O Faamoemoega Paia o le Sootaga Vavalalata Faalefeusuaiga
O le malamalama i le meaalofa na tuuina mai e le Atua o le tulaga feusuai i totonu o le fuafuaga o le fiafia, e fesoasoani lea tatou te malamalama ai i le taua o le tulafono o le ola mama.
Ata o se ulugalii i le malumalu o Bountiful Iuta na pueina e Janae Bingham
O lo tatou faamoemoega i le olaga faaletino o le avea lea faapei o o tatou matua faalelagi. O lo tatou malamalama se malamalamaaga paia ma le faaaogaina o le sootaga vavalalata faalefeusuaiga e taua i lena faagasologa o le avea ai.
O le tulafono o le ola mama o se tulafono e faavavau, ua tuuina mai e lo tatou Tama Faalelagi i Ana fanau uma i augatupulaga uma. E tumau ona malosi ma e faatatau foi i le taimi nei e pei lava ona i ai i taimi amata i talafaasolopito. E pei foi o isi poloaiga, o le tulafono ua tuuina mai e le Tama Faalelagi e faamanuia ma fesoasoani ai i Lana fanau ia ausia lo latou gafatia paia. O le usitaia o le tulafono o le ola mama e aofia ai le aloese mai sootaga uma faalefeusuaiga a o lei faaipoipo ma le tumau i le faamaoni atoatoa ma le faamaoni ina ua mavae se faaipoipoga. O sootaga feusuai e tatau ona faatapulaaina i se faaipoipoga i le va o se alii ma se tamaitai.1
E faamoemoe le Tama Faalelagi o le faia o sootaga feusuai i le faaipoipoga, e faaaoga e foafoa ai fanau, ma faailoa atu ai le alofa ma faamalolosia sootaga faalelagona, faaleagaga, ma faaletino i le va o le tane ma le ava. I le faaipoipoga, o le sootaga vavalalata faalefeusuaiga e tatau ona tuufaatasia ai le ava ma le tane i le faatuatuaina, tuuto, ma le amanaia e le tasi o le isi.2 O sootaga feusuai i totonu o le faaipoipoga e tatau ona faaaloalo i le faitalia o paaga uma ma e le tatau ona faaaogaina e pulea ai pe pule tutasi.
Atonu, tatou te tuufesili, “Aisea e tatau ai ona ou usitai i le tulafono o le ola mama? Aisea e popole ai le Atua i lau amioga lelei?” Ina ia tali i nei fesili, ua faaalia mai e le Atua aoaoga faavae e faapea, afai e malamalama sao i ai, o le a faaosofia i tatou e tausia le tulafono o le ola mama ma filifili e faaali atu lo tatou tulaga feusuai i totonu o tuaoi sa Ia faatuina.3 E pei lava ona i ai i poloaiga uma a le Atua, o le tulafono o le ola mama e sili atu ona malamalama i ai i le matalalaga o le ata o le faaolataga a le Tama Faalelagi ma le faaeaga (tagai Alema 12:32). O le usiusitai i le tulafono o le ola mama o le a aumaia ai faamanuiaga maoae.
Ata na pueina o le aiga i le malumalu o Kona Hawaii na saunia e Denise Renee Bird
Folafolaga Tulagaese
O tagata uma o atalii ma afafine agaga faapelepele a ni matua faalelagi e i ai ma se natura paia ma se taunuuga e faavavau. O le mafuaaga ua tatou maua ai tino o le fausia lea i luga o lena natura paia ina ia mafai ai ona iu ina tatou iloa lelei lo tatou taunuuga e faavavau.4 E finagalo le Tama Faalelagi ia tatou maua le poto masani faalelalolagi, agai i luma i le atoatoa, ma iu ai ina tatou olioli i le atoatoa o le fiafia o loo Ia olioli ai. Ua Ia silafia ina ia tatou maua lenei ituaiga o olioli tumau, e tatau ona tatou alualu i luma i le ala ua Ia faatuina, ma usiusitai i poloaiga ua Ia tuuina mai.
O le malamalama faapea o sootaga faaleaiga e tatau ona faaauau i le faavavau atoa pe a uma lenei olaga e taua. I le mavae ai o le olaga faitino, ua folafola atu i e faamaoni “o le a latou pasi foi i agelu … i lo latou faaeaga ma le mamalu … o le mamalu lea o le atoatoaga ma le faaauauga o fanau e faavavau ma faavavau lava.
“Ona avea ai lea o i laua ma atua, aua ua leai so laua gataaga” (Mataupu Faavae ma Feagaiga 132:19–20).
O le aoaoga faavae o aiga e faavavau i le, O Le Ekalesia a Iesu Keriso o le Au Paia o Aso e Gata Ai e tulaga ese i tu ma aga faa-Kerisiano. E lei foafoaina i tatou ia na o le viia, tapuai, ma auauna atu i nisi o Atua e lei malamalama i ai.5 Na foafoaina i tatou e ni matua faalelagi alolofa ina ia ola ina ia avea faapei o i laua.6 Sa foafoaina ni agaga tane ma fafine e faaatoatoa e le tasi le isi. O le mafuaaga lena e le vaia ai le itupa i le faavavau—aua o loo maua ai le faavae mo le meaalofa tupito e mafai ona tuuina mai e le Tama Faalelagi, o Lona ituaiga olaga.7
Ina ia tatou iloaina lenei faamanuiaga, na poloai mai ai le Tama Faalelagi e faapea, o le sootaga vavalalata faalefeusuaiga e tatau ona faapolopolo mo le faaipoipoga i le va o se alii ma se tamaitai.8 O le faaipoipoga na fuafuaina e le Atua “o lona uiga o le atoatoa o le tuufaatasiga o se alii ma se tamaitai—o o la loto, faamoemoega, olaga, alofa, aiga, lumanai, mea uma … ina ia avea ma ‘tino e tasi’ i o la olaga faatasi.”9 E le mafai ona tatou ausia le ituaiga olaga o loo olioli ai lo tatou Tama Faalelagi e nao i tatou lava, pe e aunoa foi ma se tautinoga atoatoa i le faamaoni i totonu o se faaipoipoga i le tane e tusa ai ma le fuafuaga a le Atua.
Ua faatagaina i tatou e le Atua e filifili le ala o le a tatou ola ai. O le a Ia le faamalosia i tatou e mulimuli i le ala ua Ia faavaeina e ui lava ina Ia silafia o le a tau atu ai i lo tatou fiafia sili. O poloaiga ma feagaiga a le Atua ua avea ma ala e mafai ai e i tatou ona avea ma se tofi atoatoa i Lona malo, o se suli faatasi ma Iesu Keriso (tagai Roma 8:17). E ala i le faia o filifiliga amiotonu, tatou te atiina ae ai le natura paia o loo i totonu o i tatou. O sootaga feusuai o “se tasi lea o faailoaga taua o lo tatou natura paia.”10 O lo tatou faailoga talafeagai o tulaga feusuai ua mafai ai ona toe faaali mai le fuafuaga a le Atua i le lalolagi ma i le faavavau,11 e agavaa ai i tatou ina ia avea e faapei o lo tatou Tama Faalelagi.12 Ua folafola mai e le Atua le ola e faavavau mo e faamaoni o loo aofia ai le faaipoipoga e faavavau, fanau, ma isi faamanuiaga uma o se aiga e faavavau.13
Filosofia Faatosina ma Taufaasese a Satani
O manatu sese ma taufaasese a Satani ua maua ai filosofia faatosina ia e maua ai le le manaomia o le usitaia o poloaiga a le Atua, aemaise lava le tulafono o le ola mama. O le leo tetee a Satani e leotele, ma o ana filosofia e masani ona faatosina. I le Tusi a Mamona, o nisi na taliaina nei filosofia e faasese ai isi ma manuia ai mai le taufaasese. Mo se faataitaiga, sa aoao atu Neoa i Sa Nifae “o le a faaolaina tagata uma i le aso mulimuli; ma e lē tatau ona latou fefefe pe tetete, ae ia ea i luga o latou ulu ma olioli; … ma ua togiola foi e ia [Alii] tagata uma; ma, i le iuga, o le a maua e tagata uma le ola e faavavau” (Alema 1:4).
Afai tatou te faaaogaina le filosofia a Neoa, e leai se tatou uunaiga e faasa o tatou manaoga feusuai aua e leai ni taunuuga e faavavau. Ma afai tatou te solia le tulafono o le ola mama? Leai se popole, talu ai o i latou o e na mulimuli ia Neoa “na le talitonu i le salamo ia latou agasala” (Alema 15:15). O lenei filosofia faatosina e mafai ona faatosina, ma e toatele o loo saili e faatosina; e mafai ona tatou faia soo se mea tatou te mananao i ai e leai ni taunuuga e faavavau.
Na folafola atu e isi faiaoga pepelo i le Tusi a Mamona e faapea o le talitonu ia Iesu Keriso, o Lana Togiola, ma le tausia o Ana poloaiga o le “outou o e ua noanoatia” e “mea valea” ma mai “uputuu [valea] … a o outou tama” (Alema 30:13, 14). O le mea moni, na latou folafola mai, o le tulimatai atu i “le faamagaloga o a outou agasala” ua na o se faafitauli faalemafaufau pe faalelagona, o le “fua lea o se mafaufau valea” (Alema 30:16). O le faaiuga lemaalofia o nei aoaoga e faapea, o alii ma tamaitai uma ua manumalo i lenei olaga “e tusa ma lo [latou] atamai” ma le “malosi,” ma o le a lava le mea e faia e se alii po o se tamaitai e “le o se solitulafono” (Alema 30:17). O nei aoaoga sese e faalauiloa ai le le usitaia o le tulafono o le ola mama aua ua le toe aoga le manatu faavae o le sao ma le sese.
E leitioa a lauiloa pea nei filosofia! O le leai o se tali atu mo soo se filifiliga ua pei o le saolotoga sili lea. Afai e mafai ona tatou aloese mai le tele o taunuuga faalelalolagi e ala i le faalafi ma le faaeteete, o le ā le afaina? E faasaga i lenei tulaga, o le tulafono o le ola mama e foliga mai ua avea ma aga-tuai, le amanaia, pe le manaomia foi.
Ata na pueina e May Bo Hubbard
Tulafono e Faavavau
E le fetuunaia tulafono a le Atua. Na te faatagaina i tatou e lafoai, ae tatou te le saoloto e fatu a tatou lava tulafono mo le faavavau e sili atu nai lo se tagata ua saoloto e fatuina ana tulafono patino mo le fisiki [physics]. E finagalo le Atua ia avea i tatou ma suli agavaa i Lona malo. Ina ia faamoemoeina ai lona tofi Faalelagi a o mulimuli i se ala ese nai lo le mea na ia otootoina o le talitonugofie.
A o lei valaauina au i le auaunaga tumau i le Ekalesia, sa ou (Elder Renlund) vaaia tagata gasegase sa tuga faaletonu o le fatu. I le gasegase o le fatu ma le vaega faafomai faapitoa mo taotoga e sui ai se fatu, e i ai kosi manino ua faatulagaina e mulimuli ai ina ia maua ai le taunuuga sili: umi ma sili atu le tulaga lelei o le olaga. O le taulimaina o se gasegase i se isi auala e le iu ai i ni taunuuga e sili ona lelei. O se tulaga maofa tele le taumafai o nisi ma’i e sue ni faiga e alofia ai le auala o togafitiga. Na fai mai nisi o gasegase, “ou te le manao e inu ni fualaau,” po o le “ou te le manao e suesueina lou fatu pe a uma ona faia le taotoga.” O le mea moni, o gasegase e saoloto e mulimuli i la latou lava ala, ae e le mafai ona latou sailia se auala faatauvaa o le faatinoga ma faamoemoe e sili atu le taunuuga e oo i ai.
E moni foi lena mea mo i tatou. Ua tatou saoloto e filifili lo tatou lava ala i le olaga, ae tatou te le saoloto e filifili le taunuuga e oo mai i le mulimuli ia tatou tulafono, e tusa lava pe faafia ona fai mai se tagata tatou te mafaia. E le tuuaia le Tama Faalelagi pe a tatou le maua ni faamanuiaga e fesootai i le tulafono o le ola mama ona o le le usiusitai.
I lenei tisipenisione, na aoao mai ai le Faaola, o tulafono o le faavavau e le fetuunaia ma tatalaina mo talanoaga. Na Ia fetalai mai, “O lenei foi, e moni ou te fai atu ia te outou, o le mea ua pulea i le tulafono ua faasaoina foi i le tulafono ma ua faaatoatoa ma faapaiaina i lea lava tulafono e tasi.
“O ia o lē solia se tulafono, ma lē ola i le tulafono, ae saili e avea ma se tulafono ia te ia lava, … e le mafai ona faapaiaina i le tulafono, pe i le alofa mutimutivale, faamasinotonu, po o le faamasinoga” (Mataupu Faavae ma Feagaiga 88:34–35; faaopoopo le faamamafa). E le mafai ona tatou suia a suia a tatou lava tulafono mo tulafono o le faavavau e sili atu nai lo se tagata e tago i malala vevela ae filifili e le mu ai.
Afai tatou te le usiusitai, o le a na ona tatou olioli “i mea ua [tatou] loto e talia, aua sa [tatou] le loto e olioli i mea semanu [tatou] te maua” (Mataupu Faavae ma Feagaiga 88:32). O le usitai i le tulafono o le ola mama o se tasi lea o auala tatou te faaalia ai tatou te naunau e faia soo se mea e manaomia e maua ai faamanuiaga ofoofogia uma e o faatasi ma aiga e faavavau.
Ata na pueina e Denise Renee Bird
O Tulafono a le Atua e i Ai Pea, i le Iuga, e le Faaituau
E le o fanau uma a le Tama Faalelagi ua i ai le avanoa i lenei olaga e oo ai i le sootaga vavalalata faalefeusuaiga i sootaga faaipoipo e tusa ai ma le tulafono a le Atua. O nisi o le a le maua le avanoa e faaipoipo ai. O isi ua faatalitonuina o o latou tulaga uiga ese, o le ola ai i le tulafono o le ola mama ua matua luitauina ma le talafeagai lea e mafai ai ona latou filifili e lē amanaiaina.
Peitai, e tatau lava ona faamasinoina le manatu tonu i se vaaiga e faavavau, mai le itu a le Tama Faalelagi ma Iesu Keriso.14 Sa apoapoai atu le Faaola i Lona nuu ina ia taofi le faamasino i le mea tonu po o le le talafeagai seia oo i lena aso o le a Ia faia ai Ana oloa taua (tagai i le Malaki 3:17–18). O “oloa taua” o loo faasino i ai le Faaola o i latou ia, e ui ina iloa pe le faaituau i se taimi le tumau po o soo se isi lava faalavefau, e tausia Ana poloaiga.
Pe a tatou lagona le le talafeagai o tatou tulaga ia i tatou, e sili atu foi ona tatou mulimuli i le fautuaga a le tupu o Peniamina. Na ia faapea mai: “Ou te manao ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e le gata” (Mosaea 2:41; faaopoopo le faamamafa).
Mulimuli ane, e leai lava se mea e faatusalia i le faaituau e le gata na onosaia e le Faaola. Ae, afai tatou te faamaoni, o le a Ia tauia i tatou mo soo se faaituau tatou te oo i ai, ma o le a tatou ausia se tulaga o le fiafia e le gata.
A o tatou filifili e tausi poloaiga a le Atua, e aofia ai le tulafono o le ola mama, o le a tatou maua le olioli ma le “filemu i lenei lalolagi, ma le ola e faavavau i le lalolagi a sau” (Mataupu Faavae ma Feagaiga 59:23)15 aua o le a avea i tatou o se vaega o se aiga e faavavau, faatasi ma tuaa ma fanau.16 A o faamauina e faavavau le tane ma le ava e le pule o le perisitua, o le a faaeaina i laua ma o loo i ai se atoatoaga o le mamalu ma ni fanau e faavavau.17
Ata na pueina e Jamie Dale Johnson
Faaosoosoga ma le Salamo
Sa muai silafia e le Atua o le a tofotofoina i tatou a o tatou taumafai e ola i le tulafono o le ola mama. O le mafuaaga lena na Ia saunia ai Lona Alo e avea ma o tatou Faaola ma Togiola. E ala mai ia Iesu Keriso ma Lana Togiola, ua mafai ai ona faamalolosia i tatou e tetee atu i faaosoosoga. O fanau uma a le Atua o e o loo aafia i faaosoosoga o soo se ituaiga e mafai ona liliu atu i le Faaola mo se fesoasoani.18 E malamalama Iesu Keriso i le mea tatou te oo i ai aua na “faaosoosoina o Ia i mea uma e pei o i tatou,” ma ua uunaia i tatou e “faalatalata atu ai ma le faamalosi i le nofoalii o le alofa tunoa, ina ia alofaina ai i tatou, ia maua ai le alofa tunoa e fesoasoani mai i ona aso e tatau ai” (Eperu 4:15, 16).
Pe a tatou tautevateva, e manaomia ona tatou manatuaina e mafai ona tatou mama e ala i le faatuatua ia Iesu Keriso ma le salamo faamaoni.19 O le salamo o se oliolisaga ona, “e ui lava ina pei o ofu mumu a outou agasala, e sisina ia e pei o le kiona” (Isaia 1:18). O le a le na o le faamagalo atu o le Faaola; O le a Ia faagaloina a tatou agasala.20 O a nisi mea e mafai ona tatou fesili atu ai: Fesoasoani pe a faaosoosoina, faamagaloina pe a tatou salamo. O le salamo e le tatau ona fefefe i ai e ui lava e taumafai Satani “e poloka i tatou mai le vaai atu ia Iesu Keriso, o lē tu mai ma aao mafola, ma le faamoemoe ma le naunautai e faamalolo, faamagalo, faamamā, faamalosia, ma faapaiaina i tatou.”21
Molimau
O tulafono a le Atua ua mamanuina mo lo tatou fiafia sili. E finagalo o Ia ia tatou faaaogaina o tatou tino ma tulaga feusuai i auala ua Ia faauuina ina ia mafai ona tatou avea faapei o Ia. Ua faamanuiaina i tatou i a tatou faaipoipoga i fegalegaleaina faatuatuaina a o tatou ola i le tulafono o le ola mama. Ua faateleina lo tatou talitonuina o le tasi ma le isi ma i lo tatou Tama Faalelagi a o tatou tausia lenei poloaiga. O le fuafuaga a le Atua ua na o le pau lea o le ala e mafai ona atoatoa ai le fua o le olioli. Ma te folafola atu e mafai foi ona outou iloa e alofa le Atua ia te outou ma o le a faavavau ona faamanuiaina outou pe a outou ola i Ana poloaiga.