Եկ, հետևիր ինձ

Հին Կտակարանն ուսումնասիրելու օրհնությունները

Նախագահ Մարկ Լ․ Փեյս

Կիրակնօրյա Դպրոցի գերագույն նախագահ

Կարդալով այս հին սուրբ գրության գլուխներն ու հատվածները, մենք հոգևորապես կամրապնդվենք:

Jesus Christ with stars in background — Նախագահ Նելսոնի խոստումները խորքային են և ճշմարիտ։

Բարի գալուստ Հին Կտակարանի 2022թ․ ուսուցմանը՝ Ե՛կ, հետևիր ինձ ծրագրով։ Հին Կտակարանը սուրբ գրային կանոն է, որը պահպանվել է Աստծո ձեռքով, որպեսզի մենք կարդանք և խորհենք: Դա կարող է օրհնություն և ուղեցույց լինել մեզ համար այս վերջին օրերում։

Հին Կտակարանը մեզ տալիս է հավատքի և նվիրվածության 3500 տարվա համայնապատկեր մ.թ.ա. մոտավորապես 4000-ից մինչև 500 թվականները: Հին Կտակարանում կա 39 գիրք: Ծննդոց գիրքն ընդգրկում է Ադամի, Ենովքի, Նոյի և Աբրահամի ժամանակի չորս տնտեսությունները: Մնացած 38 գրքերը՝ Ելից գրքից դեպի Մաղաքիա, նվիրված են Մովսեսի ժամանակահատվածին:

Հին կտակարանը կարդալիս մենք ավելի լավ ենք ծանոթանում այդ սուրբ գրքի մարգարեների և նրանց ուսմունքների հետ: Նրանք ուսուցանել են Հիսուս Քրիստոսի ավետարանը: Նրանք մարգարեացել են Մեսիայի գալուստի մասին և ոգևորությամբ սպասել են այդ իրադարձությանը։ Նրանց ոգեշնչված ուսմունքները պահպանվել են մեր օրերի համար:

Կարդալով Հին Կտակարանի գլուխներն ու հատվածները, մենք հոգևորապես կամրապնդվենք: Սուրբ Հոգին մեր ուշադրությունը կհրավիրի սուրբ գրքի հատուկ հատվածների վրա, որոնք ուժ կտան մեզ այս ժամանակահատվածում, երբ մենք անհամբեր սպասում ենք Փրկիչի երկրորդ գալուստին:

Ոգեշնչող հարց

Ես կցանկանայի պատմել, թե ինչպիսի ազդեցություն է ունեցել Հին Կտակարանից մի հատված իմ կյանքի վրա։

1974 թվականին ես 17 տարեկան էի։ Ես սովորում էի ավագ դպրոցում և վայելում էի կյանքը։ Ես ոգևորությամբ սպասում էի միսիա գնալուն։ 1974թ․ հոկտեմբերի Ensign ամսագրում ես մի զորեղ ուղերձ կարդացի, որը գրել էր Նախագահ Սպենսեր Վ․ Քիմբալը (1895–1985) և վերնագրված էր «Երբ աշխարհը վերափոխվի»։¹ Այդ օրվանից ի վեր ես բազմիցս կարդացել եմ այդ հոդվածը։ Մինչև օրս այն դեռ ոգեշնչում է ինձ։

Նախագահ Քիմբալը ներկայացրել է ժամանակի այս տնտեսությունում Հիսուս Քրիստոսի Վերջին Օրերի Սրբերի Եկեղեցու աճի համաշխարհային լայն հեռանկարը: Նա սովորեցրել է մեր հնարավորության և պարտականության մասին՝ ավետարանն ամբողջ աշխարհին հասցնելու: Նախագահ Քիմբալը մի հատված է մեջբերել Ծննդոց գրքից։ Այն ժամանակ դա ոգեշնչել էր ինձ և շարունակում է ոգեշնչել ամբողջ իմ կյանքի ընթացքում. «Եհովայի համար դժուար բան կա՞յ արդեօք»: (Ծննդոց 18․14, որը նախատեսվում է ուսումնասիրել փետրվարին)։

Նախագահ Քիմբալը անդրադարձել է Աբրահամի և Սարրայի պատմությանը: Սարրան ծիծաղեց Տիրոջ խոստման վրա, որ ինքը և Աբրահամը որդի կունենան: Նրանք օրհնված չէին երեխաներով։ Նրանք այդ ժամանակ, համապատասխանաբար 90 և 100 տարեկան էին: Նրանք շատ մեծ էին ծննդաբերության տարիքից։

«Եւ Եհովան ասեց Աբրահամին. Սարրան ինչո՞ւ ծիծաղեց …

Եհովայի համար դժուար բան կա՞յ արդեօք․ Այս ժամանակ եկող տարին դարձեալ քեզ մօտ կ’գամ, եւ Սարրան մի որդի կունենայ» (Ծննդոց 18․13-14)։

Աբրահամը և Սարրան հավատքով գործեցին։ Տերը պահեց Իր խոստումը։ Ծնվեց Իսահակը։ Աբրահամը դարձավ շատ ազգերի հայր:

Դժվարություններին դիմակայելու ուժ

«Եհովայի համար դժուար բան կա՞յ արդեօք» Հին Կտակարանի այս հատվածն ինձ ուժ է տալիս, երբ բախվում եմ կյանքի մարտահրավերների կամ հոգսերի հետ.

Լինելով նոր միսիոներ, երբ ընկճված էի ինձ զգում։ «Եհովայի համար դժուար բան կա՞յ արդեօք»
Իմ միսիայից հետո, երբ ես և Էնն Մարին մտածում էինք ամուսնության մասին, նյարդայնանում էինք, քանի որ չգիտեինք, թե ինչպես պետք է վճարեինք սննդի համար, տան վարձը և քոլեջի ուսման վարձը: «Եհովայի համար դժուար բան կա՞յ արդեօք»
Լինելով նորապսակներ՝ սպասելով երեխաներին և գիտակցելով կյանքի ֆինանսական լարվածությունը: «Եհովայի համար դժուար բան կա՞յ արդեօք»
Հաղթահարելով ասպիրանտուրայի, աճող ընտանիքի և կարիերա սկսելու դժվարությունները: «Եհովայի համար դժուար բան կա՞յ արդեօք»
Երբ ես Բարսելոնայի միսիայի (Իսպանիա) նախագահն էի, Էնն Մարին և ես միսիոներներին ուսուցանելիս բազմիցս անդրադարձել ենք այս սուրբ գրության հատվածին: «Եհովայի համար դժուար բան կա՞յ արդեօք» Մեր միսիոներներին ուղղված նամակները հաճախ ներառում էին «Եհովայի համար դժուար բան կա՞յ արդեօք» բառերի հղումը:

Սուրբ գրային հիմք

reproduction of stone tablets with Ten Commandments

Սուրբ գրության այս հատվածը Հին Կտակարանում հանդիպող ոգեշնչող բազմաթիվ հատվածներից միայն մեկն է: Համոզված եմ, որ կան շատ հատվածներ, որոնք ձեզ ոգեշնչում են։ Այս տարի բարեխղճորեն և աղոթքով կարդալով Հին Կտակարանը, Սուրբ Հոգին մեր ուշադրությունը կսևեռի այնպիսի հատուկ հատվածների վրա, որոնք կամրապնդեն մեր դարձը դեպի Հիսուս Քրիստոսը և Նրա ավետարանը:

Հին Կտակարանը պարունակում է ժամանակին չենթարկվող վարդապետություն և սկզբունքներ։ Այն պարունակում է մարգարեություններ, որոնք դեռ պիտի կատարվեն: Այն մեզ սովորեցնում է, թե մենք որտեղից ենք եկել: Այն մեզ սովորեցնում է նաև Աբրահամի ուխտի մասին, որն ուժի մեջ է մինչ օրս:

Հին կտակարանը հիմք է հանդիսանում մեր մյուս սուրբ գրությունների համար: Որքան ավելի լավ մենք հասկանանք Հին Կտակարանը, այնքան ավելի լավ կըմբռնենք սուրբ գրությունների մյուս հատորները, քանի որ դրա ուսմունքները հանդիպում են մյուս սուրբ գրքերում.

Իր ծառայության ընթացքում Փրկիչն ուսուցանում էր, օգտագործելով Հին Կտակարանի հատվածները:
Լեքին և նրա ընտանիքը իրենց հետ տանում էին արույրե թիթեղները, որոնք պարունակում էին Հին Կտակարանի սուրբ գրվածքները։
Նեփին ուսուցանել է Հակոբին՝ Հին Կտակարանից մեջբերումներ անելով Եսայիայի գրքից։
Հարություն առնելուց հետո Նեփիացիներին այցելելու ժամանակ Հիսուս Քրիստոսը մեջբերումներ էր արել Հին Կտակարանի Եսայիայի և Մաղաքիայի գրքերից:

beings appearing to Joseph Smith and Oliver Cowdery in Kirtland Temple

Հին Կտակարանի մարգարեներն ու ուսմունքները առանցքային են նաև մեր օրերի ավետարանի վերականգնման ուղերձում.

Մարգարե Ջոզեֆ Սմիթի մոտ կատարած առաջին այցերի ժամանակ Մորոնին մեջբերումներ էր անում Մաղաքիայից:
Թանկագին Մարգարիտը պարունակում է Աբրահամի և Մովսեսի գրքերը։
Կիրթլենդի տաճարում Մովսեսը, Եղիասը և Եղիան պատվիրակեցին իրենց քահանայության բանալիները մարգարե Ջոզեֆ Սմիթին։

Ո՞րն է նպատակը:

Հին Կտակարանի գրքերը կարդալիս պետք է հաշվի առնել, որ դրանք ընտրվել, կարևորվել և դասավորվել են հատուկ ձևով՝ ըստ աստվածաբանական նկատառումների: Մենք պետք է հարցնենք ինքներս մեզ․ «Ինչո՞ւ է ներառվել այս տեղեկատվությունը և ի՞նչ նպատակ է հետապնդում»:

Չնայած Հին Կտակարանի որոշ մասեր կարող են ինչ-որ չափով դժվար ընկալելի լինել, մենք պետք է հիշենք, որ այն պարունակում է հարստություն, որը չպետք է անտեսվի: Ինչպես ուսուցանել է Ջոզեֆ Սմիթը․ «Մենք հավատում ենք, որ Աստվածաշունչն Աստծո խոսքն է, որքան որ այն ճիշտ է թարգմանված» (Հավատո Հանգանակ 1.8)։ Անշուշտ, մենք օրհնված ենք՝ ուսումնասիրելով Աստծո խոսքը:

Հին Կտակարանի մեր ուսումնասիրության ընթացքում օգտակար կլինի փնտրել թեմաներ և մտքեր: Մենք պետք է ուղիներ փնտրենք ավելի լավ հասկանալու համար, որ Հին Կտակարանի Աստվածը նաև Նոր Կտակարանի Աստվածն է: Եհովան Հիսուս Քրիստոսն է։ Ինչպե՞ս է Հին Կտակարանի ուսումնասիրությունն օգնում մեզ ավելի լավ ճանաչել մեր Փրկիչին:

Հին Կտակարանում ես հանդիպում եմ այլ հիմնական թեմաների, որոնցից են՝ ուխտերը, սրբությունը, ապրող մարգարեները, զոհաբերությունն ու հնազանդությունը, հավատքն ու ապաշխարությունը, Տիրոջ փառաբանումը և Աստծո գերիշխանությունը:

Ուսումնասիրելիս մենք պետք է հիշենք, որ վերջին օրերի հայտնությունները մեզ ավելի ամբողջական պատկերացում են տալիս Հին Կտակարանի մասին: Օրինակ՝ ժամանակակից հայտնությունների շնորհիվ մենք գիտենք, որ Հին Կտակարանի մարգարեներն ունեին Մելքիսեդեկյան Քահանայություն, և որ նախորդ տնտեսության մարգարեները գիտեին և ուսուցանում էին Հիսուս Քրիստոսի ավետարանը:

Մարգարեի խոստումները

Ժամանակի այս տնտեսությունում մենք մեկ անգամ ևս օրհնված ենք իմանալու, որ մարգարեներն ու առաքյալները ոգեշնչված ուսմունքներ և խորհուրդներ են տալիս:

Տասներկու Առաքյալների քվորումից երեց Քվենտին Լ. Քուքը 2018 թվականի հոկտեմբերի գերագույն համաժողովում առաջին անգամ ներկայացրեց Եկ, հետևիր ինձ․ Անհատների և ընտանիքների համար նյութը։² Այդ նյութը մեծ օրհնություն եղավ բոլորիս համար։ Վերջին երեք տարիներն ինձ տվել են սուրբ գրությունների ուսումնասիրության ամենախոր և իմաստալից փորձառություններն իմ կյանքում: Համոզված եմ, որ 2022 թվականին յուրաքանչյուրիս սպասում են հավասարազոր օրհնություններ։

Նախագահ Ռասսել Մ․ Նելսոնն ասել է, որ եթե ձգտենք մեր տները վերածել հավատքի սրբավայրի և ավետարանի ուսուցման կենտրոնների, ապա մենք կստանանք չորս հատուկ օրհնություններ․

«Ժամանակի ընթացքում ձեր հանգստության օրերն իսկապես կդառնան բերկրանք»։
«Ձեր երեխաները ոգևորված կսովորեն և կապրեն Փրկիչի ուսմունքներով։
Հակառակորդի ազդեցությունը ձեր կյանքի և ձեր տան վրա կնվազի։
Փոփոխությունները ձեր ընտանիքներում կլինեն նշանակալից և շարունակական»։³

Նախագահ Նելսոնի խոստումները խորքային են և ճշմարիտ։ Այս օրհնություններն իրականացել են և կշարունակեն իրականանալ 2022 թվականին, երբ ուսումնասիրենք և սովորենք Հին Կտակարանը: