RONGORONGO NI KAIRIIRI MAN TE AONO
Kakauongo nakon bwanaana riaon te Kaberoro
Inanon ririki aika a mwaiti, ara kekeiaki n warekan Ana Boki Moomon mai moana ni karokoa tokina moan te kaokoro te namakin ae ti konaa n karekea ma iai. Ni manga moan warekia riki kaua tabeua te tai, ao e buokiira bwa ti na reiakina riki rongorongon Nibwaai ma ana Utu. N te ka-waniua ni mwakoro n ana boki Nibwaai ao ti konaa n noora te anua ni maiu ae kakaokoro irouia kaain te utu. Te tama ae kororaoi ao te tina a bon riki bwa kaaro aika a tamaroa,1 ma natiia a kaitara ma kangaangaa inanon uarerekeia. Ti nooria bwa ataei a kakaokoro aron aia rinerine, e ngae ngke a kaitara ma te kangaangaa ae titeboo.
Te rongorongo aio e riaon te karaki ke te rongorongo are e koreaki iroun te nati te mmwaane are e kaineti nakoia ana karo ao bon tarina ma mwaanena. Riaai, ao Nibwaai, boni Burabeti. Reireiara ao Otara man booki aika a tabu a bon rikirake ngkana ti karekea te bwai n tituaraoi are te Tamnei ae Raoiroi, are ngaia ae kaota te koaua ao e kanga ni manga kaokaki ni boong aikai. E raka arona nakon are bon ti te karaki bwa e konaa ni kakoauaki. Ti konaa n namakina man ongo mai iai bwanaan te Atua rinanon aia taeka burabeti ake ngkoa.
Ana onimaki Nibwaai, bwa e na nako ni karaoi bwaai ake e tua te Uea2 ake a tia ni kakorakoraira ni karikirakei ara koaua ao ara onimaki iroun ara Uea Iesu Kristo. Inanon miin Riaai, e bon nooria i bon irouna Riaai bwa e mena i moan te kai ni kamaiu. Aron te uaanikai e bon tei naba ibukin ana tangira te Atua.3 Imwiin kanakin te uaanikai, ao Riaai e kabwarabwaraa bwa ai aron ae e kanoaa tamneina ma te kimwaareirei ae rianako ao e ataia bwa te moan taatangiraki nakon bwaai ni kabane4. Inanon taai ao ti namakina te aki koaua raoi ke te un ni maiura. Inanon kaokakin ana Euangkerio Iesu Kristo, ao bon iai nooran te kantaninga. Unimwaane David A. Bednar e taku, “Kanakin uaan te aroka e bon kaota reken te onimakinaki ao te kariaiakaki bwa e aonga n riki te raraoma ibukin buure ni kaotinakoi baika boongana ni maiura. Te uaanikai e kabwarabwaraaki bwa ai aron “tangiran kakukureian temanna” ao ni kaotinakoa te kimwaareirei ae tamaroa ao te kan tibwauaa te kimwaareirei anne ma tabeman.”5
E onrake te mii n taian kanikinaa ao ni buokiira ni kabootaua te karaki ma maiura. Ni kabane ake a mwamwananga inanon te kawai a bon buokaki n te kai ae te biti, are e tei ibukin ana taeka te Atua6. Te kamanoaki e aki reke man kaanian te kai te biti, ma tauana ni kamatoaaki e na karekea te boutoka ao te aki bitaki n te kakorakoraki. Ana utu Riaai e bon tei ibukin natin te Atua ake a nakonako inanon te mwananga ae mamate. Tao ti uarereke ke ti akara, ti a tia ni mare ke ti tuai, ma tauan ana taeka te Atua ma te koaua e na bon karekea nakoira te mano ao te aki mamaaku bwa ni kabane a na rangi n nakoraoi, e ngae ngke iai kawai ni kakaewenako nakoira aikana imwaaira.
I aki nanokokoraki bwa ti a bon rangi n ataa karakinan miin Riaai. Ngkana ti tataromwaaka ni kamatebwai booki aika a tabu, ao te Tamnei ae Raoiroi e na buokiira ni kaotaira. I mwin namakinan ana tangira te Atua, e ienikuri Riaai n kakaiia ana utu ao man kaoiia bwa a na karekea naba te namakin are e a tia n namakinna I bon irouiia.7 Ara Utu ae akea tokina ti na moanibwaia moa. Bwa e kanga te kawai ae a na toua, Riaai e weteia ma te bwanaa ae bubura bwa e na katauraoa te kawai.8 Te bwanaa ae bubura bon tiaki te bwai ae tataneiai iai bwanaan te Tama n ai aron naba te burabeti. E ngae n anne, Bwanaan Riaai a na riai n ongo aomata ake a mena n te kateitei ae moan te buubura ao ni mwawaawa are a takaruaea te rongorongo ae kairua man te kariirii. Ngkana ti iriira te kaetieti mai irouiia ara Burabeti, mweengara e na bon tei i nuukan te euangkerio ao ana kaibwabwaru te maiu aio e na kerikaaki.9
N te bong aei, Beretitenti Russell M. Nelson e uouota naba te bwanaa ae iai te kariaia iai. Aekakin are e karaoia Riaai, e tuangiira ma te namakin ae maam10 bwa ti na ongo nakon bwanaan te uea.11 Beretitenti Nelson e taekinna, “Ana Reirei Kristo e buokiira ni karekea ao n teimatoa inanon ana berita ae tabu. Teira iaon te kawai ae e irariki bwa te kawai anne e bon kamatoatoaira bwa ti aonga ni konaa ni karekei bwaai ake iai iroun te Atua. Bon akea riki te bwai ae kakawaki nakon are iroun Tamara!”12
Ngkai ti kakatauraoi ibukin te Maungatabu ni Kabuta n te namwakaina ae na roko, bwanaan ara buraabeti e na rangi n buubura ao man maataata. Bwanaaia e na bon aki konaa n anaaki abwakiia man buburan bwanaaia, ngaia are ti na bon riai n katauraoira ao man katinanikui bwain te aonaaba ao man anga nanora nakon te kaetieti, kawai, te karaunano, ana bwai n tangira te Tamnei ae Raoiroi.13 Te Moan Beretitentii, te Kooram n Abotoro ake Tengaun ma Uoman, Mataniwi ma Aobitia ni Kabura n te Ekaretia, a na taetae nakoira n te utu ao n tatabemaniira nako, bwa ti na roko ao man katoonga ana taeka Kristo.14 N taekinna, ni kimwareirei, n taetaekinan Kristo,15 e buokiira n kaotaira n te kukurei ae akea kabotauana16 are e roko ma irouna ao I bon Ibukina. Bon Ngaia boton raoi te kakukurei.17