Kōttōpar Iaļ IN KARŌK IN M̧ōņōņō eo
Jān Elder Quentin L. Cook
Jān Doulul eo an Jon̄oulruo Rijilōk ro
Jemaron̄ karūttoļo̧k ro rejim̧we, kōjatdikdik ajri ro jabdewōt jikin ilo laļ in eļan̄n̄e ewōr aer juon pedped epen ilo Rilo̧mo̧o̧r eo.
Pija ko jān Jim Lillywhite
Elōn̄ iiō ko remootļo̧k, jet iaan ro rilikū reddik kar jitōn̄ er n̄an kōm̧m̧ane juon būroojāāk in jerbal in jipan̄ ilo jikin kallib eo an eo Jimaam̧ Crozier Kimball. Āinwot juon kein kam̧m̧oolol, raar kallim̧ur kōn keek eo enno tata an1 Būbū Clara.
Ke ekar dedeļo̧k aer kōm̧m̧ane jerbal ko aer, raar jibadōkļo̧k jikin kōmat eo n̄an kein kam̧m̧oolol eo aer. Ijo wōt ke, Jim̧m̧a, ekar pinej kōjām in jikin kōmat eo. Leddik eo rilikū Kathy Galloway, eo ekar emaron̄ 14 ilo iien eo, ej keememej bwe ekar jijet ioon juon jea in piano im kar kajjitōk ippān ro jet rilikin n̄an jijet laļ. Ekar kam̧m̧oolol er kōn aer buuļ jerbal innām ekar ba ewor juon en aorōk ekōņaan kwaļo̧k m̧okta jān aer kan̄ keek eo kijeer.
“Enaaj itok juon iien ilo mour ko aer n̄e renaaj aikuj in jeļā im jerbale ta eo ij tōņ kar kwaļo̧ke ippāmi,” ekar ba.
Ekar kōmeļeļeik bwe eo jim̧m̧an Heber C. Kimball (1801–68) im rūtto bainier ro jet aer raar jelm̧ae apan̄ ko relukkuun kar eppen ilo kanniōk. Jim̧m̧a ekar ba bainier ro ekar m̧ōkaj aer ekkatak bwe n̄an mour, raar aikuj in jerbal ippān doon im iakwe im jerbal n̄an doon.“En̄in ej juon iaan bwebwenato rebun̄bun̄ rekar likūt n̄an kom̧!” ekar ba ilo ad dānnin kōm̧jaļaaļ jino wōtlo̧k iturin mejān.
“Ilo kūr eo an jim̧m̧a āinwōt juon petriak im āinwōt jim̧m̧ami, n̄e ij ļōmņak kōn ilju im jekļaj, … ebwil būruo kōn kom̧,” ekar ba. “Kom̧ naaj jelm̧ae apan̄ ko ilo en̄jake im jetōb me eļap tata rūtto bainier ro ami remaron̄ in kar jab ļōmņak kaki.”
Ijello̧kin n̄e epepen eo edikļo̧k rej kautiej bwebwenato in iakwe eo eļap an bainier ro im jerbal in jipan̄, ekar kakobaba, “elōn̄ iaami renaaj likjab kōnke kom̧ij jamin naaj maron̄ mour kōn kom̧ make.”
Innām, kōn juon ekkejel eo an jetōb n̄an jetōb, Jim̧m̧a Kimball ekar kōjem̧ļo̧ke: “Jej aikuj doon. Ilo kakobaba n̄an kwaļo̧k naan in kam̧ool ko ad kōn gospel eo ippān doon, jerbal eo ad ej n̄an iakwe im jerbal im kōkajoorļo̧k im naajdik im rejtake im rie doon, … eļap tata ilo baam̧le eo ad. Jouj im keememej bwe ilo raan ko āliktata, bwe komin maron̄ mour emaron̄ pedped ioon m̧ōņōņō eo ami n̄an jerbal ippān doon im n̄an iakwe im jerbal n̄an doon. Kiiō, jen etal in m̧ōn̄ā keek!”
Jej Aikuji Doon
Pija ko jān Wendy Gibbs Keeler
Āinwōt kar kwaļo̧k jān aen̄wen̄we an laļ in me rej jepooļ kōj, im āinwōt an Jim̧m̧an Crozier Kimball kar leo, jej aikuj doon. Jej aikuji baam̧le ko ad rej iakwe, doulul ko im Doulul ko an Kōrā ro robrak kōn jerbal in jipan̄, im branch ko, ward ko, stake ko rej jipan̄.
“Anij ekōņaan bwe jen jerbal ippān doon im jipan̄ doon,” Būreejtōn Nelson ekar ba. “En̄in ej etke E ej jilkintok n̄an kōj n̄an laļ ilo baam̧le ko im karōk kōj ilo ward ko im stake ko. En̄in ej etke Ej kajjitōk ippād n̄an jerbal im jerbal in karejar n̄an doon. En̄in ej etke Ej kajjitōk ippād n̄an mour ilo laļ in bōtaab jab jān laļ in. Jemaron̄ kōttōbrak ijo eļap ippān doon jān ad kōm̧m̧ane make iaad.”2
Mour ilo ļamļam eo kein karuo epen. Kōn wōtlo̧k eo an Adam im Iv, jej ioon men ko rekkan im kemetak, mālijjon̄ ko im kapo ko. Kain en̄jake rōt in rej m̧ōttan karōk in m̧ōņōņō eo, bōtaab jemron̄ jipan̄ doon dibuk ļan̄ ko an mour.
Āinļo̧k wōt Adam im Iv, ro kar “jilkinļo̧k … jān jikin kallib in Iden” (Jenesis 3:23), kar jilkinļo̧k kōj jān ijo jikid ilo mour in kōppopo eo m̧okta jān mour in n̄an laļ in ekar wōtlo̧k. Im āinwot Adam im Iv, jej lan̄lōn̄ kōn ad jeļā kōn karōk eo an Anij n̄an ro Nejin:
“Im ilo raan eo Adam eaar wūjtake Anij im kar obrak, im kar jino kanaan kōn aolep nukwin ko an laļ, im ba: En jeraam̧m̧an etan Anij, bwe kōnke bōd eo aō māj ko meja repeļļo̧k, im ilo mour in inaaj lan̄lōn̄, im bar juon alen ilo kanniōk inaaj lo Anij.
“Im Iv, lio pāleen, eaar ron̄ aolep men kein im eaar m̧ōņōņō, im ba: Eļan̄n̄e ar jab kōn bōd eo ad ejamin naaj kar wōr ineed, im jamin naaj kar jeļā em̧m̧an im nana, im lan̄lōn̄ kōn lo̧mo̧o̧ren eo ad, im mour indreo eo me Anij ej leļo̧k n̄an aolep ro rej pokake.” (Moses 5:10–11; lale barāinwōt 2 Nipai 2:25).
“M̧ōttan Jibadbad eo An Ekwojarjar”
N̄an kakūrm̧ool “jab wabanban im mour indeeo” ej an Jemād “jerbal im … aiboojoj” (Moses 1:39). “Jej,” āinwōt an Būreejtōn Nelson kar katakin, “m̧ōttan jibadbad eo An ekwojarjar.”3
Būreejtōnji eo Kein Kajuon im Doulul eo an Jonoulruo Rijilōk ro raar kean̄ bwe āinwōt ļaddik im leddik in jetōb ro nejin ilo mour eo m̧okta, jaar “jeļā im kabun̄jar n̄an Anij āinwōt eo [Jemed] indeeo im kar errā ilo karōk eo An eo me ajri ro nejin remaron̄ kar bōk juōn ānbwinin kaniōk im mour ioon laļ n̄an aer eddōkļok n̄an aer wāppen im kile jemļo̧k eo aer ekwojarjar āinwōt rijolete mour indeeo.”4 Im Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, kiiō epaak ekar katakin, Ium̧win karōk eo an Jemedwōj Ilan̄, [Jisōs Kraist] ‘ekar ejake lan̄ ko im laļ’ (Katak im Bujen Ko 14:9) bwe kajjojo iaad en maron̄ jeļā kōn mour in emenin aikuj n̄an kappukot mejān kajjik eo ad ekwojarjar.”5
Jeje ko rekwojarjar im rikanaan ro ilo raaan ko āliktata rej kalikkar jerbal eo aorōk an ānbwin ko ad ej kōm̧m̧ane ilo karōk eo an Anij. Mejān kajjiōk eo ad ej n̄an bar jepļaakļo̧k n̄an im̧aan mejān Anij kōn ānbwin ko raar jerkakpeje, utiej tata im n̄an mour āinwōt baam̧le ko n̄an indeeo.
“Kadkad ko ad ippān armej ro jet, maron̄ eo ad n̄an kile im jerbal ekkar n̄an m̧ool eo, im ad maron̄ pokake pedped in katak ko im kain̄i ko an gospel eo an Jisōs Kraist rej ļapļo̧k ilo ānbwin kanniōk ko ad,” Elder David A. Bednar jān Doulul eo an Jon̄oulruo Rijjilōk ro, ekar ba. “Ilo ad katak ilo mour in, jej en̄jake inem̧m̧an, iakwe, jouj, m̧ōņōņō, būrom̧ōj, ebbweer, metak, im aaet apan̄ ko itok wōt jān m̧ōjņo̧ im likjab an ānbwin ilo elōn̄ wāween ko rej kōpooj kōj n̄an indeeo.”6
Katak kōn Kraist
Ilo raan in pere kein im jab jeļā, jeļā eo kōn karōk in m̧ōņōņō eo ej lukkuun aorōk n̄an ad mour ilo jetōb. Bōtaab jejjab maron̄ kōtmene bwe laļ in en naajdik ajri ro nejid kōn pedped in katak ko an m̧ōņōņō indeeo. Āinwot ro jinen im jemen, jej aikuj katakin ajri ro nejid kōn ijjino eo ekwojarjar im mejān kajjik eo ekwojarjar.
Jej jino kōj jipan̄ er ejake juon naan in kam̧ool kōn Jisōs Kraist im Pinmuur eo An, eo rej ioļapļap n̄an karōk in lo̧mo̧o̧r eo. Ij tōmak jemaron̄ karūttoļo̧k ro rejim̧we, kōjatdikdik ajri ro jabdewōt jikin ilo laļ in eļan̄n̄e ewōr juon aer pedped epen ilo Rilo̧mo̧o̧r eo.
Ilo nokon in jota eo, ilo iien jar im ekkatak jeje ko rekwojarjar an baam̧le, ilo aolep m̧akūtkūt ko im ininene ko, im em̧ool ilo iien kajjim̧we ko, “Jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist, im jej kanaan kōn Kraist … bwe ro nejid ren maron̄ jeļā n̄an ia rej maron̄ reilo̧k n̄ān jeorļo̧k jerawiwi ko aer” (2 Nipai 25:26).
Jemaron̄ jipan̄ ajri ro nejin meļeļe bwe ilo karōk in lo̧mo̧o̧r eo, ukweļo̧k ej juon “ekatak eo ejelok jemlokōn”7 me ej bōktok kōjatdikdik im kemour ilo ad kōmeraikļo̧k eddo ko an jetōb eo im kōmeramļo̧k ilju im jekļaj eo.
Ilo an ajri ro nejid kaddōkļo̧k tōmak ilo Pinmuur eo an Jisōs Kraist, renaaj itok n̄an jeļā bwe aolep rejjamin jako im bwe irooj ej kōttar er ilo an pein erļo̧k. Jej jipan̄ er melele bwe “jabdewōt men eo [jej] likūt ilikūn n̄an ļoor iaļ eo naaj juōn raan enaaj āinwōt n̄e ekar ejjeļo̧k kijejeto im kaarmejet n̄an jidik.”8
Aintok Ajri ro Nejin Anij
Jejjab makeļo̧k ilo pukōt mejān kajjik eo ad ekwojarjar. Āinwōt Armej ro Rekwojarjar ilo Raan-ko Āliktata, ewōr juon ad eddo ainjuon n̄an kūr ro jet ilo iaļ eo ad n̄an kapijuknen eo ad ilo lan̄. Laļ in ej aikuji Armej ro Rekwojarjar ilo Raan-ko Āļiktata me rej m̧ōņōņō in kōm̧m̧an bwe meram eo an Jepļaaktok eo en romaak ilo naan in kam̧ool ko aer, waanjon̄ak ko, im m̧ōņōņō eo n̄an kwaļo̧k gospel eo N̄e jej romaakļo̧k, jej aintok.
“N̄e jej kōnono kōn aiintok eo,,” Būreejtōņ Nelson ekar ba, “jej kōnono kōn m̧ool in aorōk: kajjojo ajri ro nejin Jemedwōj Ilan̄, jim̧or ilo rejet ko an rōn̄ōl eo, rej aikuj in ron̄ ennaan eo an gospel eo an Jisōs Kraist ekar kōjepļaaktok. Rej kālet n̄an er make eļan̄n̄e rej kōņaan jeļā eļapļo̧k.”9
Im kōn menin, āinwōt ankar Jim̧m̧a Crozier kapilōk, jej kwaļo̧k naan in kam̧ool ko ad kōn gospel eo an Jisōs Kraist. Jej iakwe im jerbal, kōkajoorļo̧k im naajdik, im rejtak im rie ro rejitōn bōro ippād im ro rūtūrid.
Ilo ad jipan̄ doon ilo iaļ eo n̄an mejān kajjik eo ad, jej jipan̄ kōj makeļo̧k ilo ejja iaļ eo wōt, “n̄an bōk er ilo aelōn̄ eo an Jemān n̄an jab bar diwōjļo̧k, a n̄an jokwe ippān Anij indeeo ilo lan̄ ko” (3 Nipai 28:40).