“Ta ʻAʻahi ki he Temipalé,” Liahona, Māʻasi 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní: Houʻeiki Fafine ʻo e Tuí
Ta ʻAʻahi ki he Temipalé
ʻI heʻeku lotu ke ʻiloʻi e founga te u lava ai ʻo tokoni ki heʻeku faʻē ʻi he fonó, naʻá ku fakakaukau ki he temipalé.
Faitaaʻi e Temipale Bogotá Colombia ʻe Ivan Ortiz Ponce
Lolotonga e mahaki fakaʻauha COVID-19, naʻe tāpuni ʻa e Temipale Bogotá Colombia. Koeʻuhí naʻe ʻikai ke u toe lava ʻo ʻalu [ki he temipalé], ne u faʻa fakakaukauloto pē ki he temipalé, ʻo manatuʻi e ngāue ne u fakahoko ai ko ha tokotaha ngāue temipalé.
Naʻe puke lahi ʻaupito ʻeku faʻē ʻi he fonó hili pē ha taimi nounou mei he kamata ʻa e kolonitini COVID-19 ʻi Kolomupiá. ʻI heʻeku lotu ke ʻiloʻi e founga ke u tokoni ai kiate iá, naʻá ku fakakaukau ki he temipalé.
ʻI heʻeku fakakaukau ki he temipalé, naʻe ueʻi au ʻe he Laumālie Māʻoniʻoní ke u kole ki heʻeku faʻē ʻi he fonó pe ʻe fie fakakaukauloto ʻokú ma ʻaʻahi ki ha “taha ʻo e ngaahi feituʻu fakaʻofoʻofa taha ʻi he māmaní.”
Naʻá ne tali mai ʻi ha leʻo vaivai, “ʻIo.”
Naʻá ma fakakaukauloto atu ki heʻema kamata mei hono ʻapi ʻi Meteliní, ʻo fononga ki hoku ʻapi ʻi Pokoutaá, peá ma toki aʻu atu ki he temipalé. Naʻá ma fakakaukauloto atu ʻokú ma hū mo ngāue ʻi he temipalé. Naʻá ma fakakaukauloto atu ki haʻama tangutu fakataha ʻi he loki silesitialé, ʻo fakahoko ha lotu fakafetaʻi ki he ʻEikí.
Hili iá, naʻá ma tautapa ki he Tamai Hēvaní ke toe moʻui lelei ange ʻeku faʻē ʻi he fonó ʻo fakatatau ki Hono finangaló, pea ke ʻi ai ha taimi ʻe toe lava ai ʻo foki mai ki he temipalé. Ko ha aʻusia makehe mo molumalu ia naʻá ne fakamālohia mo poupouʻi ia.
Ko e taha ʻo e ngaahi talanoa fekauʻaki mo e Fakamoʻuí ʻoku ongo taha kiate aú, naʻe hoko ia ʻi he kolo ko Kāpaneumé. ʻOku akoʻi mai ʻe he talanoa ko ʻení ʻe lava ke tāpuekina mo fakamoʻui ʻe he ʻEikí ʻa e niʻihi kehé ʻo fakafou ʻi he tokoni mei he kau mēmipa ʻo e fāmilí mo e ngaahi kaungāmeʻá.
ʻI he taimi naʻe ʻilo ai ʻe he kakai ʻi Kāpaneumé ʻoku ʻi ha fale ʻe taha ʻa Sīsuú, naʻa nau ʻomi kiate ia ha tangata naʻe mahaki tete.
“Pea ʻi he ʻikai te nau faʻa hao ʻo ofi kiate ia koeʻuhí ko e kakaí, naʻa nau tatala ʻa e ʻato ʻo e fale naʻe ʻi ai iá: pea kuo haeʻi ia, naʻa nau tukutuku hifo ʻa e mohenga naʻe tokoto ai ʻa e mahaki teté.
ʻI he ʻafio ʻa Sīsū ki heʻenau tuí, naʻá Ne folofola ki he tangatá, “Tuʻu hake, ʻo toʻo ho mohengá, mo ke ʻalu ki ho falé.” (Vakai, Maʻake 2:1–11.)
Hangē ko e tangata mahaki teté, naʻe fakamoʻui ʻeku faʻē ʻi he fonó ʻe he mālohi ʻo e Fakamoʻuí ʻo fakafou ʻi ha tāpuaki ʻo e lakanga fakataulaʻeikí pea ʻi heʻene tuí pea mo e tui ʻa e fāmilí mo e ngaahi kaungāmeʻá.
ʻI he ngaahi taimi taʻepau ko ʻení, ʻoku ou ʻilo te tau lava ʻo maʻu ha fakahinohino ke fakamālohia mo poupouʻi ʻa kinautolu ʻoku faingataʻaʻiá. Kapau te tau tafoki ki he Tamai Hēvaní pea manatu maʻu ai pē kiate Ia mo Hono ʻAló, te tau lava ʻo maʻu ʻa e nongá, ʻamanaki leleí, mo e fakamoʻuí.