“Ko e Houʻeiki Fafine Naʻe Muimui ʻia Sīsū mei Kālelí,” Liahona, Māʻasi 2022.
Ko e Houʻeiki Fafine Naʻe Muimui ʻia Sīsū mei Kālelí
Lēsoni ʻe tolu mei he houʻeiki fafine faivelenga ne muimui kia Sīsū Kalaisí.
Kau Fefine Pau, tā fakatātaaʻi ʻe Walter Rane
ʻI he 1883, naʻe tohi ʻe Hēleni Mā Uitenei ʻo pehē “ʻi he moʻui ʻa Kalaisí, [ʻoku tau lava ai] ʻo mamata ki he līʻoa naʻe fakahaaʻi ʻe ha fefiné. Ko ia naʻe mavahe fakaʻosi mei he Kolosí, pea ko ia naʻe ʻuluaki ʻi he Fonualotó.”1 Neongo naʻe ʻikai fakamahinoʻi ʻe Sisitā Uitenei ʻa e houʻeiki fafine naʻá ne fakamatalaʻí, ka ʻoku kau ʻiate kinautolu ʻa e houʻeiki fafine ne muimui ʻia Kalaisi mei Kālelí. ʻOku fakamatalaʻi ʻe Luke ʻa e houʻeiki fafine ko ʻení, ʻi heʻene tohi naʻe hāʻele ʻa Sīsū “ʻi he kolo mo e potu kakai kotoa pē, ʻo malanga … : pea naʻe ʻiate ia ʻa e toko hongofulu mā toko uá, pea mo [ha] kau fefine naʻe fakamoʻui … , ko Mele ʻoku ui ko Makitaliné, … mo Soana ko e ʻunoho ʻo Kusa ko e tauhi koloa ʻo Hēlotá, mo Sūsana, mo e tokolahi kehe, naʻa nau tauhi ʻaki ia ʻenau koloá” (Luke 8:1–3; tānaki atu hono fakamamafaʻí).
ʻOku ʻuhinga ʻa e kupuʻi lea “tokolahi kehé” ki ha niʻihi tokolahi. Naʻe ʻia Kalaisi ha houʻeiki fafine faivelenga tokolahi. ʻOku hanga ʻe he houʻeiki fafine ko ʻení ʻo akoʻi kitautolu ke langa hake e puleʻanga ʻo e ʻOtuá pea ke tau ʻi ai mo kinautolu ʻoku faingataʻaʻiá. ʻOku nau akoʻi kitautolu ke tau loto-toʻa mo nofo ofi kia Kalaisi neongo e taimi faingataʻá. Mahalo ko e meʻa mahuʻinga tahá, ʻoku nau akoʻi mai te tau lava ʻo mavahe mei he fakapoʻulí pea haʻu ki he māmá ʻo fakafou ʻia Kalaisi.
Naʻe ʻikai ke nofo noa pē ʻa Mele Makitaline, Soana, Sūsana,2 pea mo e houʻeiki fafine tokolahi kehe naʻe muimui ʻia Kalaisí; ka naʻa nau poupouʻi lelei ʻa ʻEne ngāué (vakai, Luke 8:2–3)). ʻOku fakapapauʻi mai ko Soaná ko e mali ʻo e tauhi koloa ʻa Hēlotá, ʻo ngalingali naʻe ʻi ha tuʻunga mo ha mafai hono husepānití maʻá e Tuʻi ko Hēlota ʻAnitipasí, ko e pule ʻi Kālelí.
ʻI he fononga fakataha ʻa e houʻeiki fafine ko ʻení mo Kalaisi ʻi Kālelí, ngalingali naʻa nau fanongo ki ha konga lahi ʻo ʻEne ngaahi malangá, fanongo ki Heʻene ngaahi talanoa fakatātaá, mo mamata ʻi he ngaahi mana hangē ko hono fakamoʻui ʻo e fefine naʻe ʻau totó pea mo e fefine naʻá ne faingataʻaʻia ʻi ha taʻu ʻe 18 (vakai, Luke 8:43–48; 13:11–13). Mahalo naʻa nau ʻi ai ʻi hono fafanga ʻo e toko 5,000, pea mo ha ngaahi mana kehe (vakai, Luke 9:12–17; 14:1–4). ʻI he fakaʻosinga ʻo e ngāue fakafaifekau ʻa Kalaisi ʻi Kālelí, naʻe muimui ha niʻihi ʻo e houʻeiki fafiné ni kiate Ia ʻi ha uike ʻe taha ʻo ʻenau fononga ki Selusalemá (vakai, Mātiu 27:55–56)).
ʻOku ʻomi ʻe he Ngaahi Kosipelí e hingoa ʻo ha houʻeiki fafine tokolahi naʻa nau muimui mo tokoni kia Sīsū, kau ai ʻa Mele, Soana, mo Sūsana. Naʻa nau fanongo “mo ha niʻihi kehe tokolahi” ki he akonaki ʻa e Fakamoʻuí pea ngalingali naʻa nau fakamoʻoniʻi e ngaahi maná.
Tā fakatātaaʻi ʻe Dan Burr
Tangi Fakataha mo Kinautolu ʻOku Tangí
Kiʻi fakakaukau angé ki he foʻi moʻoni ko ia naʻe haʻu e houʻeiki fafine ko ʻení mo Kalaisi mei Kāleli pea naʻa nau ʻi Hono Tutukí. Neongo ʻoku ʻikai fakamatala e folofolá ki heʻenau kau atu ki he ngaahi meʻa kehe naʻe hoko ʻi he uike fakaʻosi ʻo e moʻui ʻa e Fakamoʻuí, ka ʻoku ngalingali naʻa nau ʻi ai ʻi he hū lāngilangiʻiá, fanongo ki Heʻene ngaahi akonaki ʻi he temipalé, pea mahalo naʻa nau kau atu ki ha ngaahi meʻa kehe ne hoko.
Naʻe lekooti ʻe Luke naʻe ʻi Kalevale ʻa e houʻeiki fafine ko ʻení: “Pea ko e kāinga kotoa pē [ʻo Kalaisi] mo e kau fefine naʻe muimui ʻiate ia mei Kālelí, naʻa nau tutuʻu mei he mamaʻó, ʻo vakai [ki he Tutukí]” (Luke 23:49). Naʻe lave ʻa Mātiu ki he falukunga kakai fefine tatau ko ʻení, ʻo ne lekooti ʻo pehē, ʻi he kolosí, “naʻe ʻi ai ʻa e kau fefine tokolahi, naʻe tutuʻu mei he mamaʻó ʻo vakai, naʻa nau muimui ʻia Sīsū mei Kāleli, ʻo nau tauhi ia: ko honau niʻihi ko Mele Makitaline, mo Mele ko e faʻē ʻa Sēmisi mo Sosé, mo e faʻē ʻa e fānau ʻa Sēpetí” (Mātiu 27:55–56).3
Fakakaukau ki he mamahi lahi naʻe ongoʻi ʻe he houʻeiki fafine ko ʻeni ʻi he kolosí ʻi heʻenau mamata ki he mamahi ʻa e Fakamoʻuí. ʻOku tau maʻu kotoa pē ha ngaahi taimi ʻoku aʻusia ai ʻe kinautolu ʻoku tau ʻofa aí ha meʻa fakamamahi pea ʻoku ʻikai hatau mālohi ke fakahoko ha faʻahinga meʻa ki ai. Neongo naʻe ʻikai lava ʻe he houʻeiki fafine ʻi he kolosí ʻo liliu ʻa e tūkungá, ka naʻa nau kei ʻi ai pē mo e Fakamoʻuí ʻi Heʻene mamahi lahi faú. ʻOku fakahaaʻi mai ʻe heʻenau ngaahi sīpingá ko e founga ʻe taha “ke tangi fakataha mo kinautolu ʻoku tangí” (Mōsaia 18:9) ko ʻetau ʻi ai fakataha pē mo kinautolu ʻoku faingataʻaʻiá.
Loto-toʻa pea Nofo Ofi
ʻOku ʻomi foki ʻe he houʻeiki fafiné ni ha sīpinga ʻo e loto-toʻá. Mahalo naʻe ʻi ha tuʻunga fakatuʻutāmaki kiate kinautolu ke nau nofo ʻi he kolosí, koeʻuhí ne nau feohi mo ha taha naʻe fakapoongi ʻe Loma. Ko e meʻa naʻe tohi ʻe Kamila Foloniki ʻOlosoni fekauʻaki mo Mele, ko e faʻē ʻa Sīsuú (ʻa ia naʻe ʻi he kolosí foki), ʻoku moʻoni ia ki he kau fefine ko ʻení: “ʻI heʻene tuʻu ʻi he tafaʻaki ʻo Sīsuú ʻi he meʻa naʻe pehē ʻe he niʻihi kehé ko ha faingataʻa fakamaá, naʻe fakahā foki ʻe Mele naʻe lahi ange ʻene manavahē ki he ʻOtuá ʻi heʻene manavahē ki he tangatá. Neongo pe ko e hā ha tukuakiʻi ʻe lava ke fakahoko ʻe ha taha mei he tafaʻakí kiate ia, ka ʻoku fakahaaʻi ʻe he tuʻunga fakalongolongo ʻo Melé ʻoku ʻikai tatau ia mo e niʻihi kehe ʻo ʻene kau ākongá, he ʻikai ke ne fakaʻikaiʻi ʻene feohi mo Sīsuú.4
Naʻe ʻikai ngata pē ʻi he ʻi ai ʻa e falukunga houʻeiki fafine tokolahi ko ʻení ʻi he pekia ʻa Kalaisí, ka naʻa nau “mamata ki he fonualotó, mo e tuku ʻo hono sinó. Pea naʻa nau liu mai, ʻo tokonaki ʻa e ngaahi ʻakau namu kakala mo e lolo tākai; pea nau mālōlō ʻi he ʻaho Sāpaté ʻo hangē ko e fekaú” (Luke 23:55–56). Koeʻuhí ko e fakatuʻutāmaki ne nau fehangahangai mo ia mei he kau maʻu mafai ʻo e kau Siú pe ko e kau Lomá, naʻe mei lava ke teuteu e houʻeiki fafine ko ʻení ke mavahe fakavavevave mei he koló. Ka, ne nau teuteu ʻe kinautolu ha ngaahi ʻakau fakanamu lelei ki he sino ʻo Kalaisí (vakai, Luke 24:1). Neongo naʻe taʻepau honau kahaʻú, ka naʻa nau kei nofo ofi pē ki he feituʻu naʻe ʻi ai ʻa Sīsuú. ʻI he ʻuhinga ʻa e kalisitiane faʻutohi ko Mekisi Lukató ki he Tokonaki hili e Tutukí, ʻokú ne fehuʻi ai: “ʻI he aʻu hoʻo moʻuí ki he Tokonakí, ko e hā hoʻo meʻa ʻe fakahokó? ʻI he taimi ʻokú ke ʻi ha feituʻu ai ʻi he vahaʻa ʻo e meʻa fakamamahi ʻo e ʻaneafí mo e ikuna ʻapongipongí, ko e hā hoʻo meʻa ʻe faí? ʻOkú ke mavahe nai mei he ʻOtuá—pe ʻokú ke nofo ofi kiate Ia?”5 ʻOku akoʻi kitautolu ʻe he houʻeiki fafine ko ʻení ke tau nofo ofi kia Sīsū, naʻa mo e ngaahi taimi faingataʻá.
Haʻu ki he Māmá
Ko e Mele ʻe Tolu ʻi he Fonualotó, tā fakatātaaʻi ʻe William Adolphe Bouguereau
ʻOku ʻikai ha ofo ʻi he hoko ʻa e falukunga houʻeiki fafine tatau ko ʻení ko e fuofua niʻihi naʻe ʻi he fonualotó ʻi he pongipongi Toetuʻú (vakai, Luke 24:1–10).6 Naʻe fakahā kiate kinautolu ʻe he ʻāngeló ʻa e ongoongo fakafiefiá:
“Ko e hā ʻoku mou kumi ai ʻa e moʻuí ʻi he potu ʻo e maté?
“ʻOku ʻikai ʻi heni ia, ka kuo tuʻu hake: mou fakamanatu ki heʻene lea kiate kimoutolu ʻi Heʻene kei ʻi Kālelí” (Luke 24:5–6).
Naʻe “manatu ki heʻene ngaahi leá” ʻa e houʻeiki fafiné pea nau foki, ʻo “fakahā ʻa e ngaahi meʻá ni kotoa pē ki he toko hongofulu mā tahá, mo e kakai kehe kotoa pē” (Luke 24:8–9).
ʻOku talamai ʻe he ʻAposetolo ko Sioné ko Mele Makitaline ʻa e fuofua tokotaha ke mamata ki he Fakamoʻui kuo toetuʻú (vakai, Sione 20:11–17). Mahalo ʻoku mātuʻaki fakaofo ʻeni ʻi he taimi ʻoku tau manatuʻi ai naʻe lekooti ʻe Luke, ʻi he konga kimuʻa ʻo e moʻui ʻa Melé, naʻe hūsino ʻiate ia ha “tēvolo ʻe toko fitu” (Luke 8:2)). Mahalo te tau lava ʻo mamata heni naʻe fakalakalaka ʻa Mele mei ha tūkunga faingataʻa moʻoni ke hoko ko e fuofua fakamoʻoni fakaetangata ki he Toetuʻu ʻa Kalaisí. ʻOku fokotuʻu mai heni ko e taimi ʻoku tau fetuʻutaki ai mo Sīsū Kalaisí, te Ne lava ʻo tokoniʻi kitautolu ke tau mavahe mei he fakapoʻulí pea haʻu ki he māmá. Neongo pe ko e hā ha ngaahi faingataʻa kuo tau aʻusia he kuohilí, te tau lava ʻo maʻu ʻa e fiefiá ʻi he haʻu kia Kalaisi he taimi ní.
ʻOku hoko ʻa Mele Makitaline, Soana, Sūsana, mo e houʻeiki fafine kehe ne muimui ʻia Kalaisi mei Kālelí ko ha ngaahi sīpinga mālohi ʻo e kau ākonga ʻoku tokoni ʻi hono langa hake e puleʻanga ʻo e ʻOtuá. ʻOku nau akoʻi kitautolu ke tau ʻi ai mo kinautolu ʻoku faingataʻaʻiá, loto-toʻa pea ʻoua ʻe liʻaki ʻa Sīsū—neongo e ngaahi taimi faingataʻá. ʻOku akoʻi kitautolu ʻe he houʻeiki fafiné ni, ko e kau fakamoʻoni ki he Kalaisi kuo toetuʻú, te tau lava ʻo mavahe mei he fakapoʻulí pea haʻu ki he māmá ʻo fakafou ʻiate Ia.
ʻI he 1893, naʻe tohi ʻe ha Mēmipa ʻo e Siasí ko Lu Tolotoni ʻa e ngaahi laine ko ʻení ʻa ia ʻokú ne fālute e mālohi ʻo e houʻeiki fafine ne muimui ʻia Sīsū Kalaisí:
Ko e ʻuluakí ke talitali angaʻofa e faʻahinga ʻo e tangatá ʻi hono fāʻeleʻí
Fakamuimui tahá ke mavahe meiate ia ʻi he pekiá,
ʻUluakí ke fakafiefiaʻi hono lotó,
Fakamuimui tahá ke loto-foʻi pea ʻikai toe feingá.
Fakamuimui tahá ke ʻi he kolosi ʻo hono ʻEiki kuo tutukí,
ʻUluakí ke mamata kiate ia ʻi he toe tuʻú,
ʻUluakí ke talaki kuó Ne toe moʻuí,
ʻO maumauʻi e fale fakapōpula mamahi ʻo e maté.7