Pedped ko Im̧aan tata an Gospel eo
Wōtlo̧k Eo Ekar M̧ōttan Wōt Karōk eo An Anij
Kōnke kōn Wōtlok eo, jekar maron̄ itok n̄an laļ in im maron̄ juon raan bar ro̧o̧l n̄an mour ippān Jemed Ilan̄.
Adam and Eve in the Garden of Eden, jān Robert T. Barrett; Adam and Eve Cast Out of the Garden, jān Gary L. Kapp, jab maron̄ kōm̧m̧an kape; Adam and Eve, jān Jay Bryant Ward; The Resurrection, jān Harry Anderson
Ilo Jikin Kallib Eden, Anij ekar kakiene Adam im Iv n̄an jab kan̄ leen wōjke eo an jeļā em̧m̧an im nana. Innām Ekar jiron̄ er, “Kwo maron̄ kāālet n̄an kwe make, … a, keememej bwe Iaar kōmo̧iki” (Moses 3:17). Setan ekar kapo Iv bwe en m̧ōn̄ā leen wōjke eo. Ekar bar n̄an e, “Kom̧ naaj āinwōt anij raņ, ilo jeļā em̧m̧an im nana” (Moses 4:11). Liin ekar m̧ōn̄ā leen eo innām ekar jeere ippān Adam. Anij ekar kadiwōjļo̧k er jān Jikin Kallib Eden.
Wōtlo̧k Eo
Ke Adam im Iv raar em̧m̧akūt jān Jikin Kallib Eden, ekar jako aer pād im̧an mejān Anij. Jepeļļo̧k in jān Anij kar ņa etan mej ilo jetōb. Em̧m̧akūt jān jikin kallib eo ekar bar meļeļe in Adam im Iv raar erom̧ wabanban im kōn menin raar maron̄ in mej. Men̄e Adam im Iv ekar jako aerro pād ippān Anij im raar kiiō wabanban, raar m̧ōņōņō im kōjatdikdik ke raar lo aer maron̄ eddōkļo̧k (lale Moses 5: 10-11) “Adam eaar wōtlo̧k bwe armej ren kar āinwōt, bwe ren maron̄ āinwōt, bwe ren maron̄ m̧ōņōņō” (2 Nipai 2:25).
Juon Iien Melijjon̄
N̄e jej ļotak, jej jepeļļo̧k jān Anij, ejja āinwōt an Adam im Iv kar kōm̧m̧ane ālkin Wōtlo̧k eo. Setan ej kajjieon̄ kapo kōj n̄an kōm̧m̧ani kaālet ko renana. Kapo kein rej kōtļo̧k bwe jen mālijjon̄ im kāālet ikōtaan jim̧we im bōd (lale Alma 12:24). Kajjojo iien jej jerawiwi im jab ukweļo̧k, jej ettoļo̧k wōt jān Jemed Ilan̄. Ak eļan̄n̄e jej ukweļo̧ke, jej epaakeļo̧k Jemedwōj Ilan̄.
Mej ilo Kanniōk
Laļ in ekar kōm̧anm̧an n̄an kōj (lale 1 Nipai 17:36). Wōtlo̧k eo ekōm̧m̧an bwe en pidodo n̄an Adam im Iv n̄an aer kōm̧m̧ane kien eo an Anij n̄an ajri ro nejin, kōm̧m̧an bwe jen itok n̄an laļ in ilo juon ānbwin kanniōk. Ānbwin ko ad renaaj mej juon raan, ak jetōb ko ad renaaj mour wōt. Ānbwin ko ad im jetōb ko ad renaaj bar koba ippān doon n̄e jej jerkakpeje.
Lo̧mo̧o̧ren jān Jisōs Kraist
Kōn kajoor in pinmuur eo an Jisōs Kraist, jemaron̄ anjo̧ ioon mej an kanniōk im jetōb. Kōnke Kraist ekar jerkakpeje, jabdewōt eo ej ļotak tok ioon laļ in naaj jerkakpeje im m̧our indeeo. Im kōnke Kraist ekar en̄taan kōn jerawiwi ko ad, jemaron̄ ukweļo̧k im jeorļo̧k ad bōd bwe jen maron̄ mour ippān Jemedwōj Ilan̄ bar juon alen.