Kappukot Jisōs Kraist ilo Kallim̧ur M̧okta
M̧ool kein ļalem remaron̄ jipan̄ kōj itok n̄an jeļā kajjien ad Rilo̧mo̧o̧r ilo ekkatak jeje ko rekwojarjar ad iiō in.
Meram eo an Laļ, jān Walter Rane, jab maron̄ kapeiki
Juon raan, Jisōs Kraist ekar ioon ruo iaan rikļoor ro An ilo iaļ eo ikōtaan Jerusalem im Emmaus. Ke raar etetalļo̧k, Ekar katakin er kōn jerbal eo An āinwōt kar kōmeļeļeik ilo jeje ko rekwojarjar eo kiiō jej kōnono kake āinwōt Kallim̧ur M̧okta.
“Im Ej jino ippān Moses im ri kanaan otemjej, im kōmmeļeļeik n̄an erro ilo jeje ko otemjej men ko kōn E make” (Luk 24:27). Katak kōn Rilo̧mo̧o̧r eo im mijen eo An ekar lukkuun in juon en̄jake in jetōb eo em̧wilaļ n̄an rikaļoor ro, im raar akweļap Ippān n̄an kaitokļo̧k an pād (lale Luk 24:28-32).
Āinwōt kar rikaļoor ro an Kraist m̧oktata, ewōr ad iien em̧m̧m̧an n̄an itok n̄an jeļā kajjien ad Rilo̧mo̧o̧r ilo juon wāween eo eļap meļeļe in ilo ad etale Kallim̧ur M̧okta ilo iiō in. Ļo̧o̧k kin, kobaļo̧k ippān bok ko an Moses im Ebream ilo Bōōr Eo Eļap Wōņāān, rej letok n̄an kōj juon meļeļe eo edipioļo̧k kōn wōn E—Paaktokin, mijen eo An, im kadkad eo An ippān Jemen im kōj kajjojo. Jej aikuji meļeļe in n̄an bōk menin letok an mour indeeo (lale Jon 17:3).
Itulaļ rej ļalem m̧ool ko me remaron̄ jipan̄ kōj kile im em̧m̧anļo̧k ad meļeļe Jisōs Kraist ilo aolepān bok in eo in, ekwojarjar.
M̧ool 1: Jisōs Kraist Ej Jeova
Ilo Kallim̧ur Ekāāl, jej riit kōn juon iien ke Jisōs Kraist ekar kwaļo̧k E make āinwōt Jeova (lale Jon 8:58, footnote b). Armej ro raar illu im kajjieon̄ in kade E kōn An kōtrai (lale Jon 8:59). Raar jab kile juon m̧ool aorōk me ej wōnm̧aanļo̧k ilo bōd meļeļe kake jān elōn̄ rainin: bwe Jisōs Kraist ej Jeova, Anij eo an Kallim̧ur M̧okta.1
Bōlen m̧ōttan un eo kadkad eo an Rilo̧mo̧o̧r ilo Kallim̧ur M̧okta emakijkij bōd meļeļe kake ej kōnke āt eo “Jisōs Kraist” kar jab kōjerbale ilo bok eo. Ijiello̧kin, rijeje ro raar kōjerbal juon nōm̧ba in taitōļ ko keidi n̄an E, ko āinwōt “Anij” “N̄a E,” ak “Irooj.”2 Iien eo wōt jej jeļā menin, ej jino an alikkarļo̧k ad lo Jisōs Kraist ilo aolepān jeje ko rekwojarjar. N̄ān waanjon̄ok:
-
Ke Moses ekar kōnono n̄an “Anij” ilo wōjke eo eurur, ekar kōnono n̄an Jisōs Kraist (lale Exodus 3:6;)3
-
Ejjeļo̧k oktak, Jisōs Kraist ekar kwaļo̧k E make āinwōt “N̄a E eo Eļap” n̄an Josep Smith (Katak im Bujen Ko 29:1).
-
Jon Peptaij eo kar kūr n̄an kōpooj iaļ eo an “Irooj” (Matu 3:3). Menin ej juon kakūrm̧ool in Aiseia 40:3, eo ekar kanaan kōn Jisōs Kraist.
-
Lale jaat eo ilo peij 17 kōn waanjon̄ok ko jet kōn Jeova ilo aolepān jeje ko rekwojarjar.
M̧ool 2: Meno̧kno̧k ko im IIen ko Remaron̄ Katakin Kōj kōn Ad Rilo̧mo̧o̧r
Kar kakien Adam im Ive n̄an katok kōn mennin mour ko āinwōt m̧ōttan kabun̄ jar eo aer. Kain katok kein rej kakeememej kōj bwe Jisōs Kraist, Ļaam̧ eo an Anij, ekar kōtļo̧k E make bwe ren m̧ane ejja m̧ōttan wōt Pinmuur eo An.
Adam im Iv Kōm̧m̧ani Katok ko, jān Keith Larson
Kallim̧ur M̧okta elukkuun obrak kōn kakōļļe ko im bwebwenato ko me remaron̄ kakeememej kōj kōn jipan̄ eo Rilo̧mo̧o̧r eo ej letok. N̄ān waanjon̄ok:
-
Elōn̄ eoon ko rej kōmeļeļeik iien ko me armej ro retiljek kar kakien er n̄an katok kōn mennin mour ko ejja m̧ōttan wōt kabun̄ jar eo aer. N̄an waanjon̄ok, ro nejin Israel kar jiron̄ er n̄an katok kōn juon ļaam im kakōļļeik m̧aan kōjam ko aer kōn bōtōktōk in. Ro raar kōm̧m̧ane menin kar kōjparok er jān nan̄nmej eo ekamejmej ilo Ijipt. Kain katok kein rej kakeememej kōj bwe Jisōs Kraist, Ļaam̧ eo an Anij, ekar kōtļo̧k E make bwe ren m̧ane ejja m̧ōttan wōt Pinmuur eo An. En̄taan eo An elo̧mo̧o̧ren kōj jān mej eo ilo kanniōk im jetōb. (Lale Exodus 12:23.)
-
Ke rikanaan Elijah ekar ko n̄an kōjparok mour eo an im katileekek ilo āne jem̧aden, ekar en̄jake būrom̧ōj im kar ba bwe iakwe ke en kar mej. Ke ekar kiki, pilawe im dān kar kabwilōn̄lōn̄ waļo̧k n̄an naajdiki im kōkāāl e, kōkajoorļo̧k e n̄an wōnm̧aanļo̧k wōt. Menin emaron̄ kakeememej kōj bwe Jisōs Kraist ej Dān in Mour eo im Pilawe in Mour eo. E ej un jān kōjatdikdik eo ad eļap tata. (Lale 1 Kiin̄ ro 19:1–8.)4
-
“Am̧ in naan e lamp n̄an neiō,” juon rijeje sam ekar je (Sam ko 119:105; kar kobaiki). Maika ekar kam̧ool, “Men̄e ij jijet ilo marok, Jeova enaaj aō meram” (Maika 7:8; kar bar kakobabatok). Naan ko aer rej kakeememej kōj bwe Jisōs Kraist ej Meram in Laļ, ej tōlļo̧k n̄an kapijuknen eo ad ilo lan̄.
Ilo am̧ riit, kwomaron̄ lo men ko jet me rej kakeememej eok kōn Jisōs Kraist im maron̄ eo An n̄an lo̧mo̧o̧ren kōn—āinwōt ke baam̧le eo an Noa kar lo̧mo̧o̧ren jān ibwijleplep eo ilo ark eo, ak ke Jona kar bar leļo̧k juon iien n̄an ukweļo̧k ilo an kar pād lowaan raj eo. Iien kein remaron̄ kakeememej kōj bwe Rilo̧m̧o̧o̧r eo emaron̄ bōkļo̧k kōj ilo lan̄ ko an mour, im bwe Enaaj aolep iien letok n̄an kōj iien ko rem̧m̧an n̄an bar ro̧o̧l n̄an iaļ eo ejim̧we. (lale Jenesis 7:1; Jona 1:17.)
M̧ool 3: Jeova Ej juon Anij an Juon Make
Jet iien emaron̄ in āinwōt Anij eo an Kallim̧ur M̧okta ej illu im eiden wōņe. Jej aikuj likūt ilo kōļmenļo̧kjen bwe rijeje ro m̧oktata an bok eo ekar an m̧anit ko etto kōn m̧wil ko im kōmeļeļe ko me maron̄ pen n̄an ad lukkuun in meļeļe kake rainin. Itok, Ļoor Eō bok in katakin eo, iien ekōnono ko an kumi, im kōmeramļo̧k eo jān Jetōb Kwojarjar eo emaron̄ jipan̄ kōj etale ta eo jej riiti ilo Kallim̧ur M̧okta ippān ta eo jejeļā kōn Jisōs Kraist jān bok ko jet an jeje ko rekwojarjar.
Im en̄in ej juon paotok ealikkar an Jeova me iminene kake n̄an rijikuuļ ro kōn Rilo̧m̧o̧o̧r eo: E ej juon Anij an juon make. An bōk koņan, ilo jim̧or wāween ko rekabwilōn̄lōn̄ im eddik, ej kwaļo̧k bwe E ej pojak n̄an bōkļo̧k n̄an ro me rej lōke E. Errein ej jet iaan waanjook kōn jerbal in karejar eo An ilo Kallim̧ur M̧okta:
-
Ālkin an kar Adam im Iv jerawiwi, Irooj ekar kanuknuk, ak kalibubu, er kōn kilin koot ko (lale Jenesis 3:21). Ilo Hibru naan eo kōn Pinmuur ej meļeļe in “n̄an kalibubu” ak “n̄an jeorļo̧k bōd.”
-
E ekar kajjitōk ippān Inok n̄an etetal Ippān (lale Moses 6:34) im kotak lōñlok armej in Zaion ro (lale Moses 7:69).
-
E ekar kōpooj Josep n̄an kadiwōjļo̧k baam̧le eo an im ebar lōn̄ ro jet jān n̄ūta (lale Jenesis 37:-46).
-
E ekar tōlļo̧k ro nejin Israel ilo āne jem̧aden (lale Exodus 13:21-22;).
-
E ekar loļo̧k Aron im Miriam n̄an kōkajoorļo̧k tōmak eo aer ilo rikanaan eo emour (lale Bōnbōn 12:5).
-
E ekar tōlļo̧k Ruth im kōjparok rūtto ro An ilo aolepān ineen liin (lale Ruth 3:10-11; 4:14-17).
-
E ekar kūr ļaddik eo Samuel kōn etan (lale 1 Samuel 3:3-10).
-
E ekar kōm̧aron Esther n̄an ilo peran lo̧mo̧o̧ren armej ro an (lale Ester 2:17; 8:4-11).
M̧ool 4: Jisōs Kraist Ej Jipan̄ Kōj Tariņaik Pata ko Ad
Jet iien mour kajjojo raan ej āinwōt juon pata. Ilo m̧ool jej pād ilo ioļapļap juon pata ilo jetōb ikōtaan em̧m̧an im nana, ejjab āinwōt pata ko kar kōmeļeļeik ilo Kallim̧ur M̧okta. Ippān ritariņae in etto ro, “Tōl kōm, O Jeova eo eļap.”5 Ilo jeje kein rekwojarjar, jej ron̄ uwaak eo An em̧ool:
-
“I jāmin likjab jān eok ak ilok jān eok” (Joshua 1:5).
-
“Komwin jab mijak im jab lōļn̄on̄ kōn jar in eļap; bwe tarinae in e jab ami, a an Anij” (2 Kronikel 20:15).
-
“Inaaj kakajoor eok; … aaet, Inaaj jipan̄ eok” (Aiseia 41:10).
-
“bwe N̄a ippaṃ n̄an lo̧mo̧o̧ren eok” (Jeremaia 1:8).
M̧ool 5: Kallim̧ur Ko An Irooj Rej Wōnm̧aanļo̧k Wōt
Eļapļo̧k ad ekkejelļo̧k n̄an armej ro retiljek an Kallim̧ur M̧okta jān ad maron̄ kile. Rilolo ro etto raar reim̧aanļo̧k n̄an im kar jeje kōn mour eo an Jisōs Kraist ilo mour in. Aiseia, n̄an waanjon̄ok, ekar kōmeļeļeik Irooj kōn naan ko rekanooj in kajoor me raar erom m̧ōttan al eo emakijkij ad kwaļo̧ke ilo Ijtō im Kūrijm̧ōj (lale Aiseia 7; 9; 40; im 53).6
Āinwōt rikanaan ro, jej barāinwōt reim̧aanļo̧k n̄an itok eo an Kraist—iien in antoone ro̧o̧ltok eo An n̄an irooj make ioon laļ in.7 Im ilo ad kōpooj laļ in n̄an Itok eo Kein Karuo An, jej bōk kajoor jān m̧ool ko im kallim̧ur ko kar m̧oktata ļo̧o̧ki ilo Kallim̧ur M̧okta, ko āinwōt:
-
Kōjeraam̧m̧an ko an petriak, eo ekoba juon kean̄ kōn m̧weo im̧ōn Israel jej uwaan. Bujen eo Irooj ekar kōm̧m̧ane ippān Ebream taujin iiō ko remootļo̧k ej jerbal n̄an kōj āinwōt ribujen membōr in Kabun̄ in rainin, jekdo̧o̧n ta bwij eo jej m̧ōttan. (lale Jenesis 13:14–17; Ebream 2:9–11.)
-
Kien eo n̄an kōkwojarjar raan in Jabōt, eo Irooj ekar ba enaaj “juon kakōḷḷe ikōtaad ilo epepen ko ami; bwe koṃwin jeḷā bwe N̄a Jeova, Eo ej kokwōjarjar koṃ” (Exodus 31:13).
-
Kwaļkoļ ko rekwojarjar, ekkapit, im kanuknuk me rej m̧ōttan kabun̄ jar an tampeļ eo rainin raar m̧okta liļo̧k n̄an Aron im ro ineen (lale Livitikōs 8).
Ļōmņak kōn ekōjkan an elōn̄ em̧m̧aan ro im kōrā ro rejim̧we kar kaarmejete n̄an bōktok kōj n̄an ijin jej pād ie ilo bwebwenato an armej. Jej ekkal ioon kijejeto ko aer rekwojarjar im kwaļo̧k visōn eo aer kōn juon laļ kar tōl jān Rilo̧mo̧o̧r eo. Āinwōt an Būreejtōn Russell M. Nelson kar katakin: “Ālkin 4,000 iiō ko in antoone im kōppopo, menin ej raan eo kar karōke n̄e gospel eo naaj bōkļo̧k n̄an aolep bwij ko an laļ. En̄in ej iien eo an kar kallim̧ur eo n̄an aintok Israel. Im jej aikuj in bōk koņad!”8
Juon Iiō Aitok n̄an Ekkatak
Kraist ilo juon Liboror Būrōrō, jān Minerva Teichert, jipan̄ jān Church History Museum eo
Epād ilo lubdein peid bwebwenato eo kōn jinoin kōm̧anm̧an eo an armej—bwebwenato eo ad āinwōt ribujen Rikūrijin ro. Kōnke kōn Pinmuur eo an Jisōs Kraist, jejeļā ekōjkan an em̧m̧akūt in aitok naaj jem̧ļo̧k. Setan naaj kakkure, im jim̧we eo enaaj anjo̧. Bōtaab ekōjkan an bwebwenato eo ad kajjojo waļo̧k?
Jenaan ke kāālet n̄an etetal ippān Jisōs Kraist ilo iiō in? Jenaaj ke akweļap n̄an An pād wōt ippād, kijooror in ron̄jake ta eo E ej katakin?
E ej iakwe, Rilo̧mo̧o̧r eo an juon make me ainikin jej ron̄ ilo Katak in Bujen Ko, eo mour eo an kar rekoote ilo Kallim̧ur Ekāāl, im eo katak ko an an rej alikkar kar katakin ilo Bok in Mormon. Kōn jidik kaminene, jenaaj maron̄ in lo jerbal in karejar eo An āliji ilo aolepān alen ko an Kallim̧ur M̧okta barāinwōt. E ej dilepān jem̧aan, kiiō, im ilju im jekļan an armej. E ekar—im naaj aolep iien—pād ikōjaad ilo aolep bun̄tōn ne ko.