“Faamamaluina o le Faitalia i Uigaloloto Felata’i Faaletino,” Liahona, Aok. 2022.
Faamamaluina o le Faitalia i Uigaloloto Felata’i Faaletino
O vaega faaletino o a tatou mafutaga felata’i e tatau ona taialaina e la tatou tautinoga e usitai i le tulafono o le legavia, lea e faapolopolo ai uigaloloto felata’i faalefeusuaiga mo le tane ma le ava (tagai i le Mataupu Faavae ma Feagaiga 42:22–23), ma e ala foi i la tatou tautinoga e faaaloalo i le faitalia o isi.
O lenei tusiga o loo taulai atu i le taua o le faamamaluina o le faitalia i vaega faaletino o a tatou mafutaga—mai tafaoga faamasani i le faaipoipoga—ina ia mafai ona maua ni mafutaga faamanuiaina ma anoa, ia ausia le lotogatasi fiafia ua folafola mai e le Atua i tane ma ava, ma aloese mai taunuuga matautia o fesootaiga faalefeusuaiga e le manaomia.
O le auala tatou te faamamaluina ai le faitalia i lo tatou taulimaina o le alofa faaletino ma uigaloloto felata’i faalefeusuaiga o loo i ai se matafaioi taua i le sauniaina o i tatou mo ma faamalosia se tasi o a tatou mafutaga faaletagata e sili ona taua.
O Le Faamoemoega o Uigaloloto Felata’i Faaletino
Pe a auai se tane ma se ava, ma le loto i ai, saoloto, ma faatino ma le alofa uigaloloto felata’i faalefeusuaiga, e mafai ona avea o se aafiaga matagofie e fesoasoani e faalotogatasi ai i laua. O le fatuina o lena lotogatasi e ala i le aumaia faatasi o loto, mafaufau, ma tino o se tane ma se ava o se tasi lea o faamoemoega autu na mamanuina ai e le Atua uigaloloto felata’i faalefeusuaiga.1
Na aoao mai Elder Jeffrey R. Holland o le Korama a Aposetolo e Toasefululua: “O le alofa molitino faaletagata e faapolopolo mo se ulugalii faaipoipo aua o le faailoga tupito lea o le tuufaatasiga atoa, o se atoatoaga ma se tuufaatasiga ua faauuina ma faamatalaina e le Atua. Mai le Faatoaga o Etena agai mai i luma, o le faaipoipoga na faamoemoe e faaatoaina ai le faatasiga o se alii ma se tamaitai---o o laua loto, o faamoemoega, o olaga, o le alofa, o le aiga, o le lumanai, ma mea uma. Na fai mai Atamu e uiga ia Eva o ia o le ivi mai ona ivi ma le aano mai lona aano, ma ua tatau ona ‘tino e tasi’ i o la olaga tuufaatasi [tagai Kenese 2:23–24]. O se tuufaatasiga lea o le atoatoa ua tatou faaaoga ai le upu faamaufaailogaina e avatu ai lona folafolaga e faavavau.”2
O le tausia o lenei faamoemoega paia i le mafaufau e mafai ona fesoasoani tatou te malamalama ai i le mafuaaga e popole tele ai le Atua e uiga i le ala tatou te taulimaina ai uigaloloto felata’i faaletino—lea o loo i lenei tusiga tatou te faamatalaina e aofia ai le uigaloloto felata’i faalefeusuaiga faapea foi ma faatinoga o le alofa faaletino, e pei o le uulima po o le opo. (Tagai i le vaega “Manatu Autu” o loo i lalo mo nisi faauigaga.)
O Le Matafaioi o le Faitalia
O le tomai ma le avanoa ua tuuina mai e le Atua ia i tatou e filifili ai ma faatino mo i tatou lava e taua i le ata o le faaolataga. A aunoa ma le faitalia, o le a le mafai ona tatou aoao, alualu i luma, pe filifili e mulimuli i le Faaola. Faatasi ai ma le faitalia, e mafai ona avea i tatou e faapei o le Atua a o tatou aoao e filifili i le va o le lelei ma le leaga.3
O le faitalia o le tomai lea e galue ai ae le o le galueaiina. O le mea lea, o le agaalofa faaletino po o sootaga feusuai o soo se ituaiga e le gata e tatau ona faia e tusa ai ma aoaoga a le Atua ma le tulafono o le legavia ae e aofia ai foi le faaiuga a tagata uma e toalua e auai ma le lotomalie. Afai o le tulaga lea, o le alofa faaletino e taitai atu ai i le faaipoipoga ma le agaalofa faaletino ma uigaloloto felata’i faalefeusuaiga i totonu o le faaipoipoga e mafai ona faamalolosia ai mafutaga ma fausia ai le lotogatasi.
I se isi itu, pe a faaaoga le faitalia e galueaiina ai isi, lē amanaiaina o la latou aia tatau e filifili ai pe faapefea ma le taimi e auai ai a le o le alofa faaletino po o uigaloloto felata’i faalefeusuaiga, o na fesootaiga e avea ma se faatinoga o le osofai lea e le faaaloalo i tulaga faatulagaina a le Atua ma le faitalia, lagona, ma manaoga o le isi tagata. O le faaaogaina o fesootaiga faaletino mo faamaliega manatu faapito po o se meafaigaluega e faatoilalo ai ma faaseseina ai se isi tagata o se agasala lea e mafai ona afua ai se manuaga tumau i tagata taitoatasi ma mafutaga.
Faamamaluina o le Faitalia i Tafaoga Faamasani ma Aumoega
Atapue mai le Getty Images
A o atiina ae a tatou mafutaga e ala i tafaoga faamasani ma aumoega, o se tasi o auala tatou te faamamaluina ai le faitalia a le isi, o le fesili atu lea mo ma le mauaina o le faatagaga ae tatou te lei amatalia soo se ituaiga o alofa faaletino, e pei o le uulima, opo, po o le sogi.
O le tulitulimatagauina o le alofa faaletino po o le uigaloloto felata’ifaalefeusuaiga e aunoa ma se maliega a se tagata—na tuuina atu ma le lotomalie, saoloto, ma manino—e solia ai le faitalia a lena tagata. O fesootaiga faalefeusuaiga e le manaomia ua faauigaina faaletulafono o se sauaga faalefeusuaiga i le tele o atunuu. (Mo nisi faamatalaga i le maliega ma le sauaga, tagai i le tusiga o loo avatu faatasi ai, “Tali i Fesili e uiga i Sauaga Tau Feusuaiga.”)
E le gata i lea, o se vaaiga faaletalalelei e fesoasoani tatou te iloa ai o la tatou tautinoga e tausi le tulafono o le legavia ma la tatou tautinoga e faamamalu le faitalia e ala i le maliega e taua e fesoasoani ai e faafaigofie mafutaga malolosi ma faavavau. O le tautinoga a le toatasi e aunoa ma le isi e le lava lea. Mo se faataitaiga, i le tasi itu, o tagata e toalua e faamamaluina le faitalia o le tasi ma le isi e ala i le malilie faatasi i sootaga feusuai i fafo atu o le faaipoipoga o loo solia pea le tulafono a le Atua. I le isi itu, e oo lava i fesootaiga faaletino e le faalefeusuai e aunoa ma le faatagaga a le isi tagata e mafai ona solia ai le faitalia o lena tagata.
A o tatou tuputupu ae i lo tatou malamalama i le talalelei a Iesu Keriso, e mafai ona tatou iloa le ala e fesoasoani ai le usiusitai i tulafono a le Atua ma le faamamaluina o le faitalia o le tasi ma le isi ia i tatou e tuputupu ae ai i le lotogatasi ma le alofa ma saunia i tatou mo se sootaga faaletino e loloto atu ma olioli i le faaipoipoga lea e mafai ona fesoasoani ia i tatou ia lotogatasi atili ma ausia ai lo tatou gafatia paia.
Agavaivai ma le Faaaloalo i le Faaipoipoga
O le faamamaluina o le faitalia e faaauau pea le taua i le faaipoipoga ma o se vaega taua o le siitiaina o le uigaloloto felata’i faalefeusuaiga ina ia ausia ai le faamoemoega o le tuufaatasia o le tane ma le ava.
O lenei ituaiga o lotogatasi e sau mai avatu, ae le o le aumai; mai le alofa, ae le o le tuinanau; mai le popole tele e uiga i le manuia o le isi nai lo le tagata lava ia. “O le agavaivai ma le faaaloalo—ae le o le manatu faapito—e tatau ona taialaina [a tatou] sootaga vavalalata.”4
Na aoao mai Elder Dale G. Renlund o le Korama a Aposetolo e Toasefululua ma lona faletua, o Ruth Lybbert Renlund: “I le faaipoipoga, o uigaloloto felata’i faalefeusuaiga e tatau ona tuufaatasia ai le ava ma le tane i le talitonuina, tuuto, ma le manatunatu o le tasi i le isi. O sootaga feusuai i totonu o le faaipoipoga e tatau ona faaaloalo i le faitalia o le paaga e toalua ma e le tatau ona faaaogaina e fiapule ai pe pule tutasi.”5
O le faaipoipoga o se mafutaga paia lea e manaomia ai taitoalua e taumafai malosi mo le lotogatasi i le tele o auala, e aofia ai a latou sootaga o feusuaiga. O le faaipoipoga na o ia lava e le faasaolotoina ai se tasi o paaga mai le manao e fesootai manino atu e uiga i o latou manaoga po o le faaaloalo i tulaga o le lagolelei o le tasi ma le isi e faatatau i sootaga o feusuaiga. Nai lo lena, o nei talanoaga e taua i popofou o le faaipoipoga ma tumau le taua mo taitoalua ina ia tasi i la laua mafutaga atoa a o la aoao ma tuputupu ae ma pe a suia o laua tulaga.
O le mea e faanoanoa ai, o nisi taimi tatou te faalogo ai o se tasi o paaga faaipoipo e manatu ua ia te ia le aia tatau e faamalosia ai pe tausisi pea ia auai le isi tagata i amioga feusuai. A o tatou tausia a tatou feagaiga o se tane ma se ava, e le tatau ona tatou faia ni mea e le lagolelei ai o tatou taitoalua pe faatiga ai i le Agaga. E foia e taitoalua eseesega i o latou manaoga e uiga i le faafia po o le ituaiga o gaoioiga faalefeusuaiga e ala i le fefautuaai faatasi nai lo le faamalosia po o le uunaia.
A tatou auai i uigaloloto felata’i faalefeusuaiga i totonu o noataga paia ua atofaina o le faaipoipoga, ma le agalelei, faaaloalo, ma se tautinoga e faamamalu le faitalia o le tasi ma le isi, e mafai ona tatou avea atili e faapei o Keriso ma sili atu ona lotogatasi o ni taitoalua, ma taulai atu i mea e sili ona lelei mo le isi ma ogatasi ai ma le finagalo o le Atua.