E Faafeiloai atu i Lenei Lomiga

Ia Faamuamua le Atua ao Tatou Feagai ai ma Faafitauli

I lenei lomiga, o loo tusi ai e Elder Dale G. Renlund o le Korama a Aposetolo e Toasefululua e uiga ia Iopu ma luitau faigata, suia olaga sa feagai ma ia e ui lava o ia o se tagata lelei. O se tasi o lesona autu o le tusi a Iopu o lona faalagolago i le Atua na fesoasoani e tauave ai o ia seia oo mai le faamalologa a le Alii. Ua molimau mai Elder Renlund, “E fiafia Iesu Keriso e toefuatai mai mea e le mafai ona e toefuataia, faamalolo manu‘a e le mafai ona e faamaloloina, faaleleia mea ua nutimomoia, tauia soo se mea le talafeagai ua e oo i ai” (itulau 7).

Faatasi ai ma i latou e sili ona manaomia lenei fesoasoani folafolaina, o i latou na sao mai sauaga tau feusuaiga. I a tatou galuega faapolofesa ma tagata na sao mai i sauaga i togafitiga, e masani ona tatou feagai ma tulaga le lelei na afaina ai se tasi ona o le faaaoga sese o le pule ma le fai faamalosi poʻo le le saʻo o manatu poo le le malamalama e uiga i le faitalia, faaaloalo, ma le malie i le alofa faaletino ma feusuaiga.

A o faamalolo ma ofo mai e le Faaola le faamoemoe i e na sao mai i sauaga, e mafai foi ona tatou ofo atu le lagolago, faamalosiauga, ma le agaalofa ia i latou o e mafatia i le le tonu o sauaga tau feusuaiga. I lenei lomiga matou te tuuina atu ai ni tusiga se lua e mafai ona fesoasoani ai:

• I le itulau e 12, ua matou faasoa atu ai mataupu faavae taua mo mafutaga maloloina e faavae i luga o se faavae o le talalelei.

• I le itulau e 16, ua matou taliina ai fesili e uiga i sauaga tau feusuaiga ma tuuina atu le faamoemoe ma le fesoasoani mo tagata ua aafia.

Talu ai ua tatou vaaia tiga ma manu’a e fesootai ma sauaga, matou te tatalo ia oo mai se taimi e leai se tasi e aafia i feusuaiga lē manaomia o soo se ituaiga. O le a tupu lenei mea pe a tuu atu e fanau a le Atua Lona finagalo ia faamuamua i o latou olaga ma mafutaga.

Melissa K. Goates-Jones ma Benjamin M. Ogles

Matagaluega o le Suesuega o le Mafaufau ma le Amio

Iunivesite o Polika Iaga