Na’o Tusiga Faatekinolosi
Mauaina o le Sulufaiga i le taimi o Faalavelave Faalenatura
I le tali atu i mala ogaoga faalenatura i o latou lava atunuu, o Au Paia o Aso e Gata Ai o loo faaalia auala e mafai ai e le faalagolago ia Iesu Keriso ona maua ai le filemu i taimi o faalavelave.
Na valoia e le Faaola e faapea o aso e gata ai “o le a i ai oge, ma faama’i, ma mafuie, i nofoaga eseese” (Mataio 24:7). O loo tatou vaaia lenei valoaga o loo faataunuuina i o tatou tafatafa ma faateleina i tausaga taitasi i faalavelave faalenatura o loo tutupu i le salafa o le lalolagi.
E toatele tagata faamaoni o le Ekalesia ua tofotofoina e aafiaga o malosiaga faataumaoi o le natura. Ae o lo latou maufetuunai ma le faatuatua e faalotomaualaloina ma musuia a o latou “faatalitali i le Alii” (Isaia 40:31) ma faalagolago i Ana faamanuiaga folafolaina.
I le tali atu i mala ogaoga faalenatura i o latou lava atunuu, o Au Paia o Aso e Gata Ai o loo faaalia auala e mafai ai e le faalagolago ia Iesu Keriso ona maua ai le filemu i taimi o faalavelave.
Faatalitali i le Faatuatua
Ia Novema 2020, na faatamaia ai e Afa o Eta ma Iota ni nai atunuu o Amerika Tutotonu. O le faatafunaga na mafua mai i afa sa lofituina. I le avea ai ma Peresitene Eria o le Eria a Amerika Tutotonu, sa maua ai e Elder Brian K. Taylor o le Fitugafulu se feau tusitusia e le mafaagaloina mai i se peresitene o le siteki i Honduras. Sa nonofo le aiga o le peresitene o le siteki i se malutaga le tumau ina ua mavae le matagi na faamalosia ai i latou e tuua lo latou fale; sa faitauina lana savali tusitusia: “Matou te faaauau pea i le faatuatua lava e tasi ma le faamoemoe o le a matou tutulai malosi atili mai lenei aafiaga: sili atu ona lotomaualalo, sili atu ona loto fesoasoani — ma naunau e gauai atu i soo se mea e manatu le Alii e talafeagai.”1
E faigofie ona lotovaivai ma lagona le leai o se faamoemoe i lenei “aso o faalavelave” i ona po nei (Nauma 1:7). Ae e le o tuua na o i matou i o matou tauiviga ma puapuaga. O le tali a le Tama Faalelagi i le aioi a Iosefa Samita mai le loloto o le Falepuipui o Liperate e tutusa lava le faatatau ia i tatou taitoatasi: “Ia i ai le filemu i lou agaga; o lou tiga ma ou puapuaga o le a na o sina minute laitiiti; Ma ona o lea, afai e te talitālia lelei, o le a faaeaina oe e le Atua i luga” (Mataupu Faavae ma Feagaiga 121:7–8).
Ua folafola mai e le Alii ia i tatou o le a Ia faasa’oina mea pe afai tatou te onosaia o tatou faigata ma le faatuatua. Na aoao mai Elder Jeffrey R. Holland o le Korama a Aposetolo e Toasefululua:
“O lea la, a o tatou galulue ma faatalitali faatasi ai mo ni tali i nisi o a tatou tatalo, ou te ofo atu ia te outou la’u folafolaga faaaposetolo o loo faafofogaina ma taliina, e ui atonu e le o taimi tonu po o le ala tonu na tatou mananao i ai. Ae e tali mai lava tataloe le aunoai le taimi ma i le ala e tatau ai i se mātua ua silafia aoao mea uma ma le agaalofa e faavavau ona tali mai ai na tatalo.”2
Faafetai i le fuafuaga o le fiafia a le Tama Faalelagi, e mafai ona tatou manatua “pe a leai se filemu i le lalolagi, e i ai le filemu ia Keriso.”3
Auauna Atu i Isi
I le avea ai ma se peresitene o le Aualofa a le siteki i Iapani, sa galulue ai Sister Junko Yoshida ma tagata o lana Aualofa a le siteki e ao mai ni solo taele se 1,000 mo tagata na aafia i lologa matuia i le amataga o Iulai 2020. Fai mai Sister Yoshida: “Sa ou manao e fesoasoani i tagata. … Sa vave ona ou [alu e galue]. … [Sa i ai] pe tusa ma le 1,000 solo ma ieie masaesae na ao mai i se taimi puupuu pe tusa ma le fa aso.”4
E faapena foi le auaunaga faaKeriso sa faaalia ia Tesema 2021, ina ua oo mai ni asiosio matuia i le salafa o le ogatotonu o le Iunaite Setete, ma tuua ai le tele o tagata e leai ni fale ma le fia sefulu afe o tagata e aunoa ma se eletise. Nai lo le faatagaina o le faatafunaga o o latou fale e faavaivai ai i latou, sa vave lava ona galulue tagata o le ekalesia i setete na aafia i le taimi atoa e auauna atu ma fesoasoani i o latou nuu. Fai mai Kevin D. Releford, o se peresitene o le siteki i Hendersonville, Tennessee, sa “matuai maofa lava o ia i le auaunaga alofa, faaKeriso lea na faaalia e o tatou tagata mo le tasi ma le isi, mo o latou tuaoi. … Sa opo e tagata o le ekalesia [o latou tuaoi] ma faamautinoa ua i ai so latou nofoaga e nonofo ai ma maua le lagolago latou te manaomia.”5
Sa aoao mai e Elder Moisés Villanueva o le Fitugafulu: “Sa faaali mai e Iesu Keriso ia i tatou e faapea, i taimi o tofotofoga ma faigata, e mafai ai ona tatou iloa ia faigata o isi. O le faagaeetia i le agaalofa, e mafai ai ona tatou aapa atu ma siitia i latou. A o tatou faia faapea, e siitia foi i tatou i a tatou auaunaga faaKeriso. Na ta’ua e Peresitene Gordon B. Hinckley: ‘O le vaifofo sili ua ou iloa mo le popole o le galue. O le vailaau sili mo le faanoanoa o le auauna atu. O le fofo sili lava mo le vaivai o le lu’i ia fesoasoani atu i se tasi o sili atu le lelava.’”6
Mauaina o le Filemu
O nei tala o ni faataitaiga sili ia o le auala e mafai ai e le faatotonugalemuina o o tatou olaga i le Faaola ona fesoasoani ia i tatou e le gata i le mauaina o le filemu i taimi faigata ae e mafai ai foi ona avea i tatou ma puna o le filemu i isi.
Na fetalai le Faaola, “Ou te tuuina atu ia te outou le manuia, o lo’u manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).
Ua silafia i tatou e Iesu Keriso, le Alii o le Filemu. E mafai ona tatou faatuatuaina o Ia e faamāmāina a tatou avega (tagai Mataio 11:28–30). Pe moni pe faafaatusa ia afā tatou te feagai i lenei olaga, “e mafai e le Faaola ona tuuina atu le puipuiga ma le filemu e taiala ai oe i le saogalemu ma le malutaga mai afā o le olaga.”7