“ʻOku Faaitaha Hotau Laumālié ʻi he Hivá,” Liahona, Māʻasi 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní: Houʻeiki Fafine ʻo e Tuí
ʻOku Faaitaha Hotau Laumālié ʻi he Hivá
Naʻe veteki e ʻā vahevahe ʻo e lea fakafonuá koeʻuhí ne mau ʻilo e Tokotaha mo e meʻa ne mau hiva fekauʻaki mo iá.
ʻI heʻema heka mo hoku kaungāmeʻá ʻi he vakapuna lahi ʻi Soulu, Kōlea Tongá, naʻá ma fakafeʻiloaki kamokamo ki he fefine matuʻotuʻa Kōlea naʻe tangutu ʻi he sea taupotu ki he lueʻangá. Ne ma fakahaohao atu leva ʻo fakalaka ai ki homa nofoʻangá, naʻe tangutu hoku kaungāmeʻá ʻi he sea ʻi lotomālié peá u tangutu au ʻo taupotu ki he matapā sioʻatá.
ʻI heʻemau tō hake ki ʻolungá, hili ha ngaahi miniti siʻi pē kuó u fanongo ki ha fasi ongo vaivai ʻo ha foʻi himi. Ne u ʻiloʻi ia ko e himi “ʻE ʻOtua ko e Tapuhaá,”1, ʻa ia ʻoku ʻiloʻi lelei ia ʻi he ngaahi siasi faka-Kalisitiane lahi pea kuó u toki maʻuloto foki kimuí ni.
Ne u vakavakai holo ke fakapapauʻi e feituʻu ʻoku haʻu mei ai ʻa e ongó. ʻI heʻeku sio holó, ne u fakatokangaʻi naʻe puke ʻe he fefine Kōlea ʻi homau ʻotú ha kiʻi himi—naʻe paaki ʻi he lea faka-Kōleá—mei hono siasi Palotisaní.
Ne u fetongi sea leva mo hoku kaungāmeʻá peá u kau fakalongolongo atu ki he hiva ʻa e fefiné, pea naʻá ma fiefia fakataha ai. Naʻe ʻikai ke ne lea faka-Pilitānia, pea naʻe ʻikai ke u lea pe laukonga faka-Kōlea. Ka ʻoku ou lava ʻo lau ʻa e mūsiká.
Ko ia ai, ʻi heʻene huke ʻa e ngaahi lauʻi peesi ʻo ʻene himí, ne u sio ki he laine ʻuluaki ʻo e ngaahi notá peá u kamokamo leva kapau ne u ʻiloʻi e foʻi himí. Ne u ngūnguuʻi e tō ʻo e foʻi hivá, pea kamata leva ʻema hivá, ko ia ʻi he lea faka-Kōleá mo au ʻi he lea faka-Pilitāniá. Naʻá ne hivaʻi ʻa e fasí, ka u fakafaʻahi atu au.
Ne ʻikai fuoloa kuo kau mai ha kau pāsese ʻi he ngaahi ʻotu ʻi muʻá, mo mui, pea ki homau tafaʻakí. ʻI ha meimei houa ʻe taha, ne hivaʻi ʻe heʻemau kuaea naʻe ʻikai ke palaní ha ngaahi himi faka-Kalisitiane angamaheni ʻi heʻemau ngaahi lea faka-fonuá. Naʻe veteki e ʻā vahevahe ʻo e lea fakafonuá koeʻuhí ne mau ʻilo e Tokotaha mo e meʻa ne mau hiva fekauʻaki mo iá. ʻOku faaitaha homau laumālié ʻi he hivá.
Kimuʻa pea tufa mai ʻe he kau ngāue ʻo e vaká ʻemau meʻatokoni efiafí, ko ʻemau himi fakaʻosí ko e “Pō Māluú”2 ka ko e vaeuaʻanga mālie pē ia ʻo ʻOkatopá.
Talu mei he aʻusia ko iá, mo ʻeku fakakaukau ki he ngali kehe, kae mātuʻaki fakaʻofoʻofa ʻa e lava ke fakatahatahaʻi ʻe ha falukunga kakai kehekehe honau leʻó ʻi he ngaahi himí ʻi ha vakapuna seti ʻi ʻolunga ʻi he ʻēlia ʻo e Pasifikí.
ʻOku ou kei maʻu pē ʻa e ongo tatau ʻi he taimi kotoa pē ʻoku ou hivaʻi ai ʻa e “ʻE ʻOtua ko e Tapuhaá” mo e “Pō Māluú.” He ʻikai ke u lava ʻo hivaʻi e ngaahi himi ko iá ʻo ʻikai te u fakakaukau ki he fefine Kōlea ko iá mo e meʻafoaki ʻo e mūsiká naʻá ne ʻai ke mau lava ʻo vahevahe ʻa e tui tatau ʻoku mau maʻu ki hotau Fakamoʻui ko Sīsū Kalaisí.