“Fakatukupaaʻi Kakato Hoʻo Moʻuí,” Liahona, Māʻasi 2022.
Faivelenga ʻi he Fakaʻau ke Motuʻa Angé
Fakatukupaaʻi Kakato Hoʻo Moʻuí
Neongo kapau ʻe fie maʻu ke ke toe “longomoʻui ange” ai, ka te ke maʻu ha fiefia ʻi he hoko ko ha faifekau matuʻotuʻá.
Laʻitā ne maʻu ʻi he angalelei ʻa e tokotaha naʻá ne faʻú
Hili ha ngaahi māhina siʻi mei heʻeku foki mo hoku husepānití ki ʻapi mei heʻema ngāue fakafaifekau tokoni ʻofa fakaetangatá, naʻe kamata ke u manatu melie ki ai. Ko e hā naʻe kei mahuʻingamālie fau ai ʻema ngāue fakafaifekaú?
ʻI he taimi ʻoku kole mai ai ke ma lea fekauʻaki mo ʻema ngaahi aʻusiá, ʻoku hangē ia hano tafiʻi au ʻe ha vaitō ʻo e ngaahi leleí ʻo fakafoki au ki he taimi mo e ngaahi aʻusia ne ma vahevahe mo e kakai fakaʻofoʻofa ʻo Laosí.
ʻOku ou manatuʻi ha foʻi hiva fakaoli ne ma faʻa hiva mo kinautolu. ʻOku ui ia ko e “The Hokey Pokey,” pea ʻoku kau ʻi he veesi fakaʻosí ʻa e kupuʻi lea, “Fakatukupaaʻi kakato hoʻo moʻuí, peá ke longomoʻui ange.” ʻI heʻemau hivaʻi e foʻi hivá, ʻoku kau fiefia mai ki ai e kakaí. Te nau ngaungaue mo tauʻolunga, pea pasipasi fiefia.
ʻOku ou tui ʻoku fakamatalaʻi ʻe he foʻi hivá ʻema ngaahi ongo fekauʻaki mo homa misioná—ʻokú ma fakatukupaaʻi kakato kimaua ki he ngāue ʻa e ʻEikí. Naʻe ʻikai fuoloa kuó ma ʻiloʻi ʻema monūʻia ke kau ʻi he anga fakafonua ‘o Laotieni. ʻI heʻema hoko ko ha ongo faifekau tokoni ʻofa fakaetangatá, ne ma tokoniʻi kinautolu ʻaki hono akoʻi e lea faka-Pilitāniá. Ne ma talanoa, tauʻolunga, mo vilo takatakai holo pē ʻi heʻema ngaahi kalasí. Ka naʻe lelei ʻaupito e totongi fakafoki ne ma maʻú. Ne ma ʻiloʻi, hangē ko ʻema ʻofa lahi ʻaupito ʻiate kinautolú, ne nau ʻofa foki mo kinautolu ʻiate kimaua.
Naʻe hoko homa misioná ko ha taimi makehe ʻo ʻema moʻuí ʻa ia te ma lava moʻoni ʻo pehē ʻoku ʻamaua ia. ʻOkú ne fakangingilaʻi ʻa e ngaahi taʻu koula ʻo ʻema fakatōtōlaʻaá. Ne ma fakaʻaongaʻi ʻema moʻuí ʻi hono ohi hake ʻema fānaú, kumi ha maʻuʻanga moʻuí, fakatau ha ʻapi nofoʻanga, mo fakahoko kotoa e ngaahi meʻa ne ngali mahuʻinga ʻi he fonongá. Pea hoko mai leva ʻa e maʻu vāhenga mālōloó pea mo e fehuʻi, “Ko e hā te ta fakahoko i he taimi ní?”
Ko ʻeku pōpoakí kapau ʻokú ke fie maʻu ha fiefia ʻoku tuʻuloá, tokoniʻi ha taha ʻi hoʻo moʻuí. Ko e maʻuʻanga ia ʻo e fiefia ʻoku moʻoní—ʻa e ngāue tokoní. Pea ko e meʻa fakaʻofoʻofa tahá, ʻi he lolotonga hoʻo foakí, ʻokú ke toe mahutafea foki ʻi he ngaahi tāpuakí. Ne ma fakatokangaʻi ne ʻikai maʻu ʻe ha kakai Laosi tokolahi ha ngaahi koloa fakamāmani lahi. Ka ne nau tuʻumālie ʻi he fiefia ʻo e moʻuí, ko ha fiefia ne nau vahevahe tauʻatāina mo kimaua. Ne nau fakatupulaki ʻema malava ke fiefiá.
Tā fakatātaaʻi ʻe Carolyn Vibbert
Ko ia, ʻoua naʻá ke manavasiʻi ke “fakatukupaaʻi kakato hoʻo moʻuí,” neongo kapau ʻe fie maʻu ai ke ke toe “longomoʻui ange ai.” Hiva mo tauʻolunga ʻi ha anga fakafonua kehe pea te ke fakatokangaʻi foki te ke aʻusia ha ngaahi meʻa fakaʻofoʻofa lahi. Ko e taha ia ʻo e ngaahi fakapulipuli ʻo e ngāue fakafaifekau tokoni ʻofa fakaetangatá—ʻokú ke foaki mo maʻu mai. ʻOku ou fakamālō ki heʻeku Tamai Hēvaní he ʻaho kotoa pē ʻi hono tāpuekina kimaua ke kau ʻi ha faingamālie fakaʻofoʻofa pehē, ke vahevahe e laumālie ʻo e ongoongoleleí mo homau ngaahi tokoua mo e tuofāfine ʻi Laosí.
ʻOku nofo ʻa e tokotaha naʻá ne faʻu e talanoá ʻi ʻIutā, USA.