“Te u ʻAlu Nai?,” Liahona, Māʻasi 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní: Houʻeiki Fafine ʻo e Tuí
Te u ʻAlu Nai?
Hili ʻeku ʻita ʻi ha ʻekitivitī ʻa e Fineʻofá, naʻe fie maʻu ke u fakahoko ha fili.
Fokotuʻu ʻe ha tokotaha fakaʻaliʻali
Hili ha taimi nounou mei heʻeku kau ki he Siasí, naʻe fakakata ha taki ʻo e Fineʻofá fekauʻaki mo ha ngaahi tūkunga fakaoli. Fakafokifā pē kuo kamata ke ne fakakata ʻaki au ʻi muʻa ʻi he taha kotoa. Naʻá ku ongoʻi taʻefiemālie peá u fakaʻatā au ke u ongoʻi ʻita.
Ko ʻeku ʻuluaki fakakaukaú ke ʻoua naʻá ku toe foki ki he uōtí. Ne u fakaava ʻeku folofolá, ʻo feinga ke maʻu ha fakafiemālie. Lolotonga ʻeku laú, naʻá ku maʻu ha veesi naʻe fehuʻi ai ʻe Sīsū kiate kinautolu naʻe ʻita ʻi heʻene ngaahi akonakí, “ʻE ʻalu mo kimoutolu foki?” (Sione 6:67).
Ne u tali loto pē he taimi ko iá, “ʻIkai, he ʻikai ke u ʻalu au!”
Naʻá ku telefoni ki he palesiteni Fineʻofá, ʻa ia naʻá ne fokotuʻu mai ke u fetuʻutaki ki he fefine naʻá ne fakakata ʻaki aú. Ne u tā telefoni ki ai ʻo fakahaaʻi ange ʻeku ngaahi ongó. Naʻá ma pehē ʻoku lelei ʻaupito ʻa e poto he tukuhuá ka ʻoku ʻikai totonu ke te fakakata ʻaki ha taha ʻoku ʻikai ke te ʻiloʻi ʻi muʻa ʻi ha falukunga kakai. Ne ma talanoa foki fekauʻaki mo hono lehilehiʻi e ongo ʻa e kau mēmipa foʻou ki he uōtí.
Naʻe hokohoko atu pē ʻeku maʻulotu ʻi he uōtí lolotonga ʻeku nofo he kolo ko iá. Ne u aʻusia ha ngaahi meʻa fakaʻofoʻofa lahi hili ʻeku ului ki he ongoongoleleí.
ʻI heʻeku fononga fakataautaha ke ikunaʻi e ngaahi ongo ʻitá, naʻá ku maʻu ai e ngaahi lea lelei ko ʻení mei hotau kau taki ʻi he Siasí:
“Kapau ʻoku pehē ʻe ha taha pe te ne fai ha faʻahinga meʻa ʻoku tau pehē ʻoku fakatupu ʻita, ko hotau ʻuluaki fatongiá ke fakafisi ke ʻoua te tau ʻita pea fetuʻutaki fakaekita pē, mo moʻoni, pea mo fakahangatonu mo e tokotaha fakafoʻituitui ko iá.”1
“ʻOku ou palōmesi atu kiate kimoutolu, ʻi hoʻo fili ke ʻoua naʻá ke ʻita pe maá, te ke ongoʻi leva [e] ʻofa [ʻa e Fakamoʻuí] mo ʻEne tali koé”2
ʻOku ou houngaʻia naʻá ku fili ke ʻoua naʻá ku ʻalu mei he Siasí koeʻuhí ko ha kiʻi lea taʻetokanga. Pea ʻoku ou houngaʻia ʻi heʻeku hoko ko ha mēmipa ʻo e Siasi kuo fakafoki maí, ʻa ia ʻoku ou maʻu ai ʻa e mālohi ke faivelenga mo hokohoko atu ʻi he hala ʻo e moʻui fakaākongá. ʻOku ou houngaʻia ʻi he faleʻi ʻa e kau palōfitá mo e kau ʻaposetoló, ʻa ia ʻoku nau akoʻi kitautolu he founga ke feohi mo hotau kāingá ʻi he ongoongoleleí.
ʻOku ou lava ʻo hokohoko atu ke faivelenga mo fili ke ʻoua te u ʻita. Te u lava ʻo tokanga taha pē ki heʻeku ngaahi feinga ke anga faka-Kalaisí mo ongoʻi e ʻofa mo e tali ʻa e Fakamoʻuí.
Te u ʻalu nai? ʻIkai. ʻOku ou maʻu ha fakamoʻoni ko e Siasi ʻeni ʻo Sīsū Kalaisi kuo fakafoki maí ʻi he māmaní he ʻahó ni pea ʻoku maʻu ai e “ngaahi lea ʻo e moʻui taʻengatá” (Sione 6:68).