“Ko e Ngāue ʻi he Ngaahi Uiuiʻi Faka-Siasí,” Liahona, Māʻasi 2022.
Ngaahi Tefitoʻi Meʻa Mahuʻinga ʻo e Ongoongoleleí
Ko e Ngāue ʻi he Ngaahi Uiuiʻi Faka-Siasí
ʻOku kole ʻe he kau taki ʻo e Siasí ki he kāingalotú ke nau ngāue ʻi ha ngaahi fatongia pau ʻoku ui ko e “ngaahi uiuiʻí.” ʻOku ʻoange ʻe he ngaahi uiuiʻí ha faingamālie ki he kāingalotú ke nau tokoniʻi e niʻihi kehé pea ofi ange ai ki he ʻOtuá.
Faitaaʻi ʻe David Bowen Newton
ʻI he taimi ʻoku tau ngāue ai ʻi hotau ngaahi uiuiʻí, ʻoku tau tokoni ke fakahoko e ngāue ʻa e ʻOtuá. ʻOku tau akoʻi e niʻihi kehé fekauʻaki mo e Tamai Hēvaní mo Sīsū Kalaisi pea tokoniʻi kinautolu ke toe ofi ange kiate Kinaua. ʻOku tau toe maʻu foki ha ngaahi tāpuaki ʻi heʻetau ngāue faivelengá.
Ko Hono Maʻu ha Ngaahi Uiuiʻí
Ko kinautolu ʻoku ngāue ʻi he Siasí naʻe uiuiʻi kinautolu ʻe he ʻOtuá. ʻOku lotua ʻe he kau taki ʻo e Siasí ha ueʻi fakalaumālie ke ʻiloʻi pe ko hai ʻe kole ke ngāue ʻi he uiuiʻi takitaha. ʻE toki kole leva ʻe ha taki ki ha mēmipa ke ngāue mo fakamatalaʻi ange e ngaahi fatongia ʻo e uiuiʻí. Ko e lahi taha ʻo e ngaahi uiuiʻí, ʻoku hikinimaʻi ʻa e kāingalotú ʻi ha fakatahaʻanga ʻa e Siasí. ʻOku hikinimaʻi leva ia ʻe he kāingalotu ʻo e uōtí pe koló. ʻOku ʻuhinga ʻeni ʻoku nau loto fiemālie ke poupouʻi ʻa e tokotaha ʻoku uiuiʻí. ʻE foaki leva ki he mēmipá ha tāpuaki ʻe ha taki lakanga fakataulaʻeiki. ʻOku ui ʻeni ko e vaheʻí. ʻE foaki ki he mēmipá ha mafai ke ngāue ʻi he uiuiʻí mo ha ngaahi tāpuaki kehe ke tokoni ki heʻene ngāué.
Kau Pīsopé
Ko e pīsopé ʻa e taki ʻo ha uooti. (ʻOku faitatau ha palesiteni fakakolo ʻi ha kolo mo ha pīsope.) ʻE fakaongoongoleleiʻi ʻe he palesiteni fakasiteikí ha taha maʻu lakanga fakataulaʻeiki moʻui taau ke uiuiʻi ko ha pīsope. ʻOku fakangofua ʻe he Kau Palesitenisī ʻUluakí ʻa e uiuiʻí. ʻOku hikinimaʻi leva mo vaheʻi ʻa e pīsopé ke ngāue. ʻOkú ne toe maʻu foki mo e ngaahi kī ʻo e lakanga fakataulaʻeikí, ʻa ia ʻoku ʻuhinga ia ʻokú ne maʻu e mafai ke tataki e uōtí. ʻI heʻene hoko ko e pīsopé, ʻokú ne ngāue mo tataki e kāingalotu kotoa ʻo e uōtí.
Kau Palesitenisií
ʻOku tataki e ngaahi kōlomu ʻo e Lakanga Fakataulaʻeikí mo e Fineʻofá, Kau Finemuí, Palaimelí, mo e Lautohi Faka-Sāpaté ʻe he kau palesitenisií, ʻo meimei ko ha palesiteni mo ha ongo tokoni. ʻOku ui mo vaheʻi e kau palesitenisī ʻo e kōlomu ʻo e kaumātuʻá ʻe he kau palesitenisī fakasiteikí. ʻE kole ʻe he kau pīsopelikí ha kāingalotu ke ngāue ʻi he kau palesitenisī kehe ʻi he uōtí mo vaheʻi kinautolu. ʻE tokoniʻi ʻe he kau taki kotoa pē ʻa e kau mēmipa ʻi heʻenau ngaahi kōlomú pe ngaahi houalotú. ʻOku nau ngāue fakaetauhi ki he ngaahi fiemaʻu ʻa e kāingalotú mo tokoniʻi kinautolu ke nau ongoʻi e ʻofa ʻa e ʻOtuá.
Ngaahi Uiuiʻi Kehé
ʻOku kau ʻi he ngaahi uiuiʻi kehe ʻi he Siasí ʻa e faiakó, tokoni ʻi he hivá, tauhi lekōtí, palani ha ngaahi ʻekitivitī maʻá e toʻu tupú pe fānaú, mo e tokoni ʻi ha ngaahi founga kehé. ʻOku mahuʻinga ʻa e uiuiʻi kotoa pē ʻi he Siasí pea ʻoku maʻu ai ʻe he kāingalotú ha faingamālie ke tokoni ki he niʻihi kehé mo tauhi ki he ʻOtuá. ʻI heʻetau ngāue fakataha ke fakahoko hotau ngaahi uiuiʻí, ʻoku tau fakamālohia ai ʻa e niʻihi kehé mo tokoni ke tupulaki ʻa e Siasí.