Itok Ļoor Eō

Kōm̧anm̧an Eo

Jisōs Kraist ekar kōm̧anm̧an laļ ium̧win tōl eo an Jemed Ilan̄ bwe en maron̄ wōr juon jikin n̄an ad jokwe, ekkatak, im kōjerbal anemkwoj in kāālet eo ad n̄an kōm̧m̧an in kāālet ko rem̧m̧an (lale Ebream 3:24–26).

Rikanaan Josep Smith ekar katakin kōj bwe ñan ar “kōm̧anm̧an … ejjab meļeļe in n̄an kōm̧anm̧an jān ejjeļo̧k jabdewōt; ak ej meļeļe in n̄an ejake, ejja āinwōt juon em̧m̧aan enaaj kar ejake kein jerbal ko n̄an ekkal ko im jōk juon wa.”¹ Ilo kajin Hibru naan eo n̄an “kōmanman” ej meļeļe in n̄an ļōme, teiļaik, karōke, im ejake (lale Jenesis 1:1; Ebream 3:24).

Būreejtōn Russell M. Nelson ekar kōmeļeļeik bwe “Kōm̧anm̧an eo make kar likūt ilo lenkan ko ilo kōlaajrak in tōre in iien ko,” ejjab raan ko ilo kōļenta. “Jekdron n̄e ejjejjet raan eo, juon iien, ak juon iiō, kajjojo m̧wen̄an [an Kōm̧anm̧an eo] eaar juon iien kōttan iien ko me emōj jeļā kaki—juon iien n̄an indeeo.”²

Raan Juon: Meram im Marok

“Anij ear ba, En meram,” im E “ear kōjepel meram jān marok,” kōm̧anm̧an raan im bon̄ (lale Jenesis 1:3–5).

Raan Ruo: Dān ko Lan̄ ko

Anij ekar kōjepeļļo̧k dān ko im lan̄ ko. “Im Anij ear ba: En juon mejatoto eoḷōpan dān. … Im Anij ear likūt etan mejatoto Lañ.” (Lale Jenesis 1:6–8).

Raan Jilu: Lo̧meto ko im Laļ in

“Im Anij ear likūt etan āne e ṃōrā Laļ; im … dān ko rej koba, Ej likūt etan Lọmeto” (Jenesis 1:10). Innām laļ eo ekar pojak n̄an illūk mour ie (lale Jenesis 1:11–12).

Raan Emen: Aļ im Iien An̄ōnean̄ ko

Anij ekar kōm̧anm̧an aļ, allōn̄, im iju ko “bwe ren kōjepel raan jān bon̄” im “ren pād kōn kakōḷḷe ko, im kōn an̄ōnean̄ im rak ko, im kōn raan ko, im iiō ko” (lale Jenesis 1:14–16).

Raan Ļalem: Menin Mour ko

Anij ekar kōm̧anm̧an “menninmour ko” (Jenesis 1:21). Kar kakiene mennin mour kein n̄an tūm̧oņ im orļo̧k im kobrak laļ im lo̧jet (lale Jenesis 1:22).

Raan Jiljino: Adam im Iv

Kōm̧anm̧an eo an Anij kōn mour ekar wōnm̧aanļo̧k wōt kōn “mennin mour ko in laļ,” “kattle,” im “mennin tōbalbal ko” (Ebream 4:24-25). Innām Ekar kōm̧anm̧an Adam im Iv “ilo nememen wōt ānbwinnin make” (Moses 6:9) im ekar kakien er n̄an “tiṃoṇ im orḷọk, im kobrak laḷ, … im irooj ioon … men otemjej rej mour im ṃakūtkūt” (Jenesis 1:28).

Raan Jiljilimjuon: Raan in Kakkije

Ālkin an kamōj jerbal ko An, Anij ekar kakkije ilo raan eo kein kajiljilimjuōn. “Im Anij ear koweeppān raan eo kein ka jiljilimjuon, im kokwōjarjar e: bwe ilo raan eo E kar kakkije jān jerbal ko An otemjej, ko Anij ear jerbal im kōṃanṃani” (Jenesis 2:3).

Tokālik Anij ekar kakien bwe jen barāinwōt “keememej raan in Jabōt, bwe kwōn kokwōjarjar e” (Exodus 20:8).

Jemaroñ kōmmane bwe raan in Jabōt en kwojarjar ilo ad bōk iien n̄an etal n̄an jar, bōk m̧ōttan kwojkwoj eo, im keememej Rilo̧mo̧o̧r. Irooj eo ekar katakin, “Bwe em̧ool raan eo in jitōn̄ n̄an kwe n̄an kakkije jān jerbal ko am, im liļo̧k nebar ko am n̄an eo Eo Eutiejtat” (Katak im Bujen Ko 59:10).

Ilo raan in Jabōt, “ļōmņak ko, m̧akūtkūt ko ad, im m̧wiliid rej kōkaļļe ko jej kwaļo̧k n̄an Anij im juon kōkaļļe kōn iakwe eo ad n̄an E.”³