“Mulimuli i le Faataitaiga a le Faaola o le Loto Malamalama ma le Alofa,” Liahona, Aok. 2022.
Autalavou Matutua
Mulimuli i le Faataitaiga a le Faaola o le Loto Malamalama ma le Alofa
O a ni mea e mafai ona tatou aoaoina mai le soifuaga ma aoaoga a Iesu e uiga i auala e faaalia lelei ai le loto malamalama ma le alofa o le tasi i le isi?
Ua Tagi Iesu, saunia e James Tissot
O le fuaiupu aupito puupuu i tusitusiga paia uma e aofia ai upu e [tolu]: “Ua tagi Iesu” (Ioane 11:35). E le na o le pau lea o le taimi i tusitusiga paia na tagi ai Iesu, ae o loo i ai se mea e sili ona taua i le mafuaaga na Ia tutulu ai i le Ioane 11, ma e faigofie ona misi.
E pei ona fai mai le tala, na maʻi le uō a Iesu o Lasalo ma maliu a o malaga Iesu. Ina ua mavae ni nai aso, ona malaga atu lea o Iesu i le fale o Lasalo e toe faatu o ia mai le oti, ae na faafeiloai e ona tuafafine faavauvau, o Mareta ma Maria. Ua faapau Maria i vae o Iesu ma faapea atu, “Le Alii e, ana e iinei, po ua le oti lo’u tuagane” (Ioane 11:32). Ona ta’u mai lea e Ioane ia i tatou, “Ua silafia e Iesu o ia ua tagi, ma Iutaia ua o mai ma ia o fetagisi, ona tiga tele lea o lona finagalo, … ua atu lava,” ma “tagi” (Ioane 11:33, 35).
E foliga mai e le o tagi Iesu i le maliu o Lasalo. Ae peitai, sa Ia silafia mo ni aso e uiga i le maliu o Lasalo ma sa fuafua e toe faatu mai o ia i se taimi lata mai (tagai Ioane 11:4, 14–15, 17). Nai lo o lea, sa tutulu Iesu ona o le tiga sa oo i ai Maria, Mareta, ma isi, o se tiga sa Ia silafia o le a mou atu i totonu o ni nai minute ae sa moni lava lena mea mo i latou i lena taimi.
Na tagi Iesu o se vaega o le finagalo malamalama.
O le loto malamalama o le tomai lea e malamalama ai ma tausoa lagona o isi, ma ona o se tasi lea o uiga auaumama o Keriso, o se mea e tatau ona tatou taumafai uma ia malamalama atili ai, atiina ae, ma faaali atu. O i latou ua i ai le loto malamalama ua faateleina le tomai e alolofa ma auauna atu ai i isi e tusa ai ma o latou manaoga. I lenei tulaga, o le i ai o lenei uiga e fesoasoani ia i tatou i la tatou sailiga e “aapa atu i fafo” i le faataitai i le Faaola ma fatufatu le lotogatasi ma le auai.1
O a la ni mea e mafai ona tatou aoaoina mai le soifuaga ma aoaoga a Iesu ma aoaoga e uiga i le auala e sili atu ai ona faaalia le loto malamalama ma le alofa o le tasi i le isi?
1. Ua Faailoaina Iesu ma le Au Tuulafoaiina
I Lana misiona atoa, sa i ai se sootaga faapitoa o Iesu ma i latou o e sa tuulafoaiina i le lalolagi: o e matitiva, o e puapuagatia, o tagata ese, ma isi e masani ona le amanaiaina pe vaai maualalo i ai—“o e aupito itiiti o i latou nei,” e pei ona Ia faatatau atu ia i latou i le Evagelia a Mataio (Mataio 25:40). Ae sa lei na ona auauna atu o Ia i nei tagata—sa Ia vaaia o Ia lava i totonu o i latou, ma aoao atu Ona soo faapea o le faia o mea lelei i tagata faapena, “o a’u lea na outou faia i ai.”
Mafaufau i lena mea mo sina taimi. O le Foafoa silisili o le atulaulau, Alo o le Atua, ma le Togiola o tagata, o le tagata ua i ai mafuaaga uma i le lalolagi e vaai ai ia te Ia lava i luga a’e o isi, ua faatusaina o Ia lava i tagata sili ona faatauvaa ma vaivai.2
Ae aisea?
I le faaopoopo atu i Lona alofa mo tagata uma, e taua le manatua o le Iesu faaletino lava Ia na tuulafoaiina. Na soifua mai o Ia o se vaega o ni tagatanuu toaitiiti i le Malo o Roma ma e masalo sa mativa. A o laitiiti, sa faamalosia o Ia e sola ese i se isi atunuu o se tagata sulufai e sola ese mai le oti (tagai Mataio 2:1–15). Sa teena o Ia e nisi o Ona lava tagata, ma na iu lava ina avea o Ia ma se tagata na aafia i sauaga na faatagaina e le malo (tagai Mareko 15:15; Ioane 1:11). Mai le aso na soifua mai ai o Ia seia oo i le aso na Ia maliu ai, o Iesu o se tasi o “e aupito itiiti o i latou nei” (Mataio 25:40).
E ala i le faailoaina faatasi ma e ua tuulafoaiina, ua valaaulia ai i tatou e le Faaola e mafaufau i la tatou lava sootaga ma i latou o e faapena foi ona le tagolima, tuliesea, pe ua vavaeeseina i aso nei. Pe tatou te vaai ea ia i tatou lava e sili atu ia i latou? Po o tatou vaai ia i latou e pei ona silasila i ai Iesu, o se vaega o i tatou lava, o ni tuafafine ma ni uso faaleagaga? Pe tatou te fesili ifo ea ia i tatou lava: e faapefea pe afai o le latou tala o le tatou tala foi lea?3 Pe tatou te tatalo ea ina ia malamalama ma alolofa ia i latou? Pe o tatou auauna atu ea ia i latou o se faailoaga o le alofa i lo tatou Faaola, o lē o loo atagia mai ia i latou?
2. Na Faia e Iesu le Galuega
O le alofa moni i isi e sili atu ona faigofie ona talanoaina nai lo o le faia, ma mo Iesu, o le loto malamalama na tele lava ina sau mai le mafatia i “tiga, ma puapuaga, ma faaosoosoga … ma maʼi o ona tagata” ina ia mafai ona Ia iloa “le ala e fesoasoani ai i ona tagata, e tusa ma o latou vaivaiga” (Alema 7:11, 12). I se isi faaupuga, o le tele o faigata e fesootai ma Lona soifuaga ma le Togiola na mafai ai ona Ia malamalama ia i tatou ma o tatou faigata ina ia mafai ai ona Ia silafia lelei le ala e faamalolo ai i tatou.
Ae sa saoloto foi le mafuta atu o Iesu i le toatele na Ia fetaiai i ai, faalogo atu ia i latou, fesili atu ia i latou, ma taulimaina i latou ma le faaaloalo, e tusa lava pe na faitioina o Ia e isi. Ona o lo tatou mamao i le talafaasolopito mai le taimi na soifua ai Iesu i le lalolagi, e mafai ona tatou misia nisi o auala na Ia tetee ai i faiga masani o Ona aso ona o le aapa atu i isi.
Mo se faataitaiga, sa Ia pa’i atu i lepela ma isi tagata mama’i, o e sa manatu e le mama e tusa ai ma le tulafono a Mose (tagai Numera 5:1–4; Mataio 8:2–3). Sa ia auauna atu foi i tagata agasala, ia i latou o e sa lauiloa mo mea le lelei, ma tagata Nuuese, o se mea semanu e manatu foi nisi e le talafeagai (tagai Mareko 2:15–17; Ioane 4:5–26). Sa i ai Iesu i le pisinisi o le fausiaina o alalaupapa, e tusa lava pe sa le lauiloa.
E pei o le Faaola, e mafai foi ona tatou faia ni taumafaiga ia iloa atili ai isi. Mo se faataitaiga,
-
e mafai ona tatou faalogo atu ia i latou ma le faamoemoe ia malamalama nai lo le faamasino atu pe tali atu;
-
e mafai ona tatou aloese mai le uiga o le le fiafia, tetee, pe faitio ia i latou tatou te le ioe i ai; ma
-
e mafai ona tatou feiloai ma le onosai i tagata i le mea o loo latou i ai i la latou faigamalaga o le alualu i luma nai lo le mea tatou te mananao latou te i ai.
Ua ou iloaina a o ou maua le malamalama i vaaiga ma aafiaga o isi, ou te tuputupu ae i le agaalofa, maua se malamalama sili atu ona lava i mataupu faigata, ma saunia lelei e auauna atu ma alofa atu. E faigata ona le alofa i se tasi pe a e iloa lana tala.
3. Alofa Faatulagaina o Iesu
O le vaega mulimuli, ua faaalia i le soifuaga o Iesu o le loto malamalama e sili ona faaalia atoatoa i le alofa atu i isi i le auala e manaomia ona alofaina ai i latou. E pei ona aoao mai e Nifae, o le Faaola “E lē faia se mea vagana ai ua mo le manuia o le lalolagi; ona ua alofa o ia i le lalolagi” (2 Nifae 26:24).
O nisi taimi na foliga mai ai Lona alofa na Ia ofoina atu le faamalologa faaletino, faamalosiauga, aoaiga, po o le faamagaloga. O isi taimi sa Ia faanoanoa faatasi ma e e faanoanoa pe na latou olioli faatasi. Mulimuli ane, na tuuina mai e Keriso Lona soifua mo i tatou “a o tatou agasala pea” (Roma 5:8), na faaalia ai o Lona alofa atoatoa e tumau pea e ui lava i lo tatou le atoatoa.
O le taumafai e alofa e pei ona faia e le Faaola e mafai ona faigata i nisi o taimi. E faapefea la ona tatou alolofa atu i isi i le auala e manaomia ona alofaina ai i latou?
E mafai ona tatou filifili e tau lava ina alofa, e pei o loo i ai se ki e ki ai?
Pe e mafai moni ea ona alofa i se tuaoi po o se tagata ese e pei o se tagata o le aiga po o i tatou lava?
Ae faapefea i latou tatou te le ioeina pe le mafai ona fegalegalea’i faatasi, po o i latou tatou te ono fefinauai?
I tusitusiga paia, o le alofa faaKeriso o loo ta’ua soo o se mea e “faatumuina” ai se tagata; i se isi faaupuga, o se mea ua sasaa atu i le agaga e le Atua (tagai Mosaea 2:4; 4:12; Alema 38:12; Moronae 7:48). O lona uiga e le mafai ona atiina ae le alofa faaKeriso e aunoa ma le fesoasoani a le Atua—o se meaalofa faaleagaga e oo mai ma tuputupu ae a o tatou “tatalo atu i le Tama ma le malosi atoa o le loto” (Moronae 7:48).
O le Loto Malamalama e Aumaia ai le Lotogatasi
A o tatou auauna atu ma le loto malamalama ma le alofa, o le a faateleina lo tatou gafatia e fatu ai le lotogatasi ma le faaauai ma ia aumaia isi ia Keriso. E mafua lenei mea ona ua amata ona tatou vaai atu i isi i fofoga o le Atua ma lagona i Lona fatu. Tatou te vaai foi i la tatou auaunaga e le o lo tatou aapa ifo i lalo e sii a’e isi i lo tatou tulaga, ae a o tatou aapa atu i fafo e opo mai se fanau a le Atua. O le faia o lea mea, ua tatou fesoasoani ai e faataunuu le tatalo a Keriso i Ona soo “Ina ia tasi i latou uma, faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i taua” (Ioane 17:21).