Ana Iteraniba te Aono

Aio nneu ae I kan mena iai?

Mairoun Jo Anna Hogue

Ngke 17 au ririki ni maiu, ao ti buti mai Oakland ngai ma tabeman man ara utu, California nako Portland, ao Oregon bwa ti na kakaea te kaa ae kimoaaki . . . ao ni kamaiua natin tariu ae bua.

Te mwananga aio bon te mwananga ae kakamaaku man kakua, ma bon iai ara kantaninga ae abwabwaki ma te tataromwaaka. Rinanon tabeua ana mwakuri n akoi ao n tangira Tamara are i Karawa, ao ti a kona iai ni kunea te minivan kaa ao ni kamaiua natin tariu, are man te kakai, ao e mano raoi ao ni ikeike.

E mwakuri raoi te minivan kaa, ma e nang barekareka. I riaon te kukurei ni kaitiakia, ni kaitiakia ibukin baora n okirikaaki, ma iangoaia naake a karaoa te mwakuri ni iowaawaa nakon ara kaa—ma te maiu ni kamangaongao are a kona ni karaoia—e bon karika aki raun nanou n tang. E bon nang matoatoa irou n ataia bwa a kangaa aomata ni karaoa te mwakuri ni ribuaka ma aia bwai aomata. I bon nang nanokawaki iai.

I a aki kona n taningaa te okirikaaki nako California, bwa I ataia bwa bon te buti ae abwabwaki iroura.

Man te tai are ti a tauraoi iai nakon te mwananga, e a bon bwakanako te tai . . . ao man rotongitong. Ngke ti a mena inanon te kawai, ao e kaonrakeaki au iango n iangoakin te mwananga ae nang kakironako. I bon iangoi aron kawai ni ibuobuoki are e a tia iai ni buokiira iai Tamara are i Karawa. I iangoi naba arora ni kabane ni bubutiia iaon kawaira nako Portland ma arora ni kabane ni kakaitau ibukin kawaira n okirikaaki.

Ngke I kataamnei bwaai aikai, ao I noora te oota ae ootamwaaka, bwa e tei n abwaabwaki iaon rotongitongin taian aroka, teutana raroana ma te kawai ae raababa are I mena iai. E rikirake ni koburake te kimwaareirei inanou ngke I tabe ni iangoia bwa teraa te aekaki n oota aio. Inanon tabeua te miniti, ngke ti tabe ni kaakaan, ao I a kona n nooria bwa bon tiaki te bwai teuana ma bon Temboran Portland Oregon!

I nang kimwaareirei ngaia are I tuangiia au utu bwa ti na nako mai iaon te kawai are rababa—bwa ti na kakaea te Tembora arei. I riai n noria! E kakai tamneiu ni kan mena n tanon te Tembora, ni mena inanon tamaroana ao n tibwauaa te bwai are I mena inanona arei ma au utu.

Inanon kawaiu ribuakon tanan aroka, ao I kona n noora te oota ae kaanga ai aron tokin kawain te rotongitong ae aki konaaki n nooraki tokina. E ingainga nanou ma te kimwareirei n nooran te bwai ae nang riki.

Katikan nanora ni kaniia te tembora, ao ti noora te kawai ae akea te kawai n otinako iai imwain mataroan te Tembora, ike a tei iai kaa ni kamironron. Ma te kimwaareirei ae bati, ao I tarataranako n taraa kawaiu ni buti n rinnako, iaon tanon te Tembora.

N te tai ae tawe, ao I namakina te uruaki n nano ngke I ataia bwa mataroan te Tembora e aki tii iin . . . ma a roka.

I kabaitiiai ni kakaea te tabo ae nna tei iai irarikin kaa ake tabeua, ao inanon te miniti are imwiina, ao I tei imatan mataroa aika taian biti—n tautauii man tang—ngke I tabe ni miimiiakin tamaroan te auti ae tamaroa ao n tabu.

Te iango ibukin rokanakiu itinanikun mataroan karawa e riki bwa te bwai ae koaua irou n te tai anne.

Titiraki aika kaonrakea au iango ngke I tabe n tei n te tairiki arei:

• Aio nneu ae I kan mena iai ngkana I roko i karawa?

• I tangiria n rokanaki i tinaniku?

• N tang ibukina bwa I aki kona n rin?

• E na konaa n noorai temanna ae I tang ao n nanoangaai ao ni karinnai?

• Tera ae nna karaoia bwa na ataia bwa e na aki kona n riki aio nakoiu ni mataroan karawa?

I bon tang ni karokoa are ti nang okirikaaki nakon te kawai, ao imwiina I a manga bon tang riki.

E bon nang korakora mwiin te bwai ae riki n te tairiki arei. Ngke I tabe ni kabuti kaa, ao I a kataamneia ma I a kataamneia korakoran te namakin are I namakinna n te tairiki arei. E bon kakorakora nanou ni karaoan ae tamaroa—bwa nna tamaroa—bwa nna anga nanou nakoina ao ni mwakuri korakora ni kakairi n ana banna ni katootoo au Tia Kamaiu, Iesu Kristo.

I a moana au anene ngke I kabutikaa. Ngke I tabe n anene, ao e a moanna ni kaonaki nanou n te rau ao te mwengaraoi. I ataia ae te bwai are I a tia ni mena inanona e kona n anganai te kuna teuana ae boou . . . te kuna ae I bon katiaa inanon butiu. Te kuna ae na konaa n tabeka ao ni kaunga te nano. Te kuna ae taekan te Tembora. Kunan au Tembora.

Aio te kuna arei:

I nako n noora te Tembora.

E nang tamaroa taraakina,

Te kateitei ae tabu ae ana bwai te Atua.

Inanou, I ongo te wiirikiriki

Ae taetae n aamarau,

E taku, “Tarataraa nanona ao noria bwa tera ae ko kona ni kunea.”

Ikai ae I kan mena iai?

I tinaniku n tarataraa nanon?

E aki riai te namakin aio ibukiu.

I tangiria ni mena inanon te oo,

Mwakoron baika I nori

Ngke I tabe n tei imatan te mataroa n te tairiki anne

N tarataraa nanona bwa teraa riki

nakon atiibu aika maabora, ni katoobibiaki n Ana tangira

E roko te titiraki n au iango

I tuai n iaiangoia mai imwaaina,

Teraa ngke aio te abanuea i eta?

I tangiria n riki bwa mwakoron

te kimwareirei are akea tokina arei

are beritanaki n Uean Tamara.

Ma ngkana I aki tauraoi ngkai

ni butimwaea te kakabwaia are kawakinaki,

I aki kona ni kunea te rau anne mai irouia tabeman.