān Jemedwōj Ilan̄ im Jisōs Kraist raar eddōkļo̧k im m̧wilaļļo̧k jān ke ikar ro̧o̧l n̄an kapijuknen, eļap tata kōnke kōn pedped in katak ko ikar ekkaktak ilo kūlaaj in kōperanļo̧k kōļmenļo̧kjeņ n̄an anjo̧ im kōn pedped ioon Jemed Ilan̄ im Rilo̧mo̧o̧r kōn jipan̄. Relukkuun in ļap aer m̧ool im waļo̧k ilo mour eo aō aolep raan.
Ikar ekkatak im bōk bwe āinwōt juon nejin Anij, jej aolep iien oktak, ekkatak, im eddōkļo̧k jidik kōn jidik. Im men̄e mour ko ad rej oktak, Jemed Ilan̄ ejjab oktak. E ejjab kōtmene aō weppāān ilo mijen eo aō, im E ejjab bar kōtmene kiiō E ej iakwe eō im ekōņaan bwe in wōnm̧aanļo̧k wōt n̄an kajjieon̄ epakeļo̧k E im kōm̧m̧ane ijo em̧m̧an tata imaron̄e ilo iaļ eo aō ļo̧k n̄an Ippān,
Kiiō, kōnke ikar bōk kūlaaj in kōperanļo̧k kōļmenļo̧kjeņ n̄an anjo̧, ejjab meļeļe in bwe ejjeļo̧k aō bar jabdewōt leļn̄o̧n̄ ak ikkūm̧ļo̧k ko ak iien ko n̄e ij en̄jake tōrjān jon̄an kōn mijak kōn ilju jekļaj. Ij kom̧m̧ane wōt jet iien. Bōtaab kiiō ij kile jon̄ak kein im kar ekkatak kōn kein jerbal ko n̄an jipan̄ ņa mejļaer ilo juon wāween ājmourļo̧k, kōkōm̧anm̧anļo̧k jekjek in mour eo aolep raan.
Ilo jem̧lo̧kin, kūlaaj in ekar katakin eō kile jelm̧ae nan̄inmej ilo iien ko n̄e ij en̄jake leļn̄o̧n̄ kōn apan̄ ko. Ekar katakin eō bwe in ij jeļā kijenmej im meanwōd n̄an n̄a make im jab wānōk ko aō. Im ikar ekkatak n̄an meļeļe ekōjkan an Anij lo eō im n̄an jab mijak kōn men ko jab jeļā kaki an ilju jekļaj.
Kōn jipan̄ eo jim̧or an ritijem̧ļo̧k im lan̄, ikar kile bwe ewōr ippād kein jerbal ko remenin aikuj n̄an jeļā ekōjkan n̄an “kōm̧m̧an … jab n̄an kipel er n̄an kōm̧m̧an” (2 Nipai 2:26) jān limotak ko im en̄jake ko ad ilo ad wōnm̧aanļo̧k wōt n̄an bun̄ m̧aanļo̧k n̄an Kraist.